กำลังแสดงผล 1 ถึง 9 จากทั้งหมด 9

หัวข้อ: แกงอิรอกใส่แมงจินูน ของฝากจากทางยโสธรครับ

  1. #1
    แบ่งปันความรู้และประสบการณ์ สัญลักษณ์ของ หยก ยโสธร
    วันที่สมัคร
    Jan 2013
    ที่อยู่
    ซ.ลาซาล บ้านเกิด อ.คำเขื่อนแก้ว
    กระทู้
    174

    แกงอิรอกใส่แมงจินูน ของฝากจากทางยโสธรครับ

    สวัสดีครับพี่น้องบ้านมหา อาทิตย์หลังวันแรงงานหว่างหั่นมีโอกาศได้เมือยามบ้านอีกเทือนึง เฒ่าแมเพินสิปูกระเบื้องเดิ่นตะลางเฮือน
    กะเลยลงไปเบิ่งไปแงงนำเพิน ตอนแรกตั้งเป้าว่าสิขึ้นดงไปไล่แย้พร้อม แต่ใช้เวลากับเวียกเฮือนเป็นส่วนหลายกะเลยพลาดครับ
    แต่กะมีแนวกินบ้านเฮาหลายอย่างที่เฒ่าแม่เพินหาไว้ถ่า ผมแบ่งไว้ลงมากินยุกรุงเทพนำ จั่งได้มีเมนูนี้ให้พี่น้องบ้านมหาเฮาได้เบิ่งกัน

    แกงอิรอกสูตรทางบ้านประยุกต์ไปได้หลายแนวครับ แกงแต่อิรอกซือๆกะได้ แกงใส่ไข่มดแดง-แม่เป้งกะได้
    แกงใส่แมงจินูนกะได้ แล้วแต่สิหาวัตถุดิบได้น้อครับ มื้อนี้ผมสิแกงใส่จินูน

    วัตถุดิบ-เครื่องปรุง
    อีรอก จินูน ย่านาง หัวซิงไค ยอดผักติ้ว หอมแดง พริกสด ผักอีตู่
    เกลือ น้ำปลา น้ำปลาแดก ผงนัว




    ขั้นแรกต้องเอาอิรอกมาปอกเปลือก หั่นเป็นท่อนประมาณ 2 นิ้วแล้วเอาไปต้มให้เปื่อย แล้วเทน้ำถิ่มครับ บ่ซั่นมันสิคันคอ (ในภาพแม่เพินต้มมาให้แล้ว)




    จินูนครับ แม่เพินแกะปีกแล่วแช่ช่องฟิชไว้ถ่า เลยบ่มีรูปโตเป็นๆให้เบิ่ง




    คั้นน้ำย่านางครับ เก็บมาจากบ้านเฮาพุ้นล่ะ แฮงคั้นได้ข้นท่อได๋แฮงแซบ






    เอาอิรอกที่ต้มแล้วลงในหม้อ ทุปหอมแดง พริกสด หัวซิงไคลงในหม้อ แล้วเทน้ำย่านางลงไป
    ปรุงรสด้วยเกลือ น้ำปลา น้ำปลาแดก ผงนัว แล้วยกขึ้นตั้งไฟ




    ปล่อยให้เดือด จั่งใส่จินูนกับผักติ้ว ผักอีตู่ลงไป




    กะว่าน้ำย่านางสุกกะซิมรสชาดได้ แซบแล้วกะตักใส่ถ้าย ซดกับข้าวเหนียวฮ้อนๆได้เลย




    แนวกินตื่มครับ ทอดปลาส้ม แวะซื้อยุปั๊มแถวโคราช






    ตบท้ายด้วยบักม่วงอกร่องหวานๆ จากทางบ้านเฮา




    *********************

    ฝากอีกจักหน่อยครับ พอดีเห็นเศษไม้ที่เฒ่าพ่อเพินม้างเทิบเก่าออกถิ่มไว้บ่ได้ใช้ประโยชน์ กะเลยตีเตียงน้อยลงมานำ
    พอได้นั่งเล่น นอนเล่นหน้าบ้าน นั่งเฮ็ดแนวกิน นั่งกินข้าวกะได้ (ถ้าซื้อเพินบ่ต่ำกว่าห้าหกร้อยพุ้นเด้)




    อั้นนี้บักแงวครับ หรือลิ้นจี่อีสาน เอาลงมาสอบนึง แจกหมู่ยุหม่องเฮ็ดงานฮอดบ่ทั่วกัน




    บักม่วงอกร่องครับ ในภาพยังดิบ ต้องบ่มก่อนจักสามสี่มื่อ เอาลงมาสอบนึง ปันพี่น้องอ้อมแอ้มข้างเฮือนแน
    ปันหมู่ยุหม่องเฮ็ดงานนำแน ได้ฝากอ้ายอี๊ดคนภูหลวงนำ หวานย่อนบ่น้ออ้าย




