ลาบเทาสูตรไทอำนาจเจริญ

[บ่าวทิพย์คนอำนาจเจริญ]

เบิ่งวันทิตย์ที่ผ่านมาป้าลงมายามลูกชายเลายุตรอกจันทร์ เผิ่นแวะมาพระราม2เอาเทามาฝากบ่าวนำครับเทาแท้ๆจากอำนาจเจริญ:l-

ไปซอกเครื่องลาบเทาในตู้เย็นครับ มีครบยุครับ บักเขือขื่น ข่า ตะไคร้ บักถั่ว หละกะกบกะปลาอย่างละโตพอได้ต้มป่นใส่ลาบเทา

จัดการสับเทาหยาบๆครับ อย่าใส่หมุ่นหลาย ซอยข่า ตะไคร้ บักเขือขื่นครับ บักถั่วกะซอยเฉียงๆบางใส่หม้อไว้ เสร็จแล้วกะจัดการเฮ็ดป่นครับ เฮ็ดคือป่นกินกับข้าวนี้หละครับปรุงให้นัว แต่หว่าใส่น้ำต้มปลาแดกหลายจักหน่อย จนเหลียวเห็นขางเถียงพู้นหละ ลาบเทามันต้องซด น้ำต้องหลายจักหน่อย

เททั้งเบิดรวมกันครับหละกะคนให้เข้ากัน ชิมเบิ่งอีกเถื่อครับขาดหยังกะเติมเอา แล้วละครับ มาๆ กินข้าวกับลาบเทานำกันครับ

แนวคนกำพร้าเมีย กินข้าวกับลูกเทวดานี้หละครับ มื้อนี้ลูกชายมายาม(มาขอเงินพ่อใช้นำ)

ขอบคุณเวบบ้านมหาดอทคอมครับ สำหรับพื้นที่ในการแบ่งปันสิ่งดีๆ:*-

[คนภูหลวง]

เห็นแล้วน้ำลายแตกบ่ได้กินมาหลายปีแล้ว

[ณัฐ ภูไท]

เห็นแล้วกะคึดอยากซดนำเนาะลาบเทานานแล้วบ่ได้กินคันได้หัวหอยใส่เพิ่มอีกแฮงสิคักเนาะน่ากินครับ

[หนุ่ย..บ่าววีโก้]

หากินยากครับลาบเทา..เมนูนี้เเซบหลายบ่อใด้กินโดนเเล้วครับ

[lungyai1123]

ตาแซบคักยุดอกเน๊าะไปอยู่ทางตะเวนออกแล่วบ่ได้กินจักเทื่อ

[เขมราฐ]

ของมักคัก ๆ เด้อค่ะอ้ายทิพย์ ลาบเทาไส่ป่นกบ ไส่หมากลิ้นไม้ย่าง หรือหมากแข้งขม สุดยอด..........

[suny]

อิจฉาบ่าวทิพย์เด้ครับ ได้กินลาบเทา ผมบ่ได้กินดนแล้วตั้งแต่ออกจากบ้านมาทำงาน ยามกลับบ้านกะบ่แม่นหน้ามันกะบ่ได้กินจักเทือ ลาบเทาใส่ป่นกบ ป่นปูแซบคัก

[กระทิงแดง]

อยากกินแท้ๆปานไดสิได้กินลาบเทาน้อ

[เซียงโหลศรีสะเกษ]

โอ๊ยอยากหลายคับบ่ได้กินมาโดน

[ป๋าหำ คำพิโล๊ะ]

ซู่มื่อนี่ ของที่เกิดตามทำมะชาด ตามไห่นา หากินญากหลาย เพาะว่ามันมีแต่สานพิด ขนาดเห็นละโหกและเห็ดเผาะ กินยังเบื่อ หากสิกินก็ต้องพิจาละนา ม่องที่หาได่มาก่อนเด้อ