......ถามข่าว...ซุมเฮาบ้านมหา.....

[ตะวันนา]

........เป็นจังได๋น๊อพี่น้อง สำบายดีอยู่หรือบ่
คิดฮอดกันแหน่บ่น๊อ บ่ได้พบพ้อหน้าด้วยงานนี้แม่นยากหลาย
ใจยังคิดฮอดอ้าย ซุมเอื้อยพี่ ลุง อาว อา
บ่ได้มาแวะเวียนหา แต่กะเพียรส่งใจยู้
กะพอรู้ข่าวบ้าง บ้านมหาเปลี่ยนแนวใหม่
เป็นเวอร์ชั่นที่สดใส ไผมาเห็นกะอยากเว่าซุมหมู่เจ้า...ว่าจ่างได๋ พี่น้องเอ้ยยยย

..................สำบายดีเนาะค่ะ จำกันได้บ่น๊ออออออออ..."แก้มแดงแรงใจ" เด้อค่ะ..

[ศรีสะท้าน]

สบายดีอยู่น้องหล่าเฮือนมหาน้องพี่ คือว่ามีข่าวดีหยังบ่อบอกพี่น้องพอฮู้ข่าวงาน
เจ้าเฮ็ดบุญขึ้นบ้านหรืองานทอดกฐินจุล หรือแม่นบุญประเพณีอิหยังนอแก้ม
คือแซมจดหมายน้อยตอยควมฝากส่ง มาคืออ่งแท้หล่ะหล่าลุงป้าบ่อเล่าเถิง

[ตะวันนา]

.......อ้ายศรีเอ๊ย!!!......แม่นข่าวดีหยังน๊ออ้าย ได้ยินไผเพิ่นเว่ากล่าว
อันว่าทางน้องสาว สิมีข่าวดีนั้น ยังบ่กล้าไปบอกไผ
ได้มื้อดีก่อนเด้ออ้าย จั่งสิเล่าความหา
จดหมายน้อยสิค่อยมา ให้ใส่ซองแหน่เด้อเจ้า
บุญของนางที่เว่า คือขนข้าวที่เกี่ยวใหม่
ใส่ในเล้าหลังบักใหญ่ เอิ้นอ้ายชายให้มาช่วย ขนข้าวซ่อยกัน
อย่าสิลืมเด้อมื้อนั้น แรมสิสามเดือนสี่
ให้คุณพี่เตรียมตัวไว้ เพราะงานนี้เป็นประธาน เด้ออ้ายศรี เอ้ยยยย


........เขียนไว้ตั้งบักหลาย...หายจ้อย เสียดายเด๊..........

[ตะวันนา]

...คิดฮอดเด้อเซียงข่อล่อ พ่อรูปหล่อที่คมขำ
คิดฮอดหลายอ้ายทองคำ ผู้เพิ่นเหลาปานเสาไม้
คิดฮอดหลายชายคนนี้ ทิดคำศรีผู้ดั้งโด่ง
ฝากความคิดฮอดเถิง อ้ายโป้ยก่ายคนโก้ ปานนี้เจ้าเป็นจั่งได๋
บ่าวกบินทร์ผู้เคยได้ เว่าต่อถามหา
ผู้วาจาแสนหวาน อ้ายขี้โก๋ห้างจิ้น
ยังบ่สิ้นคำหวานนี้ ส่งถึงพี่ไก่น้อยคนงาม
ยังไต่ถามว่าคิดถึง เอื้อยส้มป่อยคนโก้
อ้ายโจ่โล่คนผู้นั้น ยังคิดฮอดอยู่คือเก่า
ทั้งอ้ายบ่าวเซียงน้อย ยังส่งใจให้บ่เซา
เป็นได๋น๊อซุมหมู่เจ้า ห่างหายบ่ได้แว่
มาทะแม๊.. เข้ามาเว้า..... ผญาเค้าคำคืน......

[โป้ยก่าย]

แก้มแดงเอ้ย
ไปใสมาน้อหล้าว่าแม่นลืมบ้านมหาลืมวาจาอ้ายโป้ยก่ายแล้วตี้
คือไปมิดไปมี่หากะโงต่าวโค้งแม่นโตเจ้าไปอยู่ใสหล้าเอ้ย
อ้ายโป้ยก่ายยังอยู่นี้เวียนหาอ่านคำผญาคิดฮอดคำวาจาอ้ายบ่ลืมเด้อน้อง
ได้แต่คองคอยถ้าย่านเจ้าลืมบ้านมหาบ่หวนมาอีกคือเก่าบ่ว่าแลงว่าเซ้าคอยแล้วกะเล่าคอย
ดีใจหลายบ่น้อยเห็นเจ้าต้าวคืนมาอันวาจาของนางซ่างม่วนหลายผญาเจ้า
ให้เจ้ามาวารเว้ามีแนวใด๋เอามาว่าบ่ว่าคำผญาทางบทกลอนว่านั้นทางอ้ายนี้มักหลายหล้าเอ้ย

[บ่าววิทย์]

ฮักแพงเพียงกันเสมอมั่นเคียงหมาย บ่ได่คู่เฮียงกายกะบ่วายเว่นใจ..ดอกน้องเอ้ย
อันควมดีในใจเฮาสองคองกันอยู่ นั้นคือสิ่งอุ้มซูให้เฮาฮู้ทางไป
ขอให้น้องมีสุขใจอยู่ไสน้องกะอุ่น ได่เป็นทุนพอคึดฮอดให้ได่กอดในฝัน
ยามก่อนนอนได่เห็นกันยามฝันกะดีใจ ทางชีวิตเฮายังใกล้คือสิได่พบพ้อ..ดอกน้อน้องเอ้ย....

