ยำแก่นตะวันกับใบบัวบก

[นู๋น้อย]

ธุจ้า สวัสดีจ้า พ่อแม่ พี่น้อง บ้านมหาที่ฮักตลอดคิดฮอดคือเก่า...มื้อนี้มีเรื่องเล่า แนวเก่าเรื่องแนวกินมาฝาก จ้า ^_^

เนื่องจากว่า หลายเดือนก่อน ได้ปลูก ต้นแก่นตะวันไว้ใส่กระถาง พอเอ๊าะเจ๊าะ ในสวนเอ๊าะเยาะศิลป์ อยู่โรงงาน
บัดนี้ ผลผลิตได้เริ่มเห็นพอเลือนๆลางๆแล้ว กะเพราะว่า มีผู้หวังดีไปคว่ำกระถางให้ หนึ่งกะถาง เลยได้เห็นว่ามันเริ่มมีหัวแหน่แล้ว(ตามระยะเวลา 4เดือน แก่นตะวันลงหัว)



ได้พอเอ๊าะเจ๊าะ อิหลี



บางกระถางบางต้นกะยังพอมีดอกให้เห็นเรื่อยๆ พอได้เบิ่งและพักสายตาเวลาเมื่อยจากการเฝ้าหน้าจอคอมฯ







เก็บได้ส่ำนี้ก่อน ย้านบ่ได้แนว ปลูกในฤดูกาลต่อไป



ตามที่ได้ตามข่าว เบิ่งจากสื่อต่างๆ แก่นตะวัน มีสรรพาคุณทางยา มากมายหลายอย่าง
บ่ว่าจะเป็นทางโภชนาการด้านอาหารใช้เป็นอาหารลดความอ้วนและลดความดันในเลือด ลด ความเสี่ยงต่อการเป็นเบาหวาน
ซึ่งตอนนี้หลายๆสถาบันกำลังทดลอง ปลูกและผลิตเป็นยาเสริมหรือ อาหารเสริมต่อไป

ทางการเกษตรด้านปศุสัตว์ ใช้ผสมอาหารให้สัตว์ ลดกลิ่นเหม็นของสิ่งมูลสัตว์(คุณหมอบอกมา) และยังส่อยให้สัตว์เลี้ยงสุขภาพดีโดยเฉพาะหมู...

ซึ่งต่อไปจะไปขยายผลอยู่คอกหมูพ่อใหย่หนวด ^_^

และมื้อนี้เพื่อเป็นการทดลองและ ตอบ ข้อสงสัยของเจ้าของเองว่า มันเป็นรสชาตแบบใด๋ เฮ็ดอาหาร(แนวถนัด)ได้หลายอย่างบ่....

เริ่มที่ เมนู ของโปรดที่เฮ็ดง่ายและกินแล้วบ่อ้วน นั้นกะคือ ยำ

ยำแก่นตะวัน....กับ ใบบัวบก
ที่ใส่ใบบัวบกนำกะเนื่องจากว่าแก่นตะวันที่ได้มันน่อย (ย้านบ่อิ่ม ) กะเลยหาหมู่มาแกมนำ พอดีเลย ใบบัวบกกำลังงาม จัดเต็มไปเลยเมนูนี้





ตอนแรกว่าจะแวะลงตลาดซื้อกุ้งสด มายำใส แต่...มีรถขายปลาอิฮือปิ้ง มาจอดหน้าโรงงาน ได้การเลยเหมาะที่สุด(คึดในใจ)
ซื้อปลาอิฮือปิ้งมา 2 โต 30 บาท กะว่ากันไปดีกั่วมาทอดเอง อยู่หอ กลิ่นคือจะบ่ต้องคิด
และ มีโอกาสที่เขาจะเชิญให้ไปอยู่หม่องอื่น ฮ๋าๆๆ

