ย้านบ่มีชาติหน้า

[สาวบ้านนา]

อ้ายเอ่ย ครั้นชาตินี้เฮาบ่แม่นคู่ฮ่วมกัน น้องบ่เสียใจเดิก ครั้นอ้ายพ้อคนดี

แต่ครั้นวาชาติหน้ามีแท้ น้องสิฟ้าวคลุบเจ้า เอาเป็นคู่เคียงใจ

สิย่างกายเจ้า ให้อ้ายหัวใจ ล่มสลาย ฮ้องครวญครางหาน้องแตผุเดียว ทอนั้นแหล่ว:p

[โป้ยก่าย]

หล้านางเอ้ย
คันแม่นมีชาติหน้าอ้ายสิมาขอฮ่วม อธิษฐานอยู่ร่วมเคียงข้างบ่ห่างไกล
สิขอสร้างบุญไว้เอาใจต่อนางคนเดียว ให้กลมเกลียวสายแนนจ่องดึงไปหาน้อง
ให้เจ้าคองคอยอ้ายแม่นชาติใด๋กะตามซ่าง เพียรก่อบุญสืบสรางเอาใจตั้งแม่นต่อกัน
บ่มีแนวสิขวางกลั้นกันทางฮ่วมเฮาสอง ให้ได้ครองความฮักหากว่าบุญกุศลพร้อม
ชาตินี้ยอมอดกลั้นเฮาพ้อกันยามกางเคิ่ง ย้อนว่าบุญอ้ายบ่เถิงจังได้มาพบพ้อยามเจ้ามีคู่สอง
ได้แต่แลล้ำจ้องบ่กล้าท่องเทียวยาม บ่อยากตามใจโตให้ซ่าลือไปทางฮ้าย
แม่นเสียดายกะอดกลั้นจิตกสันต์บ่กล้าล่วง ย่านนำคนทั้งปวงสินินทาว่าฮ้ายอยากอายบ้านเพิ่นสิหยันนางเอ้ย........

[บ่าวไทเลย]

คั่นชาติหน้าบ่มี ทางที่ดีกะคือเตรียมไว้
อย่าสิคาแต่หลงไหล ไปในทางที่เพลี่ยงพล่ำ
จงจดจื่อจำ นำคำสอนของพระพุทธ
คั่นบ่ดีกะหยุด อยู่ไว้เพียงถ่อนี้หล่ะหน่า........
หากสิบืนไปหน้า ทั้งที่ฮู้หว่ามันบ่ดี
มันสิเกิดบัดสี กาลีบ้านกาลีเมือง
หันบ่พ้อดอก ความฮุ่งเฮือง
แม้นสิตายไปกะตกนรกหมกไหม้
บ่ได้พ้อดอกทางไปสู่สวรรค์เด้อชั้นฟ้า หล่ะหน่า......... เอาหล่ะ คั่นต่อมันแฮงสิยาว เด้อพี่น้องเอ้ย

[sompoi]

ถึงสิตายตกแท้แม้นรกกะตาม คั่นฮักเจ้าได่ฮ่วมนำคำคู่อยู่เคียง
บ่หวั่นเพียงแม่นพ้อหม่อทองแดงจ้อยพี เบิ่งทางใจน้องนิสิขอเฝ้าเข่าซ้อนคู่
ถึงซาดหน่าน้องสิยู้สู้เอาดอกทุกข์กาย ขอได่อยู่เคียงอ้ายสิตายทิ่มกะบ่หวั่น
ทุกข์ป่านได๋ซาดนินั่นนางสิขันต่อสู้ ให้ชาวสวรรค์รู้นิล่ะคู่รักเคียงกาย
บ่คึดยากเลยเด้ออ้ายให้เบิ่งความหมายฮักของน้อง สิคองถ่าอ้ายผุเดียว ซายเอ้ย...

[บ่าวไทเลย]

นางเอ้ย......
ใจประสงค์แล้ว......เมืองแกวกะดั้นฮอด
ใจประสงค์คิดฮอดแล้ว.....ในถ่ำสิก่นหา หล่ะนางเอ้ย......
คั่นบ่มีดอกชาติหน้า คือคูบาทางเพิ่นหว่า กะสิได้แต่ห่วงหา ป่วงนำแต่นางน้อง
ขอให้เป็นคู่ครอง ฮักเฮาสองบ่มีหน่าย ให้ทุกข์ภัยดอกแหล่นกาย มลายลงเหมิดสิ้น
ให้สนั่นฮอดเมืองดิน แดนสวรรค์เด้อชั้นฟ้า ให้ท่านเทวดา อิจฉาฮักเฮาสอง
ให้หล่องลงเมืองนรก คือน้ำไหลลงโสก ให้โลกทั้งโลกได้ฮับฮู้หว่าน้องสิอยู่ดอกเคียงกาย
แหม่นสิตายเป็นผีกะบ่หนีดอกทางได๋ ส่วนบักอ้ายกะสิคองกะสิถ่า โตน้อง แต่ผุเดียว นางเอ้ย.......

[โป้ยก่าย]

หล้านางเอ้ย
คันซาใจของอ้ายบ่อยากรอเถิงชาติใหม่ มันสิไกลโพดหล้ามันสิช้าย่านบ่เห็น
ย่านมีแนวหลีกเว้นบ่ให้พบเจอกัน อย่านบ่ทันเวลาย่าสะรอเถาะน้อน้อง
เฮาเทิงสองได้มาพ้อพอใจกันบ่ผันเปลี่ยน อดสาเพียรฮ่อหุ้มมาเป็นแป้นแผ่นเดียว
อ้ายบ่คิดลดเลี้ยวเทียวท่องหาไผในหัวใจมีแต่นาง บ่เกี่ยวไผดอกเด้อน้อง
ให้เจ้าตรองเบิ่งเด้อหล้าตัดสินใจส้ำสา มาเอาอ้ายเป็นคู่ สิพาสุขสืบสร้างสบายเนื่อแม่นสุอัน นางเอ้ย

[บ่าวไทเลย]

คั่นบ่มีชาติหน้า กะสิถ่ามันชาตินี้
คั่นบ่ได้มื่อนี้ มื่อหน้ากะอย่าหวัง หล่ะ นางเอ้ย

[หนุ่มนาจาน]

คันแมนบุญเคยสร้าง ผลามีเคยได้ฮ่วม คงซิได้อยู่ร่วม ฮวมน้องหมอ่งวาหอ ซั้นแหล่วนางเอ้ย