หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 20

หัวข้อ: สรงกรานต์บ้านเฮา

  1. #1
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,179

    สรงกรานต์บ้านเฮา

    ใกล้สิเถิงเดือนห้า เมษา ศุภมาส
    ศักราชเคลื่อนเข้า เนาตั้ง นั่งขาล
    ศุภวารเวียนพ้น อีกบ่ดน ปีใหม่
    ผู้ที่อยู่ทางไกล พากันเตรียมต่าวบ้าน สถานห้องแห่งภูมิ
    พากันซุมโสส่อ ไผเด้นอสิเป็นหมู่
    คนมีคู่กะไคดอก ได้เว้า จาเอิ้นบาดต่าวเมือ
    พอได้เฝือเฟือฝั่น จูงแขนกัน หิ้วของซ่อย
    มือจับกันเกี่ยวก้อย สำออยเอื้อน โอบแอว
    บางผ่องยกจอกแก้ว เสียงแซวแซว ฮ้องโห่
    บางผ่องโสผู้บ่าวน้อย หัวยุ้ม ผ่องอาย
    บางผ่องพายถงเป้ง กระเป๋าปูม แบกกระสอบ
    นั่งถ่าจอบรถเข่า โสเว้าอยู่สนี (สถานี)
    เทื่อหนึ่งปี เมือบ้าน สงกรานต์ไปยามแม่
    ซุมเถ่าแก่พี่น้อง ฉลองตั้ง แต่งบุญ
    เพื่อเป็นทุนเมือหน้า อนาคะตา ลับโลก พระว่านอ
    หายทุกข์โศกบ่อนเบื้อง บรรเทาบ้าง หากว่าไค
    ทำจิตใจขาวแจ้ง เพื่อเป็นแสง กุศลส่ง
    เจตประสงค์เป็นที่แล้ว แนวนั้นจั่งว่าดี ท่านเอ้ย


    ...............................OOO ...............................

    แล้วท่อนี้ ว่าสิซวนผู้สาวบ้าน เฮือนมหาเมือยามย่า โอ๊ะ! แม่
    กาละสินแท้แล้ ทางบ้าน บ่าวผู้ดี
    ดอกจานสี-กำลังย้อย เป็นพวง แดงจ่ายหว่าย นางเอ้ย
    ดอกคูนเหลืองซ้ายล้าย เต็มต้ายฮ่อมทาง
    ผักคันจางอยู่ฮิมห่วย ผักพีพวยอยู่นำฮ่อม
    คล้องกะปอมก่นแย้ ๆ ถือแส่ไปแหย่ฮู
    ลองไปดูเบิ่งเด้อหล่า อ้ายสิพาน้องไปแหย่
    ข้างคันแทกะได้ ขุดไง้ก่นกะปู
    หรืออยากบู๋ สิพาหม่น หนามเล็บแมวไปหาแหย่
    ถือไม้ส่าวแก่แด่ กะต่านำ คุพร้อม สิพาป้อมไข่มดแดง
    เถิงยามแลงพาไปส่อน หนองควายนอน หากุ้งป่น
    ส่อนบ่ดนกะได้ เต็มข่อง เคิ่งถัง
    แต่ระวังแต่ปลิงค้าว โตมันยาวได้คืบกว่า
    ปีก่อนมันเข่าหัว(หัวสิ่น) สาวทางบ้านไก่น้อย ปานสิม้อยหละแหม่งตาย
    เสียงวายวายเลาพือสิ่น เกือบแม่นวิน อ้ายหาซ่อย
    หืย..โตใหญ่ส่ำนิ้วก้อย เห็นแล้วข่อย จั๊กกะเดียม บรื๋ย


    มาเด้อผู้ใดสิเมือยามบ้านนำ คันย้าน บ่พาไปส่อนดอก ถือคุอยู่เทิงฝั่งกะได้ เหอ ๆ ๆ


    ต้าย : รั้ว,กำแพง / ผักคันจาง : ผักป่ามีหนามชนิดหนึ่ง มักเกิดตามริมห้วย รสฝาดมัน บางทีเรียกหนามคันจาง / ผักพีพวย : แพงพวย / ปลิงค้าว : ปลิงพันธุ์ใหญ่
    แก้ไขครั้งสุดท้ายโดย ศรีสะท้าน; 04-04-2010 at 15:57.
    วรรณคดีล้ำลำนำเอื้อนเอ่ย เขยภาษาพากษ์เว้าลาวพื้นกล่าวไกล

  2. #2
    ร่วมถ่ายทอดความรู้สู่สังคม สัญลักษณ์ของ สาวเมืองกะสิน
    วันที่สมัคร
    Sep 2007
    กระทู้
    584
    หวัดดียามเซ่าเด้อใหญ่ศรีฯ ตื่นเซ่ามากะได่อ่านผญาม่วนๆโลดเน๊าะใหญ่
    โอ๊ยๆๆสะออนหลายจ้า ทางกะสินบ้านเฮา บ่อึดแนวอยู่แนวกินเน๊าะใหญ่ศรีฯเน๊าะ
    มาๆๆไผสิเมื่อบ้านเที่ยวสงกรานต์นำกัน


    ตื่นขึ้นมายามเซ่า เข้ามาอ่านเจอผญา
    ภาษาสำนวนล้วนม่วนหูเอาหลายฮ้าย
    เป็นผญาคำของอ้ายชายผู้ดีเมืองน้ำก่ำ
    เมืองกะสินฝ่ายก้ำงามล้ำวัฒนธรรม
    มา มาไปนำอ้าย ไปนำอ้ายบ่
    มา มาไปนำน้อง ไปนำน้องบ่
    บ่าวผู้หล่อ สาวผู้โก้ ไปโฮฮ้องม่วนเนา


    ให้ใหญ่ศรีฯ ซวนเอาผู้สาวไปเที่ยวทางเมืองกะสินเด้ออ้าย
    นางสิซวนเอาผู้บ่าวดอกไปเที่ยวบ้านนำน่ะ อิอิอิ แบบว่าบ่ทั่นมีคนขับรถให้อยู่นั่นหนา รถติด คนกะหลาย ค้านแหม อิอิอิ
    ไผ๋ขับรถให่ สิให้ไปนอนวัด กินปลาอยู่สาดอกเด้ออ้าย มา มาไปเที่ยวกะสินนำกัน อิอิอิ

    แก้ไขครั้งสุดท้ายโดย สาวเมืองกะสิน; 04-04-2010 at 07:05.

