เดินสายไหว้พระ แลกเปลียนวัฒธรรม

[ทิดจ่อย]

เป็นครั้งที่สองในชิวิตที่ได้มีโอกาสเดินทางไปท่องเที่ยวไหว้พระ ร่วมแลกเปลี่ยนเรียนรู้
วัฒนธรรมกับพี่น้องใกล้เคียง เพื่อเตรียมความพร้อมเข้าสู่ประชาคมอาเซี่ยน
ไปกะไปได้บ่อไกลดอกครับพี่น้อง เพราะภาษาปะกิตผู้ข้าแย่เหลือเกิน
ได้แต่ ฮัลโหล กับ โอเค อิ อิ อิ กะเลยได้ไปฮอดแค่ประเทศลาว ย้อนเว้ากันฮู้เรื่อง
บ่อต้องแปล

ออกจากบ้านเวลาประมาณสามทุ่มพร้อมกับทีมงาน ขับรถไปเรื่อยๆ หลับแหน่ตื่นแหน่
ไปฮอดแจ้งยุหนองคาย เป้าหมายกะคือสิไปข้ามโขงยุสะพานมิตรภาพไทย-ลาว
แห่งที่ 1 หลังจากได้พักอาบน้ำเปลี่ยนเสื้อผ้า กินข้าวงายแล้ว กะไปกราบไหว้ขอพรจาก
หลวงพ่อพระใส ที่พี่น้องทางหนองคายและพี่น้องชาวพุทธทางภาคอีสานเคารพบูชา
หลังจากนั้นแล้วกะเข้าไปไหว้พระในโบสถ์ชมความงามของภาพจิตรกรรมฝาผนังที่สวยงาม







หลังจากนั้นกะเดินทางข้ามฟากไปฝั่งลาว โดยใช้สะพานมติรภาพไทยลาว แห่งที่ 1



ดำเนินการเกี่ยวกับเอกสารที่จุดผ่านแดนช่องขาเข้า (หลังจากปี 2558 เป็นต้นไปกะคงสิบ่อมีหยังยุ่งยากแล้ว)



นี้กะเป็นวงเวียนธาตุหลวง เป็นการจัดสวนและปฏิมากรรมที่สวยงามลงโตอีกแห่งหนึ่ง



ไปฮอดกะเที่ยงพอดี กินข้าวเที่ยงอยู่ร้านอาหารคนไทยเฮานี้หล่ะ จั่งได้ไปไหว้พระ
จุดแรกอยู่ฝั่งลาวกะคือไปที่ประตูชัย ซึ่งตำนานกะเป็นที่เก็บกระดูกของทหารฝรั่งเศษ
ต่อมาลาวเป็นเอกราชกะเลยเป็นประตูชัยของลาว ก่อนที่ทหารสิไปออกรบกะมาลอด
ประตูนี้ แล้วได้รับชัยชนะ เผิ่นกะเลยเอิ้นประตูชัย



หลังจากหั่นกะไปไหว้พระธาตุหลวง ซึ่งเผิ่นบอกว่าบรรจุพระบรมสารีริกธาตุส่วนหัวเหน่า
ของพระพุทธเจ้า (บ่อฮู้ว่าภาษาบาลีเผิ่นเอิ้นว่าหยัง) ที่เห็นยืนอยู่เห็นแต่เสื้อเขียวๆ นั้น
บ่อแม่นตอไม้เดอ คน คน ตากแดดหลายกะเลยแหล่ (ที่แท้แหล่มาแต่เกิด อิ อิ)





ฮอดค่ำประมาณ 16.00 น. กะเข้าที่พัก



พักผ่อนอาบน้ำเปลี่ยนเสื้อผ้าแล้ว พี่น้องทางนั้นเผิ่นกะทำพีธีบายศรีสู่ขวัญให้
ซึ่งเป็นธรรมเนียมถือปฏิบัติของเผิ่นเมื่อแขกบ้านแขกเมืองมาเยี่ยม
(ที่จริงกะบ่อแม่นแขกดอก กะลาวนำกันนี้หล่ะ)



หลังจากนั้นกะหาข้าวน้ำท่ามปลาสู่กันกินซั่นแหล่ว อาหารบ่อท่อได๋ ได้กินดุอยู่
เห็นอั่นนี้ว่าแต่สิบ่อเมา กะดึกเอาซั่นแหล่ว หัวสักคือกัน 555



