กิจกรรมช่วงกลับเมืองเลยตอนปีใหม่ ตอนที่ 1

**คนภูหลวง** · 18-01-2014, 04:13

ล้อหมุนออกจากบางปะกงตอนตีหนึ่งวันที่ 27 ธ.ค. 56 ไปแจ้งกับเพชรบูรณ์ แวะเที่ยววัดผาซ่อนแก้ว ที่เขาค้อก่อน เป็นตากล้องมือถือให้แม่บ้านกับลูกชาย

ฮอดเมืองเลยเที่ยง ก่อนอื่นฟ้าวแล่นไปเบิ่งความคืบหน้ากระท่อมน้อยทำใจหลังที่สองที่กำลังก่อสร้าง

ตกมายามแลงอากาศเย็นจ้อยๆ ห่างกองไฟบ่ได้พากันซักแห้งหลายมื้อเติบ

พี่เขยซื้อหนูไว้ถ่าอบเอาโลดค้านย่าง เดี๋ยวนี้แถวบ้านหายากแล้วไทบ้านเพิ่นเหมารถไปหาหล่มสัก บางเทื่อไปฮอด จ.น่าน ไปคืนหนึ่งมาขายได้หลายพันยุเพิ่นว่า

เช้า 29 เข้าไปหาเฒ่าพ่อเฒ่าแม่ ทางเข้าบ้านตอนเช้าหมอกหนาคัก

พี่เขยลาบเหนียวปลาอี่ตุ(ปลาแม่น้ำเลยคล้ายๆปลาไน)กับย่างหนู

นั่งซดต้มปลาอยู่ดีๆ น้ำต้มปลาเป็นวุ้นเฉยเลย คิดเบิ่งว่าหนาวซ่ำใด๋ ตอนไปเหยี่ยวต้องถือไม้ไปนำย้านเหยี่ยวเป็นน้ำแข็งสิได้เอาไม้เคาะออก

กินข้าวงายแล้วกะไปเยี่ยมสวนผักเฒ่าแม่ริมแม่น้ำเลย ต้องนั่งเรือโพมลังระเบิดข้ามแม่น้ำไป เบิดเวิ้งของผุเดียวปานนั้นแล้วบอกว่าแม่เฮ็ดพอแต่ได้ออกกำลังกายพะนะ อายุ 71 ปีแล้วยังแบกกล้องพ่นยาสบายแข็งแรงคักเฒ่าแม่บอกให้เซาเฮ็ดกะบ่ฟัง

ไปพ้อหมู่เฒ่าพ่อกำลังม้างปกเอาปลาน้ำเลยพอดี เพิ่นสิเอาดางเขียวมาปูไว้พื้นดินไต้น้ำแล้วกะเอาเฮอะไม้ไปลงทิ้งไว้ให้ปลาเข้ามาอยู่ ตอนเอาปลากะยกขอบดางเขียวขึ้นเอาเฮอะไม้ออกลากขึ้นมาเก็บปลาอยู่เทิงฝั่ง

ผลงานได้หลายเติบยุ

ไปขายผักตลาดนัดกับเฒ่าพ่อเฒ่าแม่ กว่าสิได้เงินแต่ละบาทมันช่างยากเหลือเกินเมื่อเทียบกับเฮามาทำงานใช้เงินมือเติบสุรุ่ยสุหร่าย เห็นแล้วกะเหลือโตนผู้เฒ่าแต่ก็เพราะความขยันประหยัดของท่านนี่แหละที่ส่งลูกทุกคนเรียนจบมีการมีงานดีๆทำ

คืนวันที่ 30 ไปกางเต้นท์นอนนาท่งใกล้บ้านกับหลานๆ

เวสป้าอาร์สยาม หลานขับมาจากลาซาล บางนา เลยพากันไปกางเต้นท์นอนเอาบรรยากาศ

ขอบคุณเว็บบ้านมหาที่ให้นำเสนอและขอบคุณพี่น้องบ้านมหาที่ติดตามผลงานครับ ไว้พ้อกันตอนที่ 2 มื้อเคาท์ดาวน์อยู่นา

**" แคน ชัยภูมิ "** · 18-01-2014, 07:07

บรรยากาศดีคักเนาะครับ.....แนวกินกะมีแต่แนวเป็นตาแซบ...:b-b:b-b:b-b

**lungyai1123** · 18-01-2014, 08:23

เห็นน้ำเลยกะคึดฮอดยามไปกู้ดางกับหมู่สมัยเรียนอยู่โรงเรียนช่างไม้เลย ฮ่าาาาาาาา
(โรงเรียนการช่างเลยในยุคหลังๆมา)มันนะอ๋าวหนาวอิหลีๆๆฮิ้ววว

**คนภูหลวง** · 18-01-2014, 19:00

แคน ชัยภูมิ: กลับไปบ้านเทื่อใด๋กะอบอุ่นนำพี่นำน้องหาตะแนวแซบๆมาต้อน
ลุงใหญ่: บ่คึดฮอดผุสาวเก่าติลุง มื้อหน้าช่วนบ่าวเล็กกับบ่าวธนามาบางปะกงเด้อสิให้ลูกน้องอ้ายพจน์ลาบเป็ดสู่กิน :b-b