แกงผักขี้เหล็ก
มื้อนี้ฅนภูไทเอางัวไปล่ามอยู่หัวเถียง เห็นยอดผักขี้เหล็กงามคักกะเลยสิเก็บมาแกงใส่ตีนงัว ที่คะเจ้าให้มาคราวไปเอาบุญแอวอยู่ปราจีน สู่พี่น้องบ้านมหากิน(ส่วนหนึ่งผมกะเฮ็ดส้มตีนนำ สินำเสนอในโอกาสต่อไปรอให้มันเป็นก่อนครับ) มาเด้ออ้ายเซียงมากินแกงผักขี้เหล็กนำกัน เห็นจ้ำปลาแดกอยู่มื้อวานนี้ เอาถ้วยมาแบ่งเอาเด้อครับ ::) มาเบิ่งวิธีเฮ็ดกันเลย
อันดับแรกเฮากะเอายอดผักขี้เหล็กมาเด็ดเอายอด เอาใบอ่อนมาต้ม อ่อมให้มันจืดก่อน ต้มจักสองน้ำเด้อครับ
พอจืดดีแล้วเฮากะมาปั้นเอาน้ำขมมันออก เสร็จแล้วใส่น้ำยานางยกหม้อขึ้นตั้งไฟ
พอน้ำเดือดใส่ข้าวเบือ ตะไคร้ทุบ ใส่ปลาแดกลงไป
ใส่กระดูก เอ็น เนื้อที่เลาะจากขางัวลงไป
ใส่ผัก อีตู่ ต้นหอม ลงไป แล้วกะใส่ผักขะ(ชะอม) ปรุงรสตามใจชอบยกหม้อลง
ตักใส่ถ้วยเสริฟกับข้าวเหนียวฮ้อนๆ 8)8)8)
แกงผักขี้เหล็กเฮ็ดน้ำข้นๆจักหน่อยเด้อครับ บางสูตรกะเอาผักขี้เหล็กมาตำก่อนจั่งเอาไปแกง ใส่ไข่มดแดงนำกะแซบเด้อ ขอบอก
Bookmarks