เว็บบล็อก PJ ขามป้อม

แนวอยู่แนวกิน

Rate this Entry
แนวอยากแนวกินแต่ล่ะมื้อจ้า ส่วนมากแล้วขามป้อมเฮ็ดแนวกิน กินเองนี่ล่ะจ้าบ่ค่อยซื้อแนวกินสำเร็จ ย้อนว่าคร้านออกไปหาซื้อจ้า นั่งเฝ้าออฟฟิศเบิดมื้อ เลิกงานแล้วกะขึ้นห้อง ออกไปธุระแต่วันอาทิตย์แล้วกะซื้อเสบียงมากักตุนไว้จ้า เฮ็ดหยังไว้กะกินเบิดมื้อ เบื่อๆข้าวกะลัดรถก๋วยเตี๋ยวเอา

ปกติเฮ็ดแนวกินไว้ กะถ่ายรูปไว้นำจ้า แต่ว่าจักไปเก็บไว้ไสแหน่ หาเบิ่งในเครื่องกะบ่พ้อ บาดนี้มีบล็อกแล้วจั่งซี้ เอามาอัปไว้ในบล็อกโลด ค่อยหาง่าย :l-

อันนี้รูปบางส่วนที่ยังในเครื่อง โอ๊ยเสียดายรูปที่เสียไปเด้เนาะ





แกงเห็ดจ้า เห็ดหยังดอกทางนี้เพิ่นเอิ้น ไปพ้ออยู่ตลาด เบิ่งลักษณะดอกแล้วคล้ายๆ เห็ดขอนหรือเห็ดกระด้างบ้านเฮา แต่ดอกน้อยๆ ซ่ำเห็ดปลวกไก่น้อยบ้านเฮา ขาแห่งสั้นก่อ แม่ค้าว่า เห็ดแนวนี้เกิดน้ำสวนยางพะนะ ถามเพื่อความมั่นใจว่ากินได้แท้ๆ กะเลยเอา

อันๆ อีกเหตุผลหนึ่งกะคือ มีคนมาซื้อนำคือกัน เอ๋ากะแสดงว่าเพิ่นกะกิน แล้วตอนย่างมาซื้อหมากไม้ แม่ค้าหมากไม้กะถามว่า "เห็ดซื้อที่ไหนน้อง" กะเลยแห่งมั่นใจว่ากินได้ 5555

มื้อนี้อยู่ตลาดบ่มียอดผักติ้วจ้อย มีตะยอดบักส้มโมง เอ๋า เอากะเอา แต่ว่าตอนแกงหั่นกะเอาคำข้าวเหนียวลงนำอยู่ดอกเห็นว่า เพื่อควมมั่นใจอีกรอบ สรุปว่ากินได้เด้อจ้า บ่มีอาการหยังเกิดขึ้น :l-





มาฮอดเมนูหมูๆ(คนกินกะใกล้เป็นหมูน้อยๆแล้ว) อิอิ ขามป้อมได้ลิ้นหมูมาจากบิ๊กซี 2 แพ็คจ้า จัดการเอามาต้มไว้ทั้งสองแพ็คเลยจ้า ใส่ตะไคร้ ใบบักกรูด เกลือ เพื่อดับคาวจ้า พอลิ้นเริ่มเปื่อย กะเอาขึ้นมาหั่นๆๆๆ เฮ็ดต้มแซบ แล้วกะแบ่งไว้อ่อมมื้อลุนนำจ้า กะเลยได้ออกมาแบบนี้




ป่นจ้าป่น ป่นปลาทูกินกับปิ้งปลาแห้งจ้า ปลาอันนี้ เป็นปลาทะเลจ้า คนทางพี้เพิ่นเอิ้นว่า ปลาจวด จ้า แซบอยู่จ้า ได้กินแล้วกะพอเซาคึดฮอดปลาขาวสร้อยแดดเดียวบ้านเฮาได้อยู่





