อาทิตย์ที่แล้วเมือบ้าน ลุงกับป้าจ้างคนดำนา เลยซื้อเป็ดมาสามโต มื้อสุดท้ายกะเลยเลี้ยงเข่าซุมมาดำนาด้วยลาบเป็ดสองโต อีกโตกะเลยพากันลาบกินเข่าเซ่ายูบ้าน มาครับมากินลาบเป็ด สูตรโสกทรายนำกานนนนน
ว่าแล้วลุงกะจัดการคัวเป็ดแยกเนื้อแยกกระดูกออก เลาเก่งยูเรืองแบบนี่คล่องถนัด
ส่วนผมกะเป็นลูกมือ จัดการกับแนวมักก่อน ทุกเทือที่ลาบเป็ด "หัวทาบี"แนวมักขาดบ่ได่
กะจัดการเอาบีทาหัวเป็ด ก้นเป็ด แล้วเอาเกลือโฮยๆเทิงสองข่างย่างไฟถ่าน
ส่วนกระดูกเป็ดที่หลังจากเอาเนื้อเป็ดทีสิลาบออกเหมิดแล้ว (ธรรมดากะต้มซดน้ำ)กะสับเป็นต่อน ตำกระเทียมพริกไท น้ำมันหอย ผงนัว(ชูรส)ซาวๆให่เข่าเครือง แล้วกะทอดให่กรอบๆ
เป็นกับเข่ากะได่ เป็นกับแกล้มกะดี(สำหรับคนมักแฮ่นกระดูก)....:b-b
เนื้อเป็ดกะฟัก(สับ)บ่ต้องแหลกหลาย หนังเป็ด กึ๋นเป็ด ตับเป็ดกะซอยเอา(ทัวไปกะต้มเอาจังค่อยเอามาซอย)
๑.หนังเป็ดที่ซอยแล้วเอามาคั่วก่อนหมู่คั่วแบบแฮ่งๆ เพราะหนังเป็ดมันมีน้ำมันในโตยูแล้ว
๒.เนื้อเป็ด กึ๋นเป็ด ใส่น้ำปลา เกลือ บีบบักนาวจักสองสามเปี่ยง คั้นให่เข่าเครืองหมักไว่จักคราว(ธรรมดาเนื้อเป็ดสิเอาเกลือใส่ บีบบักนาวคั้นๆๆ แล้วปั้นเอาน้ำจากเนื้อเป็ดออก แล้วจังมาคั่ว หรือ สิเอาใบตองกล้วยมาห่อแล้วกะปิ้งเอา สูตรนี่กะหอม)
๓.ก๋าว่าหนังเป็ดสุกแล้วกะเทเนื้อเป็ดกับกึ๋นลงไปคั่วนำกันต่อ ส่วนตับใส่ทีหลังหมู่ เพราะว่าตับมันสุกง่ายยูแล้ว แล้วยกลงจากเตารอให่มันเย็นๆลงจักหน่อย จังค่อยปรุงเครืองใส่พริกเข่าคั่ว ขาดหยังกะเพิ่มเติมลงไป ซีมแล้วเห็นว่าแซบถึกปากกะพอ
ขั่นสุดท้ายกะจั่งใส่ผักหอมซอยสะระแหน่ หอมเป หอมหัวแดงนำกะได่ แล้วตักใส่จานพร้อมเสริฟ
เก็บใบบักกรูดยูเฮือนไทพี่น้องหน่าบ้านนี่หละ เห็นมีใบบักมี้(ขนุน)ยูข่างๆกันพอดี กะเลยเอามาทอดนำกัน
มาครับมาเทือนี่หิวแล้ว มากินลาบเป็ดเข่าเซ่า(งายตาเหลือก)นำกัน
อย่าว่าแต่ลาบเป็ดแซบ กระดูกเป็ดทอดกรอบกะแซบบบบพี่น้อง.....:b-b :b-b :*-
ขอขอบคุณพื้นทีแบ่งปันจาก "บ้านมหาดอทคอม"และพี่น้องทุกๆคนที่เข่ามาซีมลาบเป็ดนำกัน...:*-
Bookmarks