ชัย หมอแคน

มาซบอุ่นไอดิน

Rate this Entry
ลมหนาว เริ่มมา เยือนแล้วหนา
เหลียวเบิ่งนา ข้าวถอกกุ้ม หุ้มเต็มฮวง
ข่าวทางไกล น้ำท่วม เพิ่นใหญ่หลวง
อั่งในทรวง ย้อนเป็นห่วง ผู้สูญเสีย


ข้าวปลา นาท่งใหญ่ คงสิเหมิด
ถ้วนจานเจิด ไปนำน้ำ ชามบ่เหลือ
บ่เป็นหยัง พี่น้องเฮา ยังจุนเจือ
ข้าวบ้านเหนือ เกลือบ้านใต้ ได้แบ่งปัน


เมฆเทิ่งฟ้า ลอยกระจาย คล้ายดอกเห็ด
น้ำหมอกเม็ด ขาวใส คือในฝัน
สุขแท้แท้ ดมไอดิน กลิ่นปลามัน
เคลือเถาวัลย์ ปุมเป้า คัดเค้าหอม


นกกระยาง ย่างเดิน เลาะปลาข่อน
นกเจ่าฟ้อน เทิ่งฟ้า พากันเหิน
เหลียวเบิ่งหา หนองน้ำใหม่ วนบินเซิ่น
นกเอี้ยงเอิ้น คู่คืนนา อย่าหนีกลาย


เช้าไปนา ยามไซ ไปยามเบ็ด
เอามาเฮ็ด ต้มแกง มีแฮงหลาย
ผักอีตู่ กะแยงพร้อม หมกแล้วบ่าย
ปลาหลดลาย ปลาซิวน้อย ค่อยค่อยกิน

ข้าวสีเขียว เขียวมื้อ สีเหลืองทอง
คันฮวงก่อง ใกล้เกี่ยว เที่ยวกฐิน
น้ำแจนา นับมื้อ เอื่อยไหลริน
ผืนแผ่นดิน แห้งก้าม ยามลมถ่อ


ยายเลายืน ซิดเบ็ด อยู่ข้างหนอง
เห็นใบตอง แห้งลอยมา ว่า(แม่น)ปลาหมอ
ยืนโดนโพด ข้าวปลา ยังทันได้ลึดลงคอ
ตาลายล่อ ตั๋วแม่ ให้ดีใจ...(ฮึ่มมม)

(อันนี้อีแม่ข้อยเอง แซวเลานิดหน่อย)

อยู่ในสระ น้ำใส บ่ไหวติง
น้ำเริ่มนิ่ง ฝูงปลา กะลอยไหล
ลงลอยเล่น เก็บบัวแดง ดอกใหม่ใหม่
เอาไปแกง ใส่ปลา เข้าท่าคัก


อีสานมื้อนี้ ยังมี แผ่นดินงาม
หากอยู่ตาม ความพอเพียง ยึดเป็นหลัก
มาฮ้องเอิ้น พี่น้องเฮา ด้วยความฮัก
มาซบตัก แผ่นดินแม่ สุขแท้เอย...

Submit "มาซบอุ่นไอดิน" to แชร์ไปที่ Facebook Submit "มาซบอุ่นไอดิน" to แชร์ไปที่ Twitter Submit "มาซบอุ่นไอดิน" to แชร์ไปที่ Printerest

แท็ก: ไม่มี แก้ไข Tags คำค้นหา
Categories
Uncategorized

Comments

  1. สัญลักษณ์ของ สะใภ้อิสาน
    ไม่เคยสัมผัสชีวิตแบบนี้แต่รู้สึกอบอุ่นจัง
    คิดถึงบ้านจัง
    ขอบคุณเจ้าของกระทู้นะคะที่นำมาแบ่งปั่น
  2. สัญลักษณ์ของ ลาวดีน้อย
    คิดฮอดบ้านเด้ จ้า

    พึ่งกลับมาจากมะวานนี้ ใจยังคิดฮอดอำล่ำๆอยู่แหมะจ้า
  3. สัญลักษณ์ของ คนพนมไพร
    ชัย...เจ้ามาซ่างเว้าม่วนชวนให้อ้ายคึดอ่ำ-ล่ำนำท่งนายามข้าวพวมมาน ปลาพวมข่อนแท้น้อง อ่านแล้วฮู้บ่อว่าอ้ายน้ำตาผ่านหน่วย ขอบคุณหลายที่เฮ็ดให้อ้ายเห็นรูนาข้าว ย้อนว่ามันคือชีวิต
  4. สัญลักษณ์ของ แจ่มใสยิ้มสวย
    เข้ามาอ่านหลายวันแล้วหละค่ะ แต่ไม่ได้ฝากข้อความใว้ เพราะใช้อีกเครื่องที่ไม่ได้ลอกอิน เลยฝากไม่ได้

    ใจจริงหลายคนคิดถึงบ้าน แต่อยากขอให้เป็นบบรยากาศเก่า ที่เราพี่น้องผู้คนในหมู่บ้านพึ่งพาอาศัยกัน

    มีผู้ใหญ่บ้านเป็นพ่อบ้าน แต่เดี๋ยว เลือกตั้งแค่ผู้ใหญ่บ้านยังต้องใช้เงิน ไม่มีแลกอาหารการกิน บ้านเราเปลียนไปเยอะค่ะ จะว่ามองโลกแง่ร้ายก็ได้ไม่เป็นไร แต่ทำไมหลายคนจึงยังไม่กลับบ้านไปหาไออุ่นอย่างที่ต้องการหละ น่าสงสัยไหม
  5. สัญลักษณ์ของ khonsurin
    เข้ามาอ่านกลอนเพราะๆๆ
    บวก กับธรรมชาติที่เป็นธรรมชาติค่ะ
    Updated 21-12-2010 at 08:52 by khonsurin
  6. สัญลักษณ์ของ ชัย หมอแคน
    มื้อนี่กลับมายามบ้านเก่า บรรยากาศอบอุ่นคือเก่าครับ แต่อากาศไม่เหมือนเดิม ตอนนี้อีสานแห้งแล้งคัก ฝนตกนิดๆหน่อย ๆ ข้าวกล้าในนาแห้ง ถ้าเดือนนี้บ่ตกหนักๆปีนี้คงเป็นปีทีโชคร้ายของชาวนา บ้านเฮา

Trackbacks

Total Trackbacks 0
Trackback URL: