ต้นกุ่ม ผักก่ามบ้านเฮา

[หนุ่มลาวสาวขะแมร์]

ผักก่ามบ้านเฮา สิฮุ้จักกันดีสู่คนเนาะครับ บ่เห็นพี่น้องนำมาลง ผมขอนำมาปลูกไว้ในสวนป่าบ้านมหาให้ได้เบิ่งกัน

ผักก่าม ทะงัน(ขะแมร์) เอิ้นคือกันอยู่ดอกเนาะครับ
ไทยเพิ่นว่า กุ่ม หรือ กุ่มน้ำ กุ่มบก
ฝรั่ง
Crateva magna DC
Crateva religiosa ham.
Crateva adansonii DC.subsp.trifoliata (Roxb.) Jacobs

เท่าที่ผมเห็นและได้ถ่ายรูปไว้มีอยู่สองอย่างครับ ซึ่งอาจสิมีหลายชนิดหลายพันธุ์กว่านี่กะได้







ช่วงเดือนอ้ายเดือนยี่ครับ หล่นใบเหลือแต่ก่างหรือหง่า







นี่เป็นผักก่าม ชนิดใบกว้าง ครับ เห็นหลายทางบ้านเฮาเนาะครับ เดือนห้าเดือนหก เบิดดอกแล้วป่งใบ
หง่าก่ามสิพ้อยหรือบ่หมั่น หักได้ง่าย ต้นนี่ข้างเฮือน ผ่านการหักเอาดอกเอายอดปีละเทือสองเทือ เหี้ยนเบิด




ต้นนี่ ผักก่ามใบแหลม อยู่ที่หม่องผมเฮ็ดงานครับ




หน่วยสุกแล้วหล่น เดือนกันยาทีผ่านมา หน่วยน้อยซำไข่ไก่ หน่วยใหญ่ซำไข่ห่าน หน่วยท่าวท่อไข่เป็ดครับ สีหม่นๆนั่นละ




เนื้อหรือนวน บายหยิบเบิ่ง หยาๆ คือทรายผสมปูนหรือคือบายขี่ม้อนนี่ละครับ กลิ่นกะบ่โสภาดอก เป็นตาเตะเข่าป่าหลายกว่า




เมล็ดหรือใน เป็นคือเห็นนี่ละครับ หลังล้างน้ำ ตากแดดแล้ว เบิ่งงามออกแนวศิลป์ ไผอยากได้กะมาเอาเด้อครับ
ผมกะเพิ่งเคยเห็นเทือแรก ที่ผ่านๆ มาเห็นหน่วยหล่นกะเตะกับเหยียบท่อนั่น




เบี้ยจากหน่วยนั่นละครับ งอกคาหน่วย ผมกะเลยลองเหน็บทิ่มไว้ นี่กะประมาณซาวกว่ามื้อ
ซงสิเกิดง่ายอยู่ครับ


ผิดถืกอั่นได่พี่น้องกะซอยกันเบิ่งเอา ผู้ได๋พ้อดอกงามๆ กะมาสู่กันเบิ่งเด้อครับ


ปัญหา : ทุกรูปผมตั้งค่าใน photoscape ความกว้าง 700 ท่อกันเบิด ออกมาคือเบิ่งยากๆ ซงนี่ละ
พี่น้องผู้ฮู้บอกผมแน่ครับ