เพิ่นว่ากินปลาทะเลน้ำลึก มีโอเมก้าสามหลาย เป็นไขมันบ่อิ่มโต บำรุงสมองพะนะ
แห่งกินกะแห่งปึกเด้อทางนี่ แต่กะกินคือเก่า ปลานี่ติ๋มบ่ได้ซื้อดอกจ้า เพื่อนเอามาฝาก
มีกินตลอดทั้งปี มักหลายของฟรี 555++
ติ๋มเฮ็ดแบบง่ายๆจ้ามีหยังพอใส่ได้กะใส่ มีปลา4ชิ้น กะทิ1กระป๋อง ไข่ไก่2ฟอง
น้ำพริกแกงเผ็ดตามชอบ ใบหมากกรูดหั่นฝอย น้ำปลา ซีอิ๊วขาว เกลือ น้ำตาลเล็กน้อย
ผักกาดขาวลวกสุกมีอยู่นิดเดียว เทกะทิใส่อ่างเหลือไว้หยอดหน้านิดหน่อย ใส่พริกแกง
คนให้ละลาย ใส่ไข่ ปรุงรส ใส่ปลา ใบมะกรูด คนจนเข้ากันดี ติ๋มบ่มีกระทงใบตอง
ใช้ถ้วย อิอิ รองก้นถ้วยด้วยผักกาดขาว มีใบยอ กระหล่ำ โหระพากะดี ตักปลาใส่ถ้วย
ได้4ถ้วยพอดี นำไปนึ่งจนสุก กวนกะทิกับแป้งข้าวโพดไว้ราดหน้า
พอปลาสุกราดหน้าด้วยน้ำกะทิ โรยใบมะกรูดอีกนิดหนึ่ง ใส่พริกแดงหั่นพองาม
นึ่งต่อ5นาทียกลง โรยหน้าด้วยผักชีสับ เชิญแซบจ้า กินกับข้าวหุงฮ้อนๆ
Bookmarks