มื้อนี้เอารูปมาเพิ่มจ้า 14.09.2010
ไก่บ้านอบสมุนไพรพะนะ เครื่องปรุงกะบ่มีหยังหลายดอก ข่า ตะไคร้ หัวหอม กระเทียม พริก ตำๆ ใส่กันแล้วกะรวนๆ กับไก่ น้ำปลาแดก ผงชูรส น้ำปลา รวนใส่หม้อนี่ล่ะ พอหอมดีแล้ว กะเติมน้ำให้ท่วมไก่ เคี่ยวไปเรื่อย พอน้ำเริ่มแห้งกะเบาไฟลงให้ไฟอ่อนๆ ปิดฝาไว้จนกว่าน้ำแห้งเบิด กะใส่ใบบักกรูดฉีกลงไป อบไว้จักหน่อย
กะเอามากินได้ แซบบบบ จนได้เลียมือพุ้นแหล่ว






ช่วงนี้ฝนตกเกือบซู่มื้อ คึดหยังบ่ออก กะเลยอุ่นต้มข้าวตะมื้อคืน กับแนวกินที่มีอยู่ในตู้เย็น มีสายบัวอยู่กำหนึ่ง ตั้งใจว่าสะเอาไว้แกงใส่ปลา แต่ปลากะอยู่ในฟรีซ คร้านเอาออกมาละลายน้ำแข็ง หิวกะหิว ผัดไฟแดงโลดกับทอดไข่มาสมทบ ซ่ำนี้กะอยู่ได้อีกมื้อหนึ่งแล้ว

Submit "แนวอยู่แนวกิน" to แชร์ไปที่ Facebook Submit "แนวอยู่แนวกิน" to แชร์ไปที่ Twitter Submit "แนวอยู่แนวกิน" to แชร์ไปที่ Printerest

Updated 14-09-2010 at 13:05 by บักขามป้อม (เพิ่มรูป)

แท็ก: ไม่มี แก้ไข Tags คำค้นหา
Categories
Uncategorized

Comments

  1. สัญลักษณ์ของ pui.lab
    ป๊าดดดด น้องป้อมแตละอย่างแซบๆๆ อยากกินนำฮือๆๆๆ
  2. สัญลักษณ์ของ บักขามป้อม
    พี่ป้อย มาเป็นคนแรกเลย นั่งๆ จ้าพี่สาว มากินข้าวซุมกันนี่ล่ะ ดีใจเด้ มีหมู่กินข้าวแล้ว อิอิ
  3. สัญลักษณ์ของ บ่าวพล
    โอ้ยยยยย หลวงพ่อหิวเข่าแล้วละ หลวงพ่ออยากแกงเห็ดแมะ อิอิอิ
  4. สัญลักษณ์ของ บักขามป้อม
    ฮ่วยยย หลวงพ่อคือมายามเดิกน้อบาดนี้จ้า หือลุกมาฉันก้อยเดิกบ้อ อิอิ
  5. สัญลักษณ์ของ นู๋น้อย
    :1-:1- เล่นเป็นแล้ว ก๊ากกกกกกกกอะปาดดดดดดดดแนวกิน เผิ่นนะ :b-b:b-b
  6. สัญลักษณ์ของ เเมงสะดิ้ง
    กรี๊ด...อยากไปยามจั๊กมื่อเด๊
    ค่านเฮ้ดกินเองแล่วแม่ะหง่าขาม
    เอื้อยดิ้งอิ่มแล่ว4นอนเฝ้าดอก
    ล้างถ้วยเก็บจานนำเด้อเจ้าภาพ
  7. สัญลักษณ์ของ บักขามป้อม
    มาโลดดดด กะยังว่า หาตะค่ารถมาเด้อเอื้อย บ่ต้องนั่งเครื่องมาเด้อ มันบ่ได้บรรยากาศ มาสมุย ต้องได้นั่งเรือเฟอรี่ข่วมทะเลตั้วเอื้อย แนวอยู่แนวกินบ่ต้องคึดยากเด้อ ตุนปลาแดกไว้เป็นไหกะยังว่า อิอิ

Trackbacks

Total Trackbacks 0
Trackback URL: