ยามไฮ่ยามนา

[บ่าวโจ่โล่]

มื้อสายฝน หล่นจากฟ้า ฮำเถียงนา หญ้าแตกป่ง น้ำเต็มท่ง ป่งยอดอั้ว เลื้อยนำฮั้ว ยอดถั่วแตง

ต้นสะแบง แทงยอดปี้น ผักอีฮินแตกเป็นง่า กลางไฮ่นากล้ายอดข้าว ปูน้อยเฝ้าถ้าเลาะเล็ม

ปลายเป็นเข็มเต็มดินใต้ หน่อไม้ไผ่ทรงสะอาง ใบยานางกางเครือหนา ยอดผักขามายืนต้น

ได้เม็ดฝนปนลมจ้าว แตกเป็นท่าวยาวเป็นเคลือ คักเอาเหลือเครือผักไส่ ไต่เป็นแนวแถวคันฮั้ว

ฮอดยามคัวเอาต่องแอก แบกคันไถไปลงท่ง จุดประสงค์คือดำกล้า นาทามหล่มฮ่มบักแซว

นี่หล่ะแนวยามฝนฟ้า แมงดานาสิออกไข่ แมงกิซอนบินขับไล่ แมงหมี่น้อยต้อยหน่วยตา พี่น้องเอ๊ย


ขอให้หลานน้อย แป๋นำครู นำบา แน่เด้อครับ บ่ม่วน บ่ยินคือหมู่เผิ่นกะดาย ฮ่า ๆ ๆ

[ต่วง]

คือมีแต่คนคารมดีแท้ ซะพ้อกิ๊กหลายเนาะครับ

[เจ้าซายน้อย]

น้ำเอ๋ยน้ำจากฟ้า ตกลงมากะซุ่มซื่น
ปลาได้บืนเกียกดิ้น สนานทุ่งแม่นโท่งนา
ฝูงหมู่ปลาใหญ่น้อย หอยกุ้งได้วางไข่
ซุมยอดอ่อนกะป่งใบ เหมิดทั้งมวลหมู่ไม้
ฤดูไถหว่านกล้า เวียนเถิงมาอีกคราวนึง
คิดถึงนา คิดถึงบ้าน...นานแล้ว บ่ได้ยาม

ขอให่หลอน เอ้ย หลาน เอาะเยาะแอะแยะนำแนเด้อ...บ่ม่วนกะอย่าสิขิว ฮิๆ

[บ่าวเคน]

อ้ายศรีเพิ่นว่ายามได่กะม่วนพะนะ หากว่าเป็นแต่กี้กะแม่นอย่างความเลาว่า แต่ปํจจุบันโลกาได่แปรเปลี่ยน กบเขียดในไฮ่ในนา กะหายากขึ้น อุ้มไม้เคยกิน เคยเห็น กะแทบสิบ่มีแล้ว น้ำในนากะได่สูบดำเอาพีน้อง กบสิฮ้องในนากะบ่มี บ่แม่นมันสิสุดไปหน้าบ้ออีสานเฮา มาซ่อยกันรักษาไว้เด้อพี่น้องไทอิสานเฮาเอย ให้ลูกหลานภายหน้า จั่งบรรพบุรุษเพิ่นรักษาไว้ให้หมู่เฮา

[สาวเมืองกะสิน]

ดีใจเน๊าะที่หลายๆคนรู้ทันพิษภัยของสารเคมีที่ผลิตขึ้นมาเพื่อผลประโยชน์ทางการค้าของพวกนักธุรกิจหัวใสทั้งหลาย

ต่อไปกะมาร่วมมือร่วมใจกันใช้ของธรรมชาติรักษาธรรมชาติกันจ้า เริ่มจากตัวของเราเองนี่หล่ะเน๊าะ
ปลูกต้นไม้กะอย่าใช้ปุ๋ยเคมี หรือยาเคมีกันเด้อจ้า ถ้าฮู้ว่ามันตรายแล้วกะดาย
จากนั้นจังไปแนะนำพ่อแม่พี่น้องญาติมิตร ผู้ใกล้ชิดเฮาเน๊าะ เผิ่นจังสิเชื่อเฮา ซ่อยกันคนละไม้ละมือ
บ่ด่นเมืองไทยเฮากะสิกลับมาคือความอ้ายศรีว่านั่นหล่ะจ้า


ฟังเสียงฟ้าฮ้องตึ้งผู้สาวหนึ่งทางกะสิน
ได้ยินเสียงฝนพรำใจฮำฮอนคิดถึงบ้าน
ถึงยามนาน่าตกกล้าฟ้าฝนมาหล่นผ่าน
อกผู้สาวสะท้านอยากเมื่อบ้านไปเฮ็ดนา..นั่นแหล่ว

[บ่าวต้นฅนมุกดาหาร]

ว่าแม่นพ่อใหญ่สีมาเอิ้นไปดำนาส่อย อิๆ

[พลายแก้ว]

ยามดำนาเคยมีเจ้า คอยส่งเข้าอ้ายอยู่นา
ได้ปิ้งปลาหลดน้อย เจ้าหลอยกินแล้วเคิ่งตัว
เหลือแต่หัวมาให้พี่ กะดีใจบ่เคยว่า
เป็นตาฮักสำหรับอ้าย ไผสิเว้ากะบ่สน....

แต่งต่อไปบ่แล้ว ซ่อยแหน่ขอรับ...อาจารย์ศรี...

[ลานบุญ]

ไผว่าอิสานแล้งมาเด้อให้มาเมิ่ง มันบ้อแล้งเด้อจ้า เป็นตาอยากเมื่อบ้านคือหยังนิ แถมบ่อแล้งน้ำใจนำจ้า ไปพู่นกิปลามาพี้กินข้าวอิ่มนำกันสั่นตั๊วพี่น้องงงงงงงงงงงงงงงงงงอิสานบ้านเฮาแมะจ้า

[๛หนุ่มบ้านไกล๛]

ผมบ่มีความสามารถ แต่งผญา ภาษิตแบบอีสาน เพราะว่าที่บ้าน พูดภาษาไทยเขมร แต่ชอบอ่าน ชอบฟัง ฟังออกพูดได้

อ่านแล้วคิด ฮอดบ้าน คิดฮอดสมัยแล่นเล่นอยู่ถ่งนา

[ทิดจ่อย]

ซุมื้อนี้หาซาวนายากแฮงแล้วหละพี่น้อง....มีแต่ซาวหา ซาวหาหยังว่าติ...

ซาวหาเงินมาจ้าง ซาวหาลูกจ้าง....ซาวหาปุ๋ยเคมี...ซาวหายาฆ่าหญ้า....จ้างเขาแล้วเจ้าของกะนอน

เว็นอยู่เฮือน ..ตั้งแต่ก่อนผู้ข้าเคยเห็นแต่เฒ่าแก่อ้อยอยู่ชนบุรี เดี่ยวนี้มีแต่เฒ่าแก่นาเต็มบ้านเต็ม

เมืองอยู่..ออนซอนซาวนาสมัยใหม่คัก....