ขอเอาภาพบรรยากาศหรือผลงานที่ผ่านมามาแสดงและฝากไว้ยังห้องสมุดบ้านมหาเด้อครับ
เว้าเรื่องใส่เบ็ดกบต้ะปีที่แล้วเว้าได้เคิ่งเดียวถึงตอนปั้มกอไผ่มาเหลาคันเบ็ดแล้วหยุดคาไว้แค่นั้น
มื้อนี้สิเอาภาพการใส่เบ็ดผลงานของผมอง เหลาเอง ใส่เอง ยามเอง แถมสาปลายังขุดเอง ฮ่าๆๆ มาสู่เบิ่ง
เบ็ดหลังทำเสร็จแต่บ่เสร็จดีปานได๋ยังบ่ได้ผูกแอว คันเบ็ดเอายาวๆไว้ก่อนเผื่อปักตามคันสาคันบ่อที่น้ำมันอยู่เลิ่ก
และพร้อมที่จะไปปักเอาปลาช่อนปลาดุกละครับ
ต้องการเยื่อปลาหมึกแห้งตามที่เซียนเบ็ดเพิ่นแนะนำไปตลาดบาดได๋กะลืม สั่งกบน้อยจากฟาร์มกบทางสารคาม
โตสองถึงสามบาทได้มาผัดโตใหญ่ห้าหกโตป่น เลือกเอาแต่โตน้อยมาเกี่ยวหลัง
เกี่ยวหลังโยนลงน้ำ โตตายโตบ่ตาย
สวบให้อยู่ครับ ปลาค่อใหญ่หั่นละ
วนมาเบิ่งทางนี้มาหมูบคักแถะละ ดึงบ่ขึ้นได้ลงซาวหาอีกซาวลงไปๆ บ่แม่นปลาไหลบ่แม่นงู
ข่องเคียผักบุ้งเน่าหลูดซ้ำเสียเหยื่อเขียดถิ่มไปโตหนึ่ง
นั่งถ่าจอบบ้อนอยู่เถียงได้ยินเสียงสวบแล่นไปเบิ่งค่อยได้มาตื่มกันเรื่อยๆ ผ่านไปสามชั่วโมงได้ปลาค่อมาสามสี่โต
ปลาแนวอื่นบ่มีบ้อหรือมันบ่มักเหยื่อเขียด
ครับถือว่าฝีมือการเลือกลำไม้ไผ่การเหลาคันเบ็ดบ่ขี้ล่ายปานได๋ เคาเบ็ดติดลูกหมุนบ่มีหวิ่นบ่มีขาด
และผ่านมาอีกหลายมื้อได้ข่าวว่าปลาช่อนโตใหญ่ลอยฟูเหนือน้ำมีคันเบ็ดติดไปนำ
สงสัยอยู่ครับว่าเบ็ดหายไปใสคันหนึ่ง ปักไว้แจนี้น้าแต่บ่เห็น
Bookmarks