เป็นอีกเมนูนึงครับ ที่ได้กินตอนกลับบ้านหว่างหั่น ดีใจขนาดวาแมนสิหากินบ่ได้แล้ว ย่อนว่าหนูยามนี้แถวบ้านค่อนข้างสิหายากเติบแล้ว
ระหว่างที่ผมกำลังเฮ็ดอ่อมเอี่ยนยุนั่น เสี่ยวเถ่าพ่อเพินไปยามบ้วงมา ได้มาสองโตเลยถือมาฝากบักหำวาซั่น
เสี่ยวเถ่าพอเพินหลกขนให้ครับ
หลกขนแล้วๆ กะลนไฟเผาขนบั่วมันออก แล้วกะคัวเอาพุงมันออก ล้างดีๆแล้วกะสับเป็นต่อนพอดีคำ
ตอนแรกว่าสิอ่อมใส่ข้าวงาย แต่แนวกินมีหลายแล้ว เลยได้เอามาเฮ้ดใส่ข้าวแลง ....
ตัดภาพมาตอนค่ำเลยเนาะครับ แม่ออกเพินส่ายข้าว หนึ่งแล้วใหม่ๆหอมฮวยๆ
หันมาหาอ่อมหนูครับ สับแล้วๆเอาใส่หม้อ ตำเครื่องใส่ครับ พริกแห้ง หอมแดง กระเทียม หัวซิงไค ใบบักกรูดกับเลือหน่อยนึง แล้วๆกะตักใส่หม้อ ปรุงรสด้วยน้ำปลา ซูรส น้ำปลาแดกนำหน่อยนึง แล้วยกขึ้นตั้งไฟเลยครับ ขั่วแห้งๆสกก่อน ยังบ่ต้องใส่น้ำ
ขั่วไปจักคราว พอหนูสุกแล้วจั่งหยอดน้ำลงไป บ่ต้องใส่หลายเด้อครับ มันสิเป็นแกงหนูเด้
รอให้น้ำเดือด กะใส่ผักลงไป มื่อนี่ผมอ่อมลาวบ้านเฮา ผักที่ใส่กะมี ผักซีลาว ผักโหระพา และต้นหอม
พอผักสุก กะซิมเบิ่ง ขาดหยังกะเติมเอา แซบแล้วกะตักใส่ถ้วยหาพาข้าวออกสู่กันกินเลยครับ
แนวกินตื่มกะได้ตำแจ่ว กับลาบกระแต ที่ข้างบ้านเพินเอามาสู่ ... มาครับ กินข้าวแลงนำกัน
เล็กๆน้อยๆจากทีมงาน ขอบคุณบ้านมหาสำหรับพื้นที่นำเสนอ ครับผม
Bookmarks