ได้เครื่องปรุง และ ส่วนประกอบ มาตามมีตามเกิดเท่าที่จะซอกตู้เย็นอยู่โรงงานมาได้

มี ตะไคร้ ใบบัวบกสดๆจากกระถาง แก่นตะวันพอเอ๊าะเจ๊าะ พริกขี้หนูสวน



ล้างน้ำ ปอกเปลือก แก่นตะวัน แล้ว รูปร่างและกลิ่นคือ ข่าอ่อน แต่กลิ่นบ่ฉุนแฮง คือข่า



ส่วนประกอบอื่น ใบบัวบก ล้างน้ำให้สะอาด หั่นเป็นฝอยๆ ปลาอิฮือ ตะไคร้ พริก หั่นฝอย เตรียมไว้

น้ำยำ(ใช้สูตรน้ำยำเมี่ยง) ใช้ น้ำบักขามเปียก แทนน้ำบักนาว ตั้งกะทะใส่น้ำพอเอ๊าะเจ๊าะ ใส่น้ำตาลทรายหรือน้ำตาลปี๊บกะได้
แต่นู๋น้อย ใช้ สารแทนความหวานเพื่อลดความอ้วน ฮ๋าๆๆ เคี้ยวน้ำตาล กะเกลือ นิดหนึ่งเพื่อความกลมกล่อม ใส่ผงชูรสส่ำหยิบมือกะพอ พอมันแซบ
ตามด้วยน้ำบักขามเปียก เคี่ยวจนน้ำยำงวดเป็นเหนียว แต่บ่เหนียวแฮงซิมเบิ่งว่าสิออกเปรี้ยว นำ หวานตาม เค็ม นิดๆ
เป็นอันใช้ได้ ถ้ามีถั่วลิสงป่นได เติมได้แล้วแต่ผู้มัก จ้า



ถ้าน้ำยำหลายไปกะตักไว้ กะได้ เมนูถัดไปยังรอ อยู่



แล้วกะเอาส่วนผสมที่เตรียมไว้ลงละเลงเลยจ้า แล้วกะคนไปคนมา คนมาคนไป สองสามเทื่อกะพอ เดียวผักช้ำเบิ้ด



หน้าที่ได้ ผลที่ออกมากะคือ.....



เพื่อเป็นการ กันพลาด กะเลย ซื้อน้ำบักพร้าวปั่นมาไว้กินแก้เป็นซาง(ตำรายามั่วนิ่มเอาเอง)



สำหรับ สูตรนี้ บ่ทันแนะนำให้กินแกล้มเหล้าหรือ ของมึนเมา เด้อจ้า แบบว่า ให้หวิด 24 ชั่วโมงไปก่อน ถ้าบ่มีอาการแพ้ หรือ ผลข้างเคียงหยัง กะจั่งว่ากัน เน๊าะ

สำหรับแก่นตะวัน...สามารถค้นคว้าข้อมูลเพิ่มเติม จากลุงกลู(กลูเกิ้ล) ได้จ้า แปลงเกษตรพอเอ๊าะเจ๊าะนู๋น้อยกะเป็นแค่การลองผิดลองถืก
ได้ผลดีกะเอามาบอกต่อ เว้าสู่กันฟัง การต่อยอดในอนาคต กะ อาจจะมีออกมาให่ติดตามกันต่อไปจ้า

สำหรับมื้อนี้ มื้อเลขออก(ถืกกินไปตามระเบียบ) มื้อวันศุกร์แห่งชาติ หลายๆคนกะได้หยุดพักผ่อนยาวหลายๆมื้อ
ในวันหยุดวิสาขบูชาและวันหยุดชดเชย อย่าลืมออกไปเวียนเทียนทำบุญกันเด้อจ้า
นู๋น้อย กะ คือจะ เลาะแถวเมืองชลบุรีนี้ละ..ลากะทู้นี้ด้วย ดอกบัวสีขาวที่กำลังเบ่งบานเต็มที่เพื่อต้อนรับวันวิสาขบูชา รึ ใด?? ^_^

[จำปา]

