คึดฮอดบ้านสงกรานต์สิมาฮอดเด้หนอ
คึดนำยอดกระหม่อมแก้วใจแป้วห่วงบ่เซา
คึดฮอดหม่อหนึ่งเข่าที่เคยเป่าไฟดัง
เคยได้ฟังมารดาปากจาสอนต้าน
มันหากนานหลายล้นดนมาจากถิ่น
กาฬสินธุ์บ่อนบ้านสถานกว้างแก่วไกล
มื้อนี้ได้เลยยอแต่งแปลงผญา
คิดเถิงเด้มารดาแม่คีงที่เพียรเลี้ยง
บิดามาตายเสี้ยงเหลือเพียงอัฏฐิธาตุ
แสนอนาจอ่าวโอ้โอน้อวัฏฏะวน
มาเหลือตนพระคุณไท้เฮ็ดจั่งได๋สิใจอุ่น
บังสกุลเคยแต่งให้บิดาไท้แต่ก่อนมา
ลูกอยู่ไกลสุดฟากฟ้าหน้าที่มีมาเถิง
แสนฮ่ำเพิงคนิงจิตคิดนำบ่มีม้ม
บ่อาจถมพระคุณไท้ในใจลูกเป็นห่วง
คึดนำดวงยอดเกล้าพระคุณเถ่าลูกบ่ลืม นั้นแหล่ว
ปล. คึดฮอดบ้านยามสงกรานต์กะเมือแหน่ ทานผายแผ่พี่น้องผองท่านผู้ล่วงลา เพิ่นผู้ยังนั้นน่าให้เพียรภาคปรนนิบัติ อย่าให้ขัดประเพณีส่วนดีให้คงไว้ ยามเพิ่นไหวชีวีค้ำอุปถัมภ์ให้เต็มที่ บาดห่าเพิ่นตายหนีแม่นสิมีข้าวน้ำ กะกินได้บ่อส่ำคน นั้นแหลว
Bookmarks