ลาบนกคุ่ม

[บ่าวอุบลมิวสิค]

นกคุ่ม หรือ นกขุ่ม แล้วแต่ทางบ้านใด๋สิเอิ้น เป็นนกที่รสชาดดีล่ะกะหากินยาก การลาบนกคุ่มกะเฮ็ดคือกันกับลาบไก่ ใส่ใบบักกรูด หอมซอย ข้าวคั่ว พริกป่น บักพริกโพน
(เอ้าไว้แกล้มกับลาบนกคุ่ม) คำข้าวใหญ่ๆคุ้ย โอ้ยย แซบหลาย

[ผู้ก่อการรัก]

อร่อยเด๊นี่ เคยกินอ่า ตอนเด็กๆ พ่อพากิน ...

[บ่าวอุบลมิวสิค]

การันตีโดย ผอ.แม็กกี้ ครับ อิอิ

[ปลัดโตคนเดิม]

เวลาสิเกี่ยวข้าว เอาซิงไปใส่นกคุ่มข้างคันแทนาได้หลายๆตอนผมยังน้อยไปใสกับอ้าย
บางเทื่อติด 2 -3 โตพุ้นมาลาบมาอ่อม แซบ.................................

[บ่าวอุบลมิวสิค]

ฟักก้านกล้วยใส่นำบ้อท่าน ปลัดโต อิอิ มันจั่งสิได้หลาย

[lanboon1]

อ่านแล้วน่าอร่อยครับ แต่ไม่เคยกินเลยครับ

[บ่าวสายฟ้า]

น้ำลายแตก

[คนเมืองแปะ]

บ่าวอุบล ฝากลักเก็บผักกะโดนต้นอยู่โพนนาพ่อผู้ใหญ่บ้านมานำเด้อ เอามากินกับลาบนกขุ่ม

[บ่าวอุบลมิวสิค]

บ่าวอุบล ฝากลักเก็บผักกะโดนต้นอยู่โพนนาพ่อผู้ใหญ่บ้านมานำเด้อ เอามากินกับลาบนกขุ่ม

ฮ่วย บัดนี่แล้วสิได้กินโอเลี้ยงข้าวผัด อ้ายคนเมืองแปะกะดายเนาะ

[ขี่ถี่มักม่วน]

มาลี้สวัสดีปีใหม่ พี่น้องบ้านมหาซูคน

มื้อนี้มาพร้อมลาบนกขุ่ม


>>>ลาบนกขุ่ม

ก่อนเฮาสิได้เฮ็ดลาบนกขุ่ม เฮาต้องไปหานกขุ่มมาสาก่อน วิธีการไปหานกขุ่ม กะไปหาได้หลายวิธี บ่ว่าสิเป็น ไปห่างนกขุ่ม ไปไล่นกขุ่ม หรือไปไต้นกขุ่ม เป็นต้น นกขุ่ม หรือ นกคุ่ม แม้มันสิเป็นนก แต่มันบ่ค่อยสินิยมชมชอบการบินสักเท่าได๋ ชีวิตส่วนใหญ่มันสิอาศัยอยู่ตามพื้นดิน บ่คือนกชนิดอื่นๆที่ชอบอาศัยอยู่เทิงต้นไม้ เทิงหลังคาบ้าน แต่กะบ่ใช่ว่านกขุ่มสิบินบ่เป็นเด้ บินได้อยู่ และนกขุ่มตามภาคอีสานบ้านเฮา กะสิหาได้ในช่วงฤดูร้อน เท่านั้น เริ่มมาตั้งแต่หลังจากเก็บเกี่ยวข้าวแล้ว กะสิเริ่มเห็นว่ามีนกขุ่ม ตามหัวไร่ปลายนา ตามป่าละเมาะ ส่วนฤดูการอื่นบ่ฮู้ว่ามันอพยพไปอยู่ประเทศได๋ จากที่เฮาฮู้ธรรมชาติของนกขุ่มว่า เป็นนกที่อาศัยอยู่ตามพื้นดิน หาเขี่ยอาหารกินคือไก่ บินได้บ่ไกลชอบแล่นหลายกว่าบิน แล้วกะยามนอน กะเฮ็ดหม่องนอนนำพื้นดิน ข้างกอหญ้า เป็นหม่อง ต่องหล่อง แต่งแหล่ง เป็นที่สังเกตุได้ว่า หม่องได๋ เป็นหม่องที่นกขุ่มนอน เมื่อเฮาฮู้ธรรมชาติดังนั้นแล้ว กะเลยมีวิธี หานกขุ่ม ได้หลายๆวิธี เช่น