พะนะ หาก่อปลูกทันพอกินแล้วหว๋านู๋น้อย

มาไห่ซิมเบิ่งก่อนน่า แซบบ่

[ครูจุ่น]

นู๋น้อย ดอกมันคือดอกบัวตองเนาะ หัวมันคล้ายๆกับหัวหว่านม่วงแมะ เสียดายบ่อมีกลิ่นให่ได้ดม แต่เบิ่งแล้วเป็นตาแซบหลาย

[นู๋น้อย]

:l- ตอบ เอื้อยจำปา..ที่จริงกะยังหัวบ่ใหย่ พอปานใด๋จ้า แต่ว่า มีคนหรือ แมวไปเฮ็ดกระถางคว่ำก่อนกะเลยต้องเก็บมา เสียดายมันบ่ทันใหย่เต็มที่ดี จากที่ลงปลูกจนถึงเวลาพอเก็บ กะ 4 เดือนจ้า

:*- คุณครู ..เท่าที่ฮู้ แก่นตะวัน เป็น พืชตระกูลเดียวกับ ทานตะวันจ้า แต่ จั่งใด๋ คือเป็นหัวคล้ายๆหว่านหรือ ข่า ขิง กะบ่ ฮู้ วิธีการลงหัวบัดคือบักถั่วดิน แต่ดอกเป็นคือดอกบัวตอง อิหลีจ้า แต่...อย่างหนึ่งที่คือ ทานตะวัน กะคือ คายและกะคาย(ระคายเคืองผิว) ฮ๋าๆๆ

[คนบ้านยาง]

แลกกันกับซุปบักเขือใส่ปลาอิฮือบ่ครับผม :ข:)

[ลุนนี ศรีเกษ]

มันบ่อออกแนวขมบ่อแจ๋ว คายกะคาย ยังกุมเอามากิน ควมพยายามสูงเยี่ยมเลยจ้า ป้าว่ามื้อได๋ว่างๆก็อปเอาอาหารเจ้าเทิงเบิดลงซีดีเบิ่งแหน่นา เอาไว้ถ่าแจกเป็นของชำร่วย ตอนกินดองนู๋น่อย อิอิ

[ณัฐ ภูไท]

เบิ่งขอชิมนำจักหนอ่ยแหน่ยำแก่นตะวันน่าสนใจคือกันเนาะคันว่ากินแล้วบ่อว้นหนิ:*-

[pcalibration]

อั่นนี้ ทั้งหมึกแดงและแม่ช้อยไม่ต้องคอย เพราะนู๋น้อยกินหมดแล้ว....
สรรพคุณได้ครอบจักรวาลอีหลีเมนูเผิ่น.....เพื่อสุขภาพอย่างเดียวบ่เกี่ยวกับจ่อยหรือผอม
คอนเฟิร์มแหน่หล่า..อะฮ้า..ได้ยินป้าแดงหว่า กินดองนู๋น้อย..5555555
มื้อได๋น้อสิได้เตรียมโตใส่ส่งยีนส์ไปตู้ดกินซั่นดอกมันจั่งบ่ขาด(ส่งจั่งบ่ขาด)
:b-b:b-b:b-b

[" แคน ชัยภูมิ "]

มาให้อ้ายทดสอบนำจักคำแหน่คุงหนูแจ๋ว...เมิดแล้วบ่:l-:l-:l-:l-

[prayoon]

มันบ่อออกแนวขมบ่อแจ๋ว คายกะคาย ยังกุมเอามากิน ควมพยายามสูงเยี่ยมเลยจ้า ป้าว่ามื้อได๋ว่างๆก็อปเอาอาหารเจ้าเทิงเบิดลงซีดีเบิ่งแหน่นา เอาไว้ถ่าแจกเป็นของชำร่วย ตอนกินดองนู๋น่อย อิอิ

อัน ป้าๆๆ เลายังโสดยุตี้เดอนี่ 555 จะแมนเพิ่นสรรหาแนวกิน มาเฮ็ดให่เบิ่งเนาะ ดี เยี่ยม