ฮีต 12 เดือน

[ข้าวต้มมัด]

ฮีต 12 ครองเค้า บุญเก่าประเพณี
วัฒนธรรมงามดี ศรีอีสานเมืองบ้าน
ข้าวต้มมัดขอกล่าวต้าน ต้นตำนานมีหยังแน่
ตั้งแต่พ่อแม่เค้า เพิ่นเคยเว้าขอแต่งตาม
ถึงเดือนอ้ายกายย่าง กายาเย็นหนาวเหน็บหน่วง
ปวงพระสงฆ์สังโฆเจ้า เอาบุญนี้เอิ้นเข้ากรรม
มวลหมู่สงฆ์ทำบุญสร้าง ตั้งจิตใจจนแซ่มชื่น
วันและคืนฝืนได้ ให้ผ่านพ้นกิเลสตัฌหา
เดือนยี่เป็นบุญกล้า เฮ็ดยุนาบุญข้าวคูนลาน
สุขสำราญอีสานเฮา รำลึกถึงคุณข้าวน้ำ
แม่โภสพหัวยิ้มย้าม ตามคนเฮ็ดบุญต่อ
ปีใหม่ขอพรให้สุขล้น บ่ขัดสนได้อยู่กิน
เดือนสามตามมากิน ข้าวใหม่ใช้มาจี่
เอิ้นไตรมาตรสามตามทุกปี บุญข้าวจี่มีแน่นอน
เดือนสี่แห่พระเวสน์สันดร ฟังเทศน์กลอน มหาชาติชาดก
บ่ให้ตก 13 กัณฑ์ ขึ้นสวรรค์ยุเทิงฟ้า
เดือนห้ามาพาสาดน้ำ ตรุษมหาสงกรานต์ เอิ้นบุญใหญ่
สาดสง(ทรง)ไทย รดน้ำพระพุทธเจ้า เข้ากราบผู้มีคุณ
เดือนหกตกกฤกษ์ลุ้น บุญเบิกฟ้าพญาแถน
ร่วมแห่แหนบุญบั้งไฟ ส่าส่งไกลถึงเมืองฟ้า
เป็นบุญตางามโก้ เมืองยศโส(ยโสธร) ตำนานผาแดงนางไอ่
โฮ่...ออกไปไหง่ง่อง มวลพี่น้องสุขสำราญ
เดือนเจ็ดสำเร็จสร้าง ชำระล้างเสนียดและจัญไร
เดือนแปดขีดเขียนไว้ เพิ่นพาไปพบเทียนแห่
แกะสลักเสลาเก่างามโก้ พุทโธเจ้าเข้าศึกษา
ศิลปะงามบาดตา เกินพรรณา เทียนพรรษาอุบล (จ.อุบลราชธานี) พุ้น
เดือนเก้าเป็นเดือน บุญข้าวประดับดิน ร่วมกินทานหาพ่อแม่
หยาดน้ำแน่แผ่เมตตา แด่บิดรมารดาผู้วายชน
เดือนสิบคนเอิ้นบุญข้าวสาก เฮ็ดบุญฝากถึงน้องพี่
ให้แก่ผีบ่มีญาติ ผู้ฉลาดฮ่วมรักษา
เดือนสิบเอ็ด ออกพรรษาลาพระเจ้า เข้าแห่เวียนเทียน
ประทีปโคมเวียนเจดีย์ มีสุขขีสว่างล้น
เดือนสิบสองวนกฐินสร้าง มหาทานเอาบุญใหญ่
เปลี่ยนผัสส์ใหม่ผืนผ้า พร้อมบูชาแด่พระสงฆ์
ให้ดำรงค์คงสืบไว้ ประเพณีไทยเด้อน้องพี่
ฮีต 12 เดือนประเพณี วัฒนธรรมล้ำค่า รักษาไว้ให้ฮูงเฮือง นั้นแหล่ว

[จ่ายงค์ อุดร]

ครับเป็นสิ่งล้ำค่าที่ต้องรักษาไว้ สู่มื้อนี่กะบ่ฮู้ว่าเยาวชนรุ่นหลังสิยังจำกันได้บ่
อันโตกระผมเองกะศึกษาอยู่ครับแต่ว่ามาเฮ็ดงานอยู่เมืองล่างโดนแล้ว
ฮีตเก่าๆกะลืมคือกัน ถือเป็นโชคดีย่างนึ่งครับที่ได้เป็นสมาชิกบ้านมหา
เลยได้ฮู้ว่าภูมิปัญญาเก่าของบรรพบุรุษเพิ่นเฮ็ดไว้จั่งได๋แน่
สู่มื้อนี่กะพยายามเก็บเงินอยู่ว่าสิกลับไปพัฒนาผืนดินของเฒ่าพ่อเพิ่นอยู่คือกัน
ขอบคุณหลายๆครับพี่ๆในบ้านมหาที่แบ่งปันสิ่งดีๆให้ฮู้ครับ

[ข้าวต้มมัด]

[COLOR="Blue"] จ่ายงค์ อุดร ดีใจค่ะที่ติดตามในนามคนอุดรคือกัน ข้าวต้มมัดสินำมาเสนอเรื่อยๆ แล้วแต่ความสะดวกนำค่ะ /COLOR]