------- ขุดส่าง-เล่นโบก -------
มื้อนึง พ่อเฒ่าชวนลูกเขยไปขุดส่าง ขุดไปขุดมา ขุดมาขุดไป กะไปบ่ฮอดไส กะฮอดหม่องฮั่นคือเก่านั่นล่ะ (กะขุดส่างเนาะ บ่แม่นเฮ็ดถนนหนทาง สิให้มันไปฮอดไส เดียวเนี่ยะ ผู้เว้ากะดาย..) ไปบ่ฮอดไส กะแม่นยุ แต่ว่ามันกะได้เลิ่กลง เลิ่กลง ยุเด้ล่ะ.. เหลียวเบิ่งจากทางเทิง กะเป็นฮูจึ่งปึ่งลงไป
ทั้งสองคน พ่อเฒ่ากับลูกเขย กะได้ลงไปในส่าง เอาเสียมซ่อยกันก่นดินขึ้นมา สบจังหวะพอดี้ พ่อเฒ่าปวดตดล่ะเว่ย เลากะพยายาม เฮ็ดก้นให้มันเป็นฮูโล่งๆ เผื่อสิบ่ให้เกิดเสียงดัง ที่เอิ่นว่า ตดชูด นั่นล่ะ (เลากะสิอยากอายลูกเขย อยู่เด้เนาะ จั่งบ่กล้าตดเสียงดัง) เลากะตดซูดได้สำเร็จ
... หว่างมื้อเซ้า กินข้าวกับหมกดักแด้ พอดีตั้วล่ะบะได๋...
อยู่ในส่าง อากาศกะบ่ถ่ายเทเนาะ หมู่เจ้ากะคิดเบิ่งเอาโลดเด้อ ...ตดจากหมกดักแด้.. คุณภาพ บ่ต้องห่วง...
พ่อเฒ่าเลากะได้กลิ่นยุ แต่กะอดไว้ เพราะฮู้ว่าเป็นตดจะของ
ลูกเขยตี้ล่ะ ได้รับคุณภาพดักแด้เต็มๆ แล้วกะฮู้ว่าบ่แม่นผลงานของจะของ ทนบ่ไหว กะเลยทำทรงถามว่า
? ฮู้ย...เหม็นตด หมาโตได๋ วะ !!! .. ขุดส่าง - เล่นโบก ..!!!?
? ฮ่วย อยู่หนี่ กะมีแต่กูกับมึงสองคนท่อนตั้ว มึงเว้าจั่งซี้กะแสดงว่า มึงว่ากูเป็นหมา ซั่นตี้?
พ่อเฒ่าเลาเคียดเด้
ลูกเขยฮู้ว่าพ่อเฒ่าเคียด กะเลยบ่ต่อปากต่อคำ ฟ้าวไต่ขึ้นจากส่าง มานั่งสูดอากาศบริสุทธิ์ทางเทิง (สูบยานำล่ะหวา) จากนั้น จั่งค่อยลงไปขุดส่างต่อจนแล้ว.....
พ่อเฒ่าถืกลูกเขยว่าเป็นหมา เลาเคียดอยู่บ่เซาเด้ คึดหาทางสิแก้แค้นลูกเขย กะเลยซวนลูกเขยเล่นโบก พ่อเฒ่าเลาเล่นโบกเก่งเด้ เลาเซียนมาแต่สมัยเป็นหนุ่มพุ่นตั้ว (เซียนแกมโกงนั่นล่ะหว๋า) ...ลูกเขยเห็นว่าว่างๆ เทิงเกรงใจพ่อเฒ่านำ กะเลยตกลง เล่นโบกกับพ่อเฒ่า
เล่นไปเล่นมา เล่นมาเล่นไป ลูกเขยมีเงินอยู่สามร้อย กะเสียให้พ่อเฒ่าเหมิดเลย คึดสิยืมเงินพ่อเฒ่ามาต่อทึน เผื่อสิได้คืนนั่นหนา
? พ่อ ๆ ยืมจักร้อยแหน่ พอได้ต่อทึน ?
? กูกะเสียคือกัน สิเอาไสมาให้มึงยืม ? พ่อเฒ่าเลาปฏิเสธ
? ฮู้... เล่นอยู่นำกันสองคน บ่ฮู้ว่า หมาโตได๋ เป็นผู้ได้น้อ ?
ลูกเขยเลาว่า... แล้วกะพากันเซาเล่น
พ่อเฒ่าแก้แค้น โดยเล่นได้เงินลูกเขยสำเร็จ แต่สุดท้ายกะถืกลูกเขยว่า เป็นหมา คือเก่า...
--------------------