  3. #3
    ศิลปิน นักแต่งผญา สัญลักษณ์ของ พลายแก้ว
    วันที่สมัคร
    Dec 2008
    กระทู้
    630
    ฮ่าๆๆๆๆๆๆ สุดยอดครับอาจารย์ ศรีสะท้าน คักๆ ครับผม บ่าวบ่มีคำสิเว้า ขอมาหัวอย่างเดียว ฮ่าๆๆๆๆๆๆๆๆๆ ม่วนแฮง เอิ๊กๆๆๆๆ

  4. #4
    ร่วมถ่ายทอดความรู้สู่สังคม สัญลักษณ์ของ พิณอิสระ
    วันที่สมัคร
    Sep 2008
    ที่อยู่
    ขอนแก่น อุดรธานี และสุรินทร์
    กระทู้
    503
    คึดฮอดบ้านเด้อ้าย เฮ็ดจั่งใด๋สิได้ต่าว
    เวียกบ่ทันสุดส่าว แลงเช้าได้แต่คอย
    ลมแห้งพัดจ้อยๆ หน้าไหม้เทิงใจอุก
    ทุกข์บ่มีหว่างเซา เทิงพ่องเหงา..ใจเด้

  5. #5
    ศิลปิน นักแต่งผญา สัญลักษณ์ของ หญ้านาง
    วันที่สมัคร
    Jul 2009
    กระทู้
    619
    ฟัแล้วคึดฮอดบ้านเด้จ้า......... สิได้เมือบ้านบ่น้อ

  6. #6
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    5,708
    บล็อก
    23
    ฮ่าๆๆ หึยย นาเจ้าเป็นตาปลิงหลายแท่ะ บ่เป็นตาไปเที่ยวนำดอกซั่นน่ะไก่น้อยเฮา เปลี่ยนแผนท่อน หึยย.. จะแม่นหม่นเข้าไปทั่ว(ได้ใจอ้ายศรี)คัก ปลิงนาเพิ่นกะดาย .. ไปหาซอกปลิงพ้ออยู่หม่องได๋ล่ะอ้าย...โตสำนิ้วก้อย พะนะ ..
    มองต่าง..อย่างปลง

  7. #7
    ผู้ช่วยผู้ใหญ่บ้านมหา สัญลักษณ์ของ nuzing
    วันที่สมัคร
    May 2007
    ที่อยู่
    ตกฟากอยู่อุบล เป็นคนชราบางแคแล้ว
    กระทู้
    2,260
    บล็อก
    5
    กวีศรีบ้านมหาโตจริงมาแล้ว บ่มีหม่องติเลย เอาอีกๆ ธุจ้า
    โอ๊ยปลิงค่าวกะเจ้าชู้แถ้เนาะ เข่าตีนสิ่นไก่น้อย...เห็นเผิ่นแก้สิ่นแหล่นแถ้แล่ๆย่านปลิงหลาย เถ่าใหญ่ศรีเทิงหัวเทิงเบิ่ง...หล่าไก่จับปลิงวีฟาดหน้าผากแหน่เปี่ยง ฮ่าๆๆๆ
    แก้ไขครั้งสุดท้ายโดย nuzing; 04-04-2010 at 12:22.
    "ใจประสงค์สร้างกลางดงกะหว่าถ่ง ใจขี้คร้านกลางบ้านกะหว่าดง"

  8. #8
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,179
    สิพาเมือยามบ้าน สงกรานต์ จักหว่าง
    ออกเดินทางมื้ออื่นเซ้า เตรียมเต้า แต่งถง
    เก็บเอาเสื้อแอนส่ง ผ้าต่งผืนงาม
    กลับไปยามมารดา ซื้อแพรวาต้อน
    อุปกรณ์ของใซ้ เดินทางไกล เตรียมแต่ง
    หวีแว่นแยงเครื่องเอ้ กระแป๋งป้อง ใส่นำ
    ของกินหมกพกจ้ำ ปลาแดกห่อ ประดับดี
    ข้าวเหนียวสีสามกิโล ใส่โอ ผสมน้ำ
    หนึ่งสุกงามกระติบพร้อม อายหอมหอม เอามาส่าย
    เตรียมแต่งไว้หลายหลาย ฮ่าสวยมาแดดฮ้อน แฮงล้าแฮ่งสิหิว
    ..............................................
    วรรณคดีล้ำลำนำเอื้อนเอ่ย เขยภาษาพากษ์เว้าลาวพื้นกล่าวไกล

  9. #9
    สมาชิกที่ยังไม่ยืนยันอีเมล์
    วันที่สมัคร
    May 2009
    กระทู้
    105
    โอ้ยม่วนหลายจ้า.....................

  10. #10
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    5,708
    บล็อก
    23
    ฮ่าๆๆ ฟ่าวสำได๋กะบ่ลืมน้อของเอ้ กระแป๋งป้อง โอ้ะ กระป๋องแป้งเพิ่นกะดาย..
    มองต่าง..อย่างปลง

หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •