มื่อนี้เห็นกระทู้ไปงมแมงดาของอ้ายชาลีกะเฮ็ดให้น้องเขมคิดพ้อแต่สมัยเป็นเด็กน้อยเนาะ
ค่ะฮอดยามไถนาฮุดฝนตกหน่ำแนวนี้แมงดาสิวางไข่นำต้นงวงช้าง ตามไฮ่นาเนาะค่ะ ตาม
บวกควายแหน่ถ้าเห็นมีไข่แมงดาอยู่กะลงมืองมนำเหง้าต้นไม้ที่มันวางไข่หั่นล่ะค่ะ สิมี
แมงดาเฝ้าอยู่แต่เพิ่นว่าโตที่เฝ้าไข่อยู่หั่นเป็นแมงดาตัวผู้ว่าซั่นค่ะ กลิ่นฉุนแฮง ไปงม
แมงดากะต้องซ้อนฮวกนำเนาะค่ะ ฮวกกบโตอ้วน ๆ ในไฮ่นาเว้าแล้วกะเป็นตางึดเนาะค่ะ
คนอีสานเฮากินกบแต่มันเป็นฮวกโตน้อย ๆ พุ่น พอยามดำนาฮวกซุมนั่นใหญ่หน่อยหนึ่ง
กะหามาป่นใส่หน่อไม้ส้มพ่ะน่ะ มันกะยังบ่เบิดฮอดยามดำนาแล้วข้าวพวมเขียวกะไปใส่
เบ็ดกบ มากินอีก จักมันได้ออกแม่แผ่พันธุ์ยามได๋เนาะค่ะ ยามไปซ้อนบ่ได้แต่ฮวกเด้ค่ะ
แมงหล่างำแหน่ แมงก้องแขนแหน่ แมงดาน้อย แมงตับเตา กะปูน้อยเก็บมาเบิดค่ะ ซ้อน
ฮวกพร้อม เก็บผักแขยงป่งใหม่มานำค่ะ พอซ้อนแล้วกะเก็บหมากพริกอ่อน ยอดหมาก
พริกมาแกงใส่ตั่วค่ะ แต่เดียวนี้เฒ่าแม่ว่าหาอึดแฮงค่ะทางบ้านน้องเขมแล้งคัก ฝนบ่ท่องบ่
เทียวปีที่แล้วกะแล้ง ปีนี้กะซงสิแล้งอีกเว้าแล้วกะอิโตน พี่น้องชาวนาเนาะค่ะ ราคาพืชผล
บ่ดี ฝนกะยังบ่ค่อยตกอีก กะจักสิโทษหยังดอกค่ะ ฮ่วย ๆ เว้าเรื่องซ้อนฮวกอยู่ดีๆ คือโงมา
เรื่องปากเรื่องท้องได้น้อบาดนี่ เซาเนาะค่ะ เว้าเรื่องปากเรื่องท้องแล้วมันสิอดโค้งไปเรื่อง
เสื้อสีสิ่ว สีแดง สีแหล่ สีเหลืองบ่ได้ เซา ๆ ค่ะ
Bookmarks