    ลากันด้วยภาพนี้ครับ กระเพาขาวบ้านเฮา หัวซิงไค หัวข่า เอาลงมาจากทางบ้านเฮา ปลูกใส่กระถางไว้พอได้เก็บใส่อ่อมใส่แกง
    ย้อนว่าพื้นที่เฮือนเทปูนเบิดบ่มีดินให้ลง




    ขอบคุณพื้นที่บ้านมหา เอาไว้พ้อกันอีกกระทู้หน้าน้อ สุขซำบายดีทุกท่านครับ

  2. #2
    ศึกษาหาความรู้ สัญลักษณ์ของ " แคน ชัยภูมิ "
    วันที่สมัคร
    Apr 2012
    กระทู้
    220
    หาแต่แนวมันหากินยาก...มาอ้างเนาะ บ่าวหยก ตักมาให้ซิมนำแนจักถ้วย :*- :b-b:b-b:b-b

  3. #3
    ท่องเวบ สัญลักษณ์ของ pui.lab
    วันที่สมัคร
    Jul 2006
    ที่อยู่
    โสดไม่มีใครเอา หรือว่าเราไม่เอาใคร
    กระทู้
    8,954
    สะออนบักม่วง บักแง่ว ส่งอีเอ็มเอส มาจักพวงแน๊น้อง
    บ้านมหาดอทคอม เว็บไซต์ส่งเสริม ศิลปะ วัฒนธรรมไทย ศิลปิน ความรู้ออนไลน์
    st1: มิตรภาพและรอยยิ้ม กับดีเจคนไกลบ้าน st1:

  4. #4
    แบ่งปันความรู้และประสบการณ์ สัญลักษณ์ของ คนภูหลวง
    วันที่สมัคร
    Feb 2010
    ที่อยู่
    เมืองเลย
    กระทู้
    359
    บ่าวหยกสุดยอดพ่อครัวบ้านมหา ขอบคุณหลายเด้อสำหรับหมากม่วงของฝากหวานคักขนาดแม่บ้านมักหลายชัดเกลี้ยงตั๊บเลย

  5. #5
    แบ่งปันความรู้และประสบการณ์
    วันที่สมัคร
    Mar 2013
    ที่อยู่
    ขอนแก่น ประเทศไทย khonkaen thailand
    กระทู้
    134
    ของกินยามฝนตกใหม่ครับทางอิสานบ้านเฮา หว่างสัปดาห์ที่ผ่านมา พ่อใหญ่เซียงเบ้าไปเฮ็ดเวียกทางอุบลราชธานี ออกจากขอนแก่น ขับรถผ่าน เชียงยืน ยางตลาด กมลาไสย จังหาร ธวัชบุรี เสลภูมิ ยโสธร เข้าอุบล ฝนตกดีขนาด โดยเฉพาะเขตเสลภูมิกับยโสธร อุดมสมบูรณ์คัก ปีนี้เบิ่งทรงคือสิได่เฮ็ดนา ได้กินเข่าอิ่ม กันสู่ผู่สู่คน อยู่ดอกครับ

  6. #6
    ศึกษาหาความรู้ สัญลักษณ์ของ อุ่นคำ
    วันที่สมัคร
    Jun 2012
    ที่อยู่
    นครราชสีมา
    กระทู้
    72
    อยากลองลึดบักแงวลอยน้ำปลาจักถ้วยเบิ่งเด้น้อ คือสอสำบายท้อง...555+

  7. #7
    ศึกษาหาความรู้ สัญลักษณ์ของ tuynooy
    วันที่สมัคร
    May 2012
    กระทู้
    10
    เห็นแต่เมนูที่ท่านเฮ็ด..ผมละออนซอน..ติดตามครับ..ติดตาม..หาแนวแซบๆมาลงอีกหลายๆเด้อครับผม..นี่ละครับเมนูของคนอีสานแท้ๆ..เห็นแล้วล่ะหิวเลยครับ..

  8. #8
    ผู้ช่วยผู้ใหญ่บ้านมหา
    Mr.Reception
    สัญลักษณ์ของ คนตระการ...
    วันที่สมัคร
    Feb 2008
    กระทู้
    4,209
    อยากกินเด้แมงจินูน บักม่วงหลายคักเนาะ

  9. #9
    แบ่งปันความรู้และประสบการณ์ สัญลักษณ์ของ sugar-51
    วันที่สมัคร
    Feb 2009
    กระทู้
    147
    เป็นตาแซป เอาฮ้ายยยย แต่กะบ่กล้ากิน

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •