ผญา หยอกสาว

[pcalibration]

บ่ได้มาหลายมื้อ ดนนานกะยังว่า
ความห่วงหาหมู่เจ้า ซุมสาวเถ่าผู้บ่าวแวง
ได้กินแกงปลาค้าว บ่ลืมคราวกะปูป่น
จากไปดน ยังบ่ลืมพี่น้อง ทั้งหลายล้น ล้วนคึดนำ...อยู่แหลว

..อึ๊ฮึ ลงง่ายๆส่ำนี้หละ ...

ส่างสิมาจาเว้า สาวเถ่าผุ่บ่าวแวง
มันแสลงในหู คิดเบิ่งดู๊เด๊อท่าน
คนเบิ๋ดบ้านไผน้อเกิดก่อน โอ๊ยสะออนเด๊เจ้า มาคือเถ่าแต่ผุ่สาว....หว่าหนิ่แมะ

c06:

[พลายแก้ว]

[COLOR="Plum"]บ่าวก๋าคามเอ๋ย
หยอกกะหยอกโลดซั่นเจ้า นางสิเฝ่าถ่ารับหยอก
สัพยอกเล่นทางกลอน พอออนซอนดอกเนาะจ้า
อย่าสุป๋าลืมกันทิ่ม ยามง่ายแลงมาเว่าต่อ
พอให้ได่นั่งหัวร่อ ต่อกลอนเจ้าเว่าม่วนเยิน
ตกกะเทินคั่นได่จา ให้สามบ้านส่าห้าบ้านแซว
เว่าสาวเล่นให้มันแล้ว ทบทื้นหย่อต่อเอาไน..พุ้นแหลว

..เนาะบ่าวเนาะ.. อิอิอิ..[/COLOR]

สัพยอกหยอกเล่น เป็นกลอนผญาย่อย
เติมแต้มเตาะต่องต้อย ออยเล่นพอม่วนยิน
ศาสตร์และศิลป์อีสานเชื้อ เหลือเฟือมูลมังค่า
ทั้งผญาสุนทรวาท มวลหมู่ปราชญ์กล่าวสอน
บาดนี้..สิได้ว่าผญาอ้อน ป้อนส่งตรงสาวส่า
ผู้โสภางามคัก จักชื่อหยังจำบ่ได้
ผู้ไฉไลปานน้องอั้ม ผู้งามๆคือแพนเค๊ก
หน้าเด็กๆคือมิกกาเซ่ โอย..เด้น้อ เบิ่งแปนๆ ผัดแม่นปฏิทิน

[chudhancock]

โอ๋ยน้อหลานมิคเอ๋ย ป้านี่มายุบอแพ้
แต่บอเก่งกลอนผญา ว่าไปตามดอกปัญยา
คึดออกมาได้ซ่ำนี่ ดีบอดีอภัยเด้อ
คั่นอ่านเจอคำบอล่อง แนวบอป่องปึกแท้ๆ
ย้อนเฮียนแค่ซั่นประถม สมบอสมแล้วแต่เจ้า
ให้อ่านเอาแล้วเติมต่อ นี่แหละน้อความฮู้หน่อย
มีปมด้อยหน่ายเจ้าของ ขอบใจหลานที่มาย้อง
ได้มองเห็นว่ามีค่า หลานมิคฮ้องเฮียกมา
ป้าก็หาคำมาเว้า เอามาต้อนบ่อนผญา
นี่แหล่วหลานมิคกาซี่เอ้ย?

[บ่าวปุ้น]

นางเอ้ย.........
อันว่าฮักอ้ายนี้....ป่านฝีใกล้สูข
ทุกมะโนทัยแท้....หาสาวแก้ยากพนา
สาวใด๋น้อสิมียา....ให้เมตราเอาหนามตำ
ฝีแตกช้ำเต็มงามดาก....เอายาป้ายสิได้คลาย..น้อ...พี่น้อง...นางเอ้ย..นางเอ่ย

[สาวเมืองกะสิน]

สายลมหนาวพัดต้อง ใกล้งานกินดอง อ้ายแล่วไป่
อ้ายบ่าวก๋าคามคนไกล มีข่าวดีแล้วบ้อ หาพ้อแล่วไป่สาว
หรือว่าไปหาเลาะเล่น ลักนอนเว็นให้ผู้เฒ่าจ่ม (หนีเวียกเกี่ยวข้าวติ๊อ้าย)
บั่ดยามกลางคืนแตกจ้นๆๆ กินเหล้าหล่ะคักหลาย (รึได๋เน๊าะ) ผู้บ่าวเอ้ย....