อ้ายวิทย์อยากไปซอยขนข้าวเข้าใส่เล้าใหญ่แท้ล่ะน้องแก้ม นาน้องแก้มคือสิได้ข้าวหลายเนาะ อิอิอิ

[ตะวันนา]

...อ้ายโป๊ยเอ๊ยยยย......บ่ได้ไกลไสดอกอ้าย.......ยังวนว่ายหม่องเก่า
เกือบสองเดือนที่จากเจ้า...บ่ได้แว่ทางได๋....
นางเมือบ้านพักผ่อนกายก่อนกลับมาสู้งานนี้
สำบายดีน๊ออ้าย...น้องยังคิดฮอดชาย....แม่นห่างหายบ่ได้แว่
กลับเมือบ้านซ่อยพ่อ-แม่ ผู้เพิ่นทุกข์ยากฮ้าย เฒ่าแล้ว ลุกบ่ไหว
ด้วยทางไกลอีสานกว้างบ่ได้ท่องอินเตอร์เน็ต
เฮ็ดแต่เวียกอยู่ท่งนา...บ่ได้ซา IT กว้าง.....
ดีใจหลายอ้ายมาท้วง ทวงข่าวถามหา
มีเวลาสิเขียนกลอน....จ่ายผญา นำหมู่เจ้า
ยังเพียรเฝ้าอ่านกลอนอ้าย ทั้งผญาที่เจ้าจ่าย
มันสุดแสนบรรยาย เบิ่งความหมายที่อ้ายเว้า....แม่นสุดยอดแห่งผญา ซั่นแหล่ว อ้ายเอ้ยยยย............โฮ...เกือบลงบ่เป็นเนาะเนี่ย..........

ปล..อ้ายวิทย์ น่าท่งใหญ่เติบตั้วอ้าย หาคนเกี่ยวซ่อยบ่หวาดบ่ไหว ...สงสัยสิได้ไปจ้างคนทางในเมืองขอนแจ่นมาเกี่ยวซ่อย....สาแล้ววววววว........

........หือคนทางหนองคายว่าจ่างได๋น๊อ.......เกี่ยวข้าวแล้วบ่น๊อ...........ไปเกี่ยวซ่อยแหน่เด้อจ้า....

[โป้ยก่าย]

หล้านางเอ้ย
เจ้าหากเป็นผู้ฮู้กตัญญูแทนตอบมอบให้พ่อแม่น้องผู้เพียรเลี้ยงตอบสนอง
บุญเจ้าหลายแท้เด้อน้องให้นางค่อยอดสาคุณบิดามารดาบ่มีหยังสิเทียมได้
อันว่ายามเจ็บไข้วัยชรามาฮอดได้อาศัยอยู่ใกล้ดูแลท่านเป็นอย่างดีหล้าเอ้ย
อันว่าทางอ้ายนี้กะยังเที่ยวถามหาว่าแม่นไกลไลลาบ่ต่าวคืนหวนโค้ง
โสตกลงทางอ้ายคิดอยากหมายมาถามข่าวถามเถิงเข้าอยู่เล้าคือสิล้นอั้งสางบ่น้อ
ถามทางใจของน้องพอได้ท่องเทียวยามถามเถิงเฮือนเถิงซานฮ่าได้ไปเซายั้ง
แต่ทางโตของอ้ายคิดยากหลายแนวเจ้าว่าอ้ายบ่เคยเฮ็ดนาคันสิมาเกี่ยวข้าวโตอ้ายเฮ้ดบ่เป็นหล้าเอ้ย
อันว่าทางบ้านอ้ายถิ่นหนองคายบ้านเคยอยู่เฮ็ดแต่สวนไฮ่ฮั้วพอได้ส่งขาย สั้นดอกหวา นางเอ้ย

[ไก่น้อย]

น้องสาวเอ้ย..เป็นจั่งได่หน่อหล่าคำวาจาคือมิดหมี่
คิดฮอดเด๋ทางนี้พี่กินข้าวกะจ่มหา
เป็นจั่งได่น้องหล่า
คำวาจาตะเก่าก่อน
เจ้าผู้พั่วดอกซ้อนสิมาเว่ากล่าวกัน
...คิดฮอดเด้อมื้อนั่นความสัมพันธ์วาจาเก่า
เปิดหัวใจนั่งเว่า เอื้อยละเจ้าส่างม่วนหู
อยากบอกน้องให้ฮุ้ เอื้อยยังจ่มคะนิงหา
หากว่ามีเวลา กะค่อยมาจาเว่า
ยามได่อุกอังเอ้า ยังคิดนำเด้อโตพี่
ถ่าน้องยุทางพี้ ..ก่ายก้ำฝั่งกาสิน เด้อหล่าเด้อ ...

[pui.lab]

ซ่ะบ๋ายดีค๊าคุณครูแก้มแดง อยากตอบแบบผญาตอบบ่ได้ ขอตอบแบบนี่หล่ะ :-*