1. การหานกขุ่ม อุปกรณ์ที่ต้องมี กะคือ ซิง เป็นซิงห่างนกขุ่ม ซึ่งสิมีขนาดน้อยกว่าซิงห่างไก่ การไปหาห่างนกขุ่มนี่ เฮาจะต้องมีการสำรวจก่อนว่า หม่องได๋ ดอนได๋ มีฮอยนกขุ่มมาหากิน เฮาจั่งค่อยไปห่าง ห่างนำหม่องฮอยมันหากินนั่นหละ แต่ว่าต้องใช้ซิงหลายๆอันจักหน่อย ห่างลัดกันไว้ ผู้ลังคนกะเอาข้าวเปลือก หรือข้าวสารไปโฮย ล่อไว้กะมี ผู้ลังคนกะฮ้อง เฮ็ดเสียงนกขุ่มอืด ฮ้อง อืด อืด ล่อมันมากะมีคือกัน บางทีต้องรอคอยเป็นค่อนมื้อกะมีกว่าสิห่างได้ แต่มื่อได๋หมาน ห่างคาวเดียวกะได้แล้ว

2. การไต้นกขุ่ม อุปกรณ์ที่ต้องมีกะคือ ไฟส่องสว่าง อาจสิเป็น แบตเตอรี่ หรือตะเกียงแก๊ส กะได้ อีกอย่างหนึ่งกะคือแห แห ตึกปลานี่หละ เอาใว้ไปหว่านเอานกขุ่ม การไปหาไต้นกขุ่มกะต้องไปหาเบิ่งหม่องฮอยมันนอนไว้แต่ยามกังเว็น อย่างที่เฮาฮู้ว่านกขุ่ม มันนอนอยู่นำพื้นดิน หม่องได๋มีกอหญ้า กอเฟียง หรือนำแจคันแทนา เฮากะเอาไฟไปหาแยงเบิ่ง ถ้าเห็นมันนอน กอดจอด แกดแจด อยู่กะให้ใช้แหหว่าน คลุมเอาเลย วิธีนี่สิได้นกขุ่มทีละหลายโต เพราะว่ามันสิมักนอน อยู่เป็นกลุ่ม ทีละสามสี่โต

3. การไล่นกคุ่ม วิธีนี่วัยรุ่นชอบใช้ แต่ส่วนใหญ่สิไปไล่นกขุ่มโดยบังเอิญ เวลาไปหาไล่แย้ คล้องกะปอม ย่างไปเห็นนกขุ่มบินปี๊ออกจากกอหญ้า กะแล่นไล่เลย นกขุ่มมันเป็นนกที่บินบ่ได้ไกล้ บินแต่ละครั้ง ข้ามได้ท่งนาเดียว พอบินลงงานนาแล้ว กะแล่นต่อไปอีก งานนาหนึ่ง เวลาคนแล่นนำไปทัน มันกะสิบินต่ออีก คนกะแล่นไล่อีก บินบ่เกินสามสีครั้งนกขุ่มมันกะสิเหมิดแฮง บินต่บ่ได้ พอคนแล่นนำทันกะย่างเลาะหาใกล้ๆหม่องนกขุ่มบินลง กะสิเห็น นกขุ่มหมอบอยู่ กะคุบเอาเลย วิธีนี้ ผู่เฒ่าใช้บ่ได้ เพราะว่า กว่านกขุ่มสิเหมิดแฮง คนกะสิเป็นลมก่อน

พอเอาได้นกขุ่ม มาแล้ว กะจัดการหลกขนให้หล่อนๆ แล้วกะลนไฟให่ขนน้อยมันออกดี หลังจากนั้นกะผ่าท้องแบ๋ขี้ออกให้เรียบร้อย แต่ระวังแหน่เด้อ ยามเปิดฝาข่องออก ค่อยๆเปิด เดี๋ยวนกขุ่มบินหนี สิได้กินลาบก้านกล้วยใส่ขี่เขียงเด้?
วิธีการเฮ็ดลาบนกขุ่ม กะบ่ยาก เฮ็ดคล้ายๆลาบแย้นั่นหละ กะคือ ต้องเอานกขุ่มไปปิ้งก่อนจั่งเอามาฟักให้แหลก ถ้าได้บ่หลายกะไปหาตัดก้านกล้วย มาฟักใส่จั่ง สี่ห้าก้าน แต่ว่าบ่ต้องขูดขี่เขียงใส่นำเด้อ มันสินัวโพด ต้มน้ำปลาแดกคน แล้วกะปรุงคือวิธีปรุงลาบ นั่นหละ แต่อย่าลืมเด้อ ข้าวคั่ว ต้องคั่วใหม่เด้อ มันจั่งหอม แล้วกะอย่าลืม ซอยใบเว่อร์ ใส่นำมันจั่งค่อยหอม
ปรุงแล้วกะหาลงกินเลย เก็บผักมากินกับหลายๆ ท้องสิบ่ได้ผูก แต่ผักกระโดน อย่าสะกินหลาย มันฝาด