หากแม่นมีชาติหน้า ขออาสาพ้อเจ้าก่อน อ้ายขอซ้อนฮักเจ้า แต่ต้นเค้าจนว่าปลาย
แม่นฮักหลายเด้อชาตินี้ อ้ายฮักซ่ำชีวี จนบ่มีมื้อสิปล่อย หากสิว่าเกินร้อย กะยังน้อยพุ้นตั๊วคน
ขอชาตินี้ให้ผ่านพ้น จักแม่นทนคักหลายเด่ จักแม่นไกลกันหลายเด๊ เจ้าผู้สวยล้ำค่า ผลาอ้ายกะแค่มอง
สิประคองนบดินฟ้า หากแม่นมีชาติหน้า ให้ผู้ข้าพ้อกันแน่ อย่าคือชาตินี้แท้ สิเป็นบ้าอยู่ผู้เดียว
สุดทางเทียวไปเนี่ยวรั้ง เหมิดความหวังเป็นบ้าเห่อ มีแต่นอนฝันเผ้อ ละเมอเศร้าดิ้นดั่นแด
จักแม่นแพ้เขาเอาฮ้าย มาสวยหลายเขาพ้อก่อน เป็นละครบทเศร้า ได้ฮักเจ้าบัดเผิ่นแซง
หลงฮักแพงปานหน่วยแก้ว คือแนวหนึ่งของหัวใจ สิหึงหวงเจ้าซ่ำได๋ ไปเอามาบ่มีได้
แค่น้อยใจถ่อนหล่ะหล่า ย่อนว่าโชควาสนา บุญผลาน้อยทุกสิ่ง
หากชาติหน้ามีจริง ทานทุกสิ่งที่เฮ็ดไว้า ขอให้พ้อเจ้าผู้เดียว
อย่ามีหยังมาข้องเกี้ยว ให้เลี้ยวห่างทางหัวใจ ไปทางได๋กะให้เจอ ให้พบเธอเด้อคนนี้
ทุกเดือนปีขอเห็นหน้า ขอถนอมบูชา รักท่อฟ้า บ่มีหวั่น
แม่นกลางคืนหรือกลางวัน ขอคงหมั่นรักหวานจ้อย สิออยเว้าดอกแต่เธอ น้องหล่าเอ๊ย
Bookmarks