ในขณะที่รับประทานอาหาร กะมีน้องๆ จากวิทยาลัยนาฏศิลป์ลาวเผิ่นมาฟ้อนรำ แสดงชุด
ชนเผ่าให้เบิ่งเป็นการแลกเปลี่ยนวัฒนธรรมกัน (ส่วนภาษาบ่อต้องมีการแลกเปลี่ยน)
สลับกับการร้องเพลง นักร้องเผิ่นกะแต่งโตตามวัฒธรรม เสียงกะดี









หลักจากอิ่มหนำสำราญ เว้าคุยแลกเปลี่ยนถามสรทุกข์สุกดิบกันแล้ว กะเข้าที่พักหลับนอน เพื่อสิตื่นขึ้น แล้วเดินทางไปไหว้พระต่ออีก

[pcalibration]

ได้ไปต่างประเทศแล้วตั๊วหนิแหม..ทิดจ่อย
จีบผู่สาวทางฝั่งลาวมานำจักคนบ่น้อ..5555

[pui.lab]

ประเทศลาวขนานแท้ ประเพณี ขนบธรรมเนียม กับการการแแสดง ต้อนรับผู้มาเยือน

[นู๋น้อย]

ตอไม้ พะนะ ส่างเว้าแท้ อ้าย 5555555 อะแฮ้ม เบยลาว กินแล้ว มาวววคือเบียร์ไทย บ่อ้าย :b-b:b-b มักสาวลาวเนาะมีตะ ผุงามๆ

[ทิดจ่อย]

หลังจากตื่นตอนเซ้า ทำภารกิจส่วนตัวไผมันเรียบร้อย กินข้าวกินปลาแล้วกะออกเดินทาง
ไปหว้พระต่อ จุดแรกของมื้อใหม่ไปที่วัดพระแก้วมรกต


แล้วกะไปไหว้พระที่วัดศรีเมือง



ห้องด้านในกะสิเป็นเจ้าแม่หลักเมือง พี่น้องทางลาวเผิ่นว่าการขอพรเจ้าแม่หลักเมือง
ขอได้ประสบความสำเร็จทุกอย่าง ยกเว้นเรื่องความฮัก ขอบ่อได้ เผิ่นว่าซ้าน



หลังจากหั่นกะไปเบิ่งศูนย์สมุนไพรของรัฐบาลลาว ได้รับการสนับสนุนจากจีน
ทั้งในเรื่องของสมุนไพร ผลิตภัณฑ์สมุนไพร และกะบุคลากร คือมีหมอจากจีน
มาประจำอยู่ในศูนย์แห่งนี้ ด้านในเผิ่นห้ามถ่ายฮูป กะเลยบ่อมีฮูปให้เบิ่งครับ


ฮอดเที่ยงพอดี กะต้องกินข้าวเป็นธรรมดา(ปานหนังไทย) ร้านอาหารที่กินข้าวมื้อสุดท้าย
อยู่ฝั่งลาว เป็นร้านอาหารริมแม่น้ำของ


แนมออกทางหน้าต่างกะสิเห็นฝั่งไทยอยู่ตรงข้าม



อิ่มหนำสำราญแล้วกะเดินทางกลับบ้าน (ช่องทางจุดผ่านแดนขาออก)


ข้ามสะพานมิตรภาพไทย-ลาว หม่องเก่า


ข้ามมาฝั่งไทยกะมาเลาะหม่องสุดท้าย คือตลาดผ้าไหม หรือผ้าไทยที่ใหญ่ที่สุด
(หรือบ่อกะบ่อจัก) ที่อุดรธานี ผู้ลังคนว่าหาแนวกันบูดเมือบ้านนำ



กว่าสิฮอดบ้านกะเป็นเวลา 24.00 น. พอดี กลับถึงบ้านโดยสวัสดิภาพ ด้วยความเหน็ดเหนื่อย
ตื่นเอาประมาณ 07.00 น. ของมื้อใหม่พร้อมกับเสียงจ่มของผุลางคน แต่กะบ่อเคยเถียง บ่อเคยสอด อิ อิ อิ บ่อแม่นย้าน แต่ให้เกียรติ

[นู๋น้อย]

เถียงติละ 5555555

ธุจ้า ไปหลายหม่อง ตาอิดสา เด้ อนุโมทนาสาธุ นำจ้าอ้ายกะผู้ติดตาม ที่มีโอกาสได้ไปเห็นและกราบไหว้สิ่งมงคล ของบ้านเผิ่น :*-:*-