หมกส้มไข่ปลา(สูตรนู๋น้อย)

[นู๋น้อย]

ธุจ้า สบายดีจ้า พ่อแม่พี่น้อง ชาวบ้านมหาที่คิดฮอดทุกๆท่านจ้า หายหน้าไปดนเติบจากบอร์ดอาหารการกิน(แนวถนัด)
เนื่องจากว่าช่วงนี้หน้าฝน แนวอยากแนวกินกะหลายงานกะหลายพอปานกัน(รับจ้างดำนาและหลกกล้า)
เวียกงานหลายจ้าพี่น้องบ่ได้ไปงมแมงดากับส่อนฮวกขายแต่อย่างใด

มื้อนี้มาด้วยความคิดฮอดคิดถึง ได้กินแนวแซบกะเลยเก็บภาพเอามาฝากต้อนพี่น้องคือเก่าจ้า

ทุกมื้อแลงวันพุธและวันเสาร์ บ่ว่าจะทุกข์ยากฮ้ายหรืองานหลายกะตามส่าง
เลิกงานแล้วกะต้องแวะลงตลาดหาแนวกินอิสานบ้านเฮาติดมือเมือเฮ็ดกินนำ

มื้อนี้ไปเห็นกบน้อยพอดีต้ม ถุงละ 50 บาท นับโตแล้วได้บ่พอสิบโตบ่คุ้มก็เลยเอาไว้ก่อน

ของกินเต็มร้านวางไว้อย่างหลากหลาย ช่วงหน้าฝนแนวกินบ้านเฮาจะหลายแต่ปลาเป็นส่วนมาก
ทั้งปลาสด และปลาเอียบเกลือพร้อมนึ่ง และปลาส้ม แล้วก็ส้มไข่ปลา แมงดา เห็ดเผิ่งกะมี หน่อไม้สดๆ ฯลฯ

คิดไปคิดมา กินส้มไข่ปลานี้ละ บ่ได้กินดน ซงจิแซบ ซื้อส้มไข่ปลามาถุง1 ถุงละ 10 บาทกับผักกำหนึ่งพอแล้ว...

ส้มไข่ปลาพร้อมเครื่องเคียง



หย่างไปอีกร้านตาเหลียวเห็นมีดอกกระเจียวจูมๆ ถามยายคนขายว่ากำท่อใด๋ จ้า 10 นางเก็บมาใหม่ๆเลย พะนะ ได้มาอีก 2 กำ





หลังจากล้างดอกกระเจียวแล้วกะ เอาลงหม้อ ลวกไว้ก่อนเลย



หันมาหาส้มไข่ปลา

วิธีปรุงกะบ่มีหยังหลาย บ่ต้องปรุงเพิ่ม แต่ใส่หอมกับผักลงไป เพิ่มความเผ็ดด้วยบักพริกสด






แล้วก็ห่อด้วยใบตอง



แบบสำเร็จ



จากนั้นเอาลงหม้อต้ม สูตรแม่พาเฮ็ด เร็วดี ทันใจ เพราะว่าหิว...15 นาทีผ่านไป หมกส้มไข่ปลาสุกแล้ว









พร้อมแซบ กับข้าวเหนียวฮ้อนๆ เข้ากันได้ดี ส้มๆเผ็ดๆเค็มๆ





:b-b สำหรับแลงนี้ พ้อกันใหม่เทื่อหน้า กับเมนูแซบๆตามสไตล์คนไกลถิ่น ลาไปด้วยศิลปะในห้องครัวพอเอาะเจ๊าะ สวัสดี...จ้า