... อยากบอกว่าอ้ายฮักเธอ ...

**บ่าวโจ่โล่** · 17-05-2009, 22:21

[Radio]jolo/Paya/Sky for get*.wma[/Radio]

ได้เขียนกลอนป่อนป้าย บรรยายส่ง ลงอักษร ฝากแทนหมอนยามหนุนหัว ของไกล้ตัวได้หอมแก้ม

แม่จันทร์แรมยิ้มรื่น บ่อยากตื่นดอกยามฝัน สามสิบวันมื้อห่วงหา บ่เคยป๋าทางใจอ้าย

ยามมื้อสายฝนย้อย คือปานฮอยน้ำตาหลั่ง แนวที่เติมความหวัง คือกำลังใจจากเจ้า เป็นเงาซ้อนมื้อออ่นแฮง

คำแถลงงบ่หวานชื่น คำเว้าตื่นผ่านทางสาย คำบรรยายบ่ปานได๋ แต่ทางใจยังเกินร้อย

ลมวอย วอย ย่านเป็นไข้ หนาวซ่ำได๋ทางนั้นน่อ หนาวอยู่บ้อทางน้องหล่า บ้านนางฟ้ากะแม่นหนาว (อยู่บ่น้อ)

ท้องฟ้าขาวซงเหลือหน่อย กวาดเมฆลอยไส่กะต่า พออยากเขียนแต้มเต็มฟ้า แล้วบอกว่า "อ้ายฮักเธอ" (ซั่นดอกหว๋า)

**sompoi** · 18-05-2009, 08:19

ม่วน หวาน ตามแบบฉบับบ่าวโจ่โล่ คือบ่ใส่ซาวน์อ้ายแอนด์แคนมิวสิค(เสียงอ้ายและเสียงแคน)นำล่ะอ้าย..แม่จันทร์แรมอาจสิเคลิ้มกว่านิแม๋ะ แม่ส้มป่อยว่า..อิอิ. Kiss

**พลายแก้ว** · 18-05-2009, 11:08

หล่านางเอ๊ย....
ฮักเจ้าหลายจนละว่าหลงเพ้อ
เผลอเอาสุบใส่เสื้อ
แล้วเอาหัวสุบใส่โส่ง
เอาถงพายมาคล้องใส่
ไปเฮ็ดงานได้เคิ่งมื้อ
จั่งคิดพ้อว่าใส่ผิด..สั่นแหล่ว

(ผุเฮ็ดงานอยู่นำกันกะบ่ท้วงแน่เนาะ..หืยยยยยย)

**สายลม** · 18-05-2009, 13:22

ม่วน หลายอิหลี้จ้าอ้ายยยยยย ซวดๆๆๆๆๆๆๆๆๆๆๆ

**ทองคำ** · 19-05-2009, 00:30

หล่านางเอ้ย ยามมื้อแลงคิดฮอดน้อง มองทางใด๋กะหมองหม่น
คนเป็นแสนเป็นล้าน บ่ส่ำน้องมานั่งเทียม
เตรียมใจคอยจนหลงเพ้อ ละเมอเป็นบ้าป่วง
ดวงดาวใสเต็มฟ้า บ่เกิ่งหน้านาถแพง
แงงกระจกว่าใสแล้ว แววตานางยังใสกว่า
สิขัวนัวน้ำหมอกกลุ้ม กุมดินแห้งบ่เกิ่งชาย หล่าเอ้ย

**บ่าวโจ่โล่** · 19-05-2009, 11:09

กระทู้ต้นฉบับโดยคุณ ทองคำ

หล่านางเอ้ย ยามมื้อแลงคิดฮอดน้อง มองทางใด๋กะหมองหม่น
คนเป็นแสนเป็นล้าน บ่ส่ำน้องมานั่งเทียม
เตรียมใจคอยจนหลงเพ้อ ละเมอเป็นบ้าป่วง
ดวงดาวใสเต็มฟ้า บ่เกิ่งหน้านาถแพง
แงงกระจกว่าใสแล้ว แววตานางยังใสกว่า
สิขัวนัวน้ำหมอกกลุ้ม กุมดินแห้งบ่เกิ่งชาย หล่าเอ้ย

ขออนุญาต มาต่อผญา ท่านอาจารย์ทองคำ แน่เด้อครับ พอกำก่าหนิหล่ะ ขะน้อยกะดาย ฮ่า ๆ ๆ

หล่านางเอ๊ย ลมรำเพยคิดฮอดน้อง ลมพัดตอง ทองใจหม่น (ทองคำแมะ) คิดฮอดคนผู้จั่งเจ้า จักสิเว้าไส่ผู้ได๋

แนมไปไกลจนสุดฟ้า ดวงดารากะหมองหม่น มื้อเมฆฝนหยาดย้อย ปานคนต้อยออ่ยน้ำตา

อยู่ซำบายบ่น้อหล่า อ้ายห่วงหาพาใจหม่น ฝากนำฟ้าจานำฝน ซ่อยไปดลทางใจเจ้า บอกเขาด้วยอ้ายห่วงหา

เจ้าว่าไกลคนละฟ้า อ้ายกะว่าบ่เคยไกล หม่องอาศัยไปห่างเหิน แต่บ่เกินทางใจอ้าย

ล้านเม็ดทรายทะเลกว้าง (ก้วง) บ่ปานห่วงในหัวใจ อยู่หม่องได๋กะมีเธอ ฮักเสมอในใจอ้าย น้องสาวเอ๊ยยยยย

**khonsurin** · 19-05-2009, 15:13

อ่านแล้วมีความสุขจังเลย มีแต่ผญาม่วนๆ โต้ตอบกัน
อยากแต่งเป็นจังเลย แต่ความรู้ความสามารถไม่ถึงค่ะ

**ศรีสะท้าน** · 20-05-2009, 21:03

วิหกฮ้อง เทียวท่องราตรี พี่หนา
อาวทองคำคนดี ซ่างมาจาต้าน
เป็นคำหวานคือตั๋วล่อ โอนอผู้สาวเซื่อ
มีคนเฟือนั่งเฝ่า คอยฟังเจ้าจ่ายผญา
ศรีบ่อาจหล่วงกล้า จาต่อเลยขอกลาย
วีมือบายอำลาย ว่าsee you again

....ไปหาหนึ่งข้าว เป่าไฟก่อน อาวทองฯ และพี่น้องมิตรมหา โอ๊ะผญา ทุกคน เหอ ๆ ๆ....