อาหารคริสต์มาส ก่อนบ้านเขา อิอิ

[ติ๋ม เปอร์โย]

ที่จริงบ้านเขาสิกินกินวันนี้หละจ้า คืนวันที่24 แต่ติ๋มกินคืนวันที่23 มื้อนี่ติดเวรซั่นแหล่วพี่น้องเอ้ย

อาหารกะแล้วแต่ครอบครัวใด๋สิอยากกินหยัง หลักๆกะมี ไก่งวง ห่าน เป็ด หมู โดยใช้วิธีอบ เปิดเตาอบถ่าโลดไฟ200องศาC
ส่วนบ้านติ๋มกินเป็ดอบมาตลอดสู่ปี ปีนี่จัดก่อนหมู่กะเลยบ่คือคริสมาสต์ปานใด๋จ้า
เป็ดที่สิอบโตที่เห็นนี่3โลกว่า ล้างเป็ดดีๆ ดึงไขมันในท้องออกถิ่มให้เบิด ผสมเกลือ+พริกไทยดำ เอาเข้าไปทาในท้องเป็ด
แล้วกะยัดแอ๊ปเปิ้ลกับลูกพรุนเข้าไปในท้องเป็ดให้เต็ม
เอาเหล็กกลัดเนื้อมากลัดกันไส้ไหล::) แล้วกะทาเกลือให้ทั่วโตเป็ด
วางเป็ดบนตะแกลงมีถาดรอง ยัดเข้าเตาอบจ้า โดยหันหลังเป็ดขึ้นสู้ความฮ้อนก่อน45นาที แล้วหงายท้องเป็ดขึ้น อบต่ออีก45นาที

ช่วงนี้น้ำมันเป็ดออกมาหลายคัก เอาออกมาเทถิ่มเลยจ้าล้างถาดเอาน้ำใส่ในถาดแทน
แล้วกะใส่หอมใหญ่ แครอท ก้านเชอเลอรี่หั่นท่อน ใบกระวาน ก้อนซุป เกลือ พริกไทย
เอาตะแกลงเป็ดวางคืนคือเก่าอบต่อลดไฟลงให้เหลือ160-170องศากะพอ โดยตักน้ำข้างล่างราดโตเป็ดเป็นระยะ
จนเหลืองได้ที่กลับอีกด้าน เฮ็ดคือกัน ใช้เวลา4ชั่วโมงได้ทั้งเบิด อย่าใช้ไฟแฮงใจฮ้อนไหม้ก่อนสุกเด๋
เอาเป็ดออกมาตัดให้เป็นชิ้น ส่วนน้ำเทออกเก็บไว้เฮ็ดน้ำราด เวลาสิกิน ส่วนเป็ดกะอบไฟแฮงอีกนิดหน่อยให้หนังกรอบ

เสริ์ฟกับแตงดอง กระหล่ำปลีสีแดงดอง แยมผลไม้ชนิดส้ม

แล้วกะมันฝรั่งต้ม แครอทต้ม มันสีน้ำตาลนั่นคั่วใส่คาราเมลจ้าออกรสหวานนิดหน่อย
น้ำราดสีน้ำตาลแก่นั่นหละจ้า แล้วกะไวน์แดงจ้า แต่ติ๋มบ่กินไวน์ ดาวแดงแทน อิอิ
เชิญแซบจ้า เป็นอาหารฝรั่ง