มาเลาะยามบ้านยามกลางเว็น ไปไสหมดน้อผู้บ่าวบ้านนี่ คือมาเงียบคักแท้จ้า
ใหญ่ศรีฯมาแว๊บๆ กะฟ้าวไปแล้ว พี่มิก ป้าชุ กะบ่เห็นหรือว่าไปเกี่ยวข้าวกันน้อ
อ้ายบ่าวก๋าคาม ผู้เพิ่นเคยเลาะบ้าน หาแซ่วผู้สาวกะบ่อยู่เฮือน
สงสัยไปหาลักนอนเว็นเน๊าะพี่น้อง หนีเวียกเกี่ยวข้าวตี๊ได๋บู้หนิ อิอิอิอิ

[chudhancock]

ลมพัดใบตองกล้วยเทิ้งใบไผ่กะหล่นกอง
เดือนสิบสองเข้าเยือนเปลี่ยนฤดูการพ้น
เบิ๊ดหน้าฝนแล้วน้อเจ้าสายลมหนาวพัดวี่วี่
บอทันมีคู่ซ้อน ซายสิเก้ยกะบอมี
หนาวเต็มทีลมพัดยู้สาวคอยคู่มาเคียงสอง
ซายหมายปองกะบอเห็นลมแฮงเหย็นม๊าหนาวแท้
หาซายแว มาจ๋าเว้ามาขอเอามิดซี๊ลี
หรือแมนติว่าขี้ฮ้ายสั้นบออ้ายจังบอเหลียว?

[พลายแก้ว]

เสียงผุได๋เจื้อยแจ้ว เสียงแซวๆจนว่าตื่น
พอมืนตาขึ้นมาพ้อ ผุได๋น้อจ่มหา
สาวกะสินตั๊วะนี่ เผยวจีมาถามข่าว
จอบผุบ่าวเลาะบ้าน มาพาลอ้ายผุนอนฝัน
โตสำคัญกำลังได้ ยินเสียงใสสะเดิดก่อน
พออยากเอาไม้ค้อน ไปไล่ต้อนกะหง่อนคน เด้..
แน่ะ..อย่าฟ้าวเบ๋..อ้ายเว้าเล่น ย่อนว่าเห็นเป็นน้องนุ่ง
ถึงหัวหยองหยังยุ่ง กะอุ้งปุ้งตาฮักเด้อ นางเอย..
อ้ายยากหลายตั๊วะหล่า ข้าวอยู่นาบ่ทันเกี่ยว
เทิ่งย่างเทียวทุกค่ำเซ้า ไปหาเฝ้ารถเกี่ยวมา
ทางนายหน้าบอกว่า มามื้ออื่นทันใจ
จักว่าปีได๋นอ ตั๋วให้รอมาสิบมื้อ
ซงบ่คือดอกน้องหล่า เลยไปหายืมเงินเสี่ยว
แล้วไปซื้อรถเกี่ยว แต่ยังเกี่ยวบ่ได้ บาดได๋แท้..ถ่านบ่มี นางเอย


ยืมเงินซื้อถ่านใส่รถเกี่ยวแหน่นาง.. คนขายเพิ่นบ่แถมให้อ้ายแหม๋ คึดซังคัก

[chudhancock]

บ่าวก๋าคามเอ๋ย เป็นจังได๋น้อเจ้า คาจีบสาวยุวาติ
ป้ามาหายุมื่อนี่ บอเห็นเจ้ามาเว้านำ ฮอดบอเหลียวอีกซ้ำ
เฉยตุ้ยแล้วย่างกาย หรือว่าป้านี่เฮ็ดให่ ผิดใจแนวใด๋แน
หรือมัวแต่นั่งเว้า ผุสาวเจ้าแมนบอน้อ ป้านี่มาหยอกล้อ
เว้าเหล่นดอกเด้อหลาน อย่าฟ้าวด่วนลำคราน เว้าอยอกหลานซือจ้าอิอิอิอิอิ

[พลายแก้ว]

ป้าชุดเอย...
บ่ได้หนีไกลหน้า คิดฮอดป้าอยู่คือเก่า
บางมื้อยากเกี่ยวข้าว คำเว้าเลยห่างหาย
บ่ได้กายไปหน้า หากินปลาดอกซาเพิ่น ป้าเอย
แม่นสิไกลคำเอิ้น แต่ใจนั้นบ่ห่างกัน
ยากหม่องหลานต่ำต้อย ได้แต่คอยจอบส่อง
ได้แต่มองสาวในบ้าน เพิ่นจาต้านผุบ่าวแวง
มันเหมิดแฮงแล้วล่ะป้า กะเทิ่งล้ากะเทิ่งเมื่อย
แม่นสิเว้าอยู่เรื่อยๆ สาวบ่เตื้องต่อนำ
เลยเก็บงำกายใจเศร้า บ่หานเว้าต่อไผ
ขออภัยที่บ่จา กะย่อนว่าเป็นจั่งเว้า นั่นแหล่ว ป้าเอย..

[chudhancock]

เห็นหลานก๋ามาจ๋าเว้า
คาเกี่ยวข้าวอยู่ตีหลาน
บอได้พ้อกันหลายวัน
ว่าแมนหลานสิลืมแล้ว
เห็นไปแซวผุสาวเหล่น
ป้าแนมเห็นก็เลยเอิ้น
เว้าแก้เขินว่าเกี่ยวข้าว
พะนะเจ้าหลานบ่าวก๋า
เอ้ย อิอิอิอิ แมนบอ