............คิดฮอดเจ้าคือเก้าเด้อ...............

[บ่าวโจ่โล่]

สิเดินทางร้อยโค้ง กะบ่โล่งหัวใจ
สิไปไสมาไส กะคิดจำแต่นำเจ้า
พออยากมีความเว้า อยากถามเจ้าเบิ่งจักหน่อย
แม่นเคยนั่งใจลอย แม่นได้คอยคิดค้ำ นำอ้ายแน่บ่นาง
หรือส่ำคุตกส่าง แล้วโลดนาง บ่คิดฮ่ำ
บ่คิดพ้อจักคำ บ่คิดนำบักอ้าย ทางนี้แน่บ่น้อ
โตคือคิดอ้อล้อ นำเจ้าทุกบาทย่าง....แท้เด้
คือบ่เพแตกม้าง ลืมเจ้าแน่จักคราว
อยากบอกสาว เด้อใจนี้ บอกจักที ให้ฮู้แน่
ว่าฮักนางแท้ ๆ บ่มีมื้อ สิลบเลือ แท้แหลว
.......................................................................

[ไก่น้อย]

พอได้ยินคำอ้าง พญานางละใจอ่อน ...อ้ายโจ่โล่เอ้ย
พออยากหยับไปต้อน เอาชายนี้เป็นอยู่เฮือน
....เป็นจั่งได่น่อทางก้ำ เมืองอุบลหม่องคนส่า
ความเพิ่นว่าทางพุ้น บ่อึดข้าว ปลาแฮงหลาย
นางอยากหยับย่างย่าย ไปเมิงนำ สิได่บ่
หรือว่าทางโตอ้ายบ่อึดแท่ แม่น ..ผู้สาว น่ออ้ายเอ้ยย..

[บ่าวโจ่โล่]

เป็นจั่งได๋น้อ ไก่น้อยเอ๊ย มะคือจั่งเว้าผิดเว้าถูกหล่ะ เว้านำกันบ่ต้องประหม่าปานนั้นดอก

พอฟังความเพิ่นเว้า อยากใด้เฮาไปซ้อนบ่อน (ว่าซั่นบ้อ)
เพิ่นอยากหยับมาต้อน มาซอนอ้ายไปอยู่เฮือน
ดาวและเดือนอยู่ทางบ้าน เมืองอุบลฯ กะคือเก่า
แนวสิต่างกะคือเฮา อยากได้ข้าวได้น้ำ กาฬสินพุ้นไปเฮ็ดแนว
คันมีใจต่อกันแล้ว สิได้แว่เวียนหา ย่านแต่วาสนา ไปบ่เถิงทางเจ้า
ย่านมาทิ่มความเว้า พอให้เฮาได้คิดต่อ
ส่ำข้าวดอขาดน้ำ ฝนสิซ้ำกะบ่มี ซั่นแหลว

[ไก่น้อย]

ฮ่าๆๆๆ อ้ายเอ่ย...แนวคนเว่าบ่เป็นผั่นอยากเว่านั่นนา ผิดพลาดประกาได่กะบอกโลดเด้อคะ

[บ่าวโจ่โล่]

บ่ได้ว่าหยังดอก คันอยากเว้ากะเว้าโลดหล่ะเนาะ ไผสิว่าหยัง ผิดเป็นครู คันว่าผิดดู๋ ๆ กะสิเป็นอาจารย์ใหญ่ หั่นตั๊วเนาะ

[ไก่น้อย]

โอ่น่ออ้ายเอ้ย ...พอได่ฟังผญาอ้าย โตพี่ชายมาเว่าม่วน....(.แทะน่อ)
พออยากชวนเอาอ้ายไว่ เอาไปให้อิแม่แหงง (พุ้นแหล่ว )
..ย่านแต่วาสนานางน่อย ผลาพลอย บ่ได้ฮ่วม
ย่านแต่สวนหมากมี่ เพิ่นมีแล้ว ผูอยู่เคียง
...นางกะเพียงอยากจาเว่า อยากถามข่าว ผู่มาไกล
เป็นจั่งได๋น่อชาย มีละบ๋อ หละเมียซ้อน
คั่นบ่มี นางสิต้อน หยับสวนหม่อน มาซ้อนสวนหมี่
นางสิหยับ ห่มหมากมี่ มาใกล้หม่บักขาม ....สา ละ ล่า อ้ายโจ่โล่เอ้ย ....(อะป้าดดด ไก่น้อยคือคักแทะ )

[ศรีสะท้าน]

บู๊ยยยย...ไก่ ไปคัดลอกมาแต่ข่างโบสถ์บ้านได๋มาเว้า นอบาดนี้ อิ อิ อิ ..

[ไก่น้อย]

หาว่าหลาย ออกมาจากหัวสมองอันชาญฉลาดนิละอ้ายเอ้ย ...เทื่อสิเว่าได่คิดมาตั้งแต่5โมงแลง 555+ ( กินข้าวแลงละติ )

[ศรีสะท้าน]

หล่านางเอ้ยย อ้ายหากกินเข่าแล้ว จังมาแซวน้องนุ่ง บ่อได้หวังมุ่งฮ้ายติเตียนเจ้าแต่อย่างได๋
คำปากได้ เพียงแต่เป็นคำกลอน บทออนซอนกลอนผญา ว่าไปตามบั้น
คันแนวได๋ผิดข่อขอกูณาผายโผด แหน่เด๋อ ขอยกโทษให่แก่อ้าย ภายพี้ผู้กล่าวกลอน นั้นแหลววววว...

[บ่าวโจ่โล่]

ซ่างมาเป็นผลาอ้าย ส่ำเดือนหงายฉายทางส่อง
แสงเดือนเพ็ญจากน้อง ส่องทางอ้ายได้ย่างนำ
ซ่ำชีวิตฮ่าง ๆ บ่มีไผมาซ้อนบ่อน (แท้แหลว)
ซ่ำว่ามอนขาดโตหม้อน บ่มีมื้อได้เฮ็ดไหม
คันมีใจอีหลีนั้น สิพาเมือไปยามย่า
ไปกินปลาบ้านอ้าย พาไปไหว้เอาปู่นำ....เอาจั่งสั้นเนาะ