กำลังแสดงผล 1 ถึง 6 จากทั้งหมด 6

หัวข้อ: ...ขอแฮงใจยามเหมื่อยล้า ได้เห็นหน้าบาดคิดถึง...

  1. #1
    ฝ่ายเทคนิคและโปรแกรม สัญลักษณ์ของ บ่าวโจ่โล่
    วันที่สมัคร
    Dec 2006
    กระทู้
    1,961

    ...ขอแฮงใจยามเหมื่อยล้า ได้เห็นหน้าบาดคิดถึง...

    แม่นยากหยังบ่น้อหล้า มีเวลาให้แน่บ่ เพียงแค่ขออยากกล่าวเว้า เห็นหน้าเจ้าให้ชื่นใจ
    อ้ายขอเติมความรักไคร่ ขอแรงใจพออบอุ่น พอเป็นทุนส่งยู้ สู้งานบ้างบาดเหมื่อยแฮง
    บ่แม่นหวังบาทแบงค์ แค่คำแพงพ้อหน้าพี่ คนที่ฮักท่าชีวี เอ่ยวจีมีแต่เจ้า พอได้เว้าว่าคิดถึง
    รอยยิ้มหวานซึ้งชึ้ง พอคิดถึงบาดหล้าหล่อย พอซ่อยแฮงบาดเหมื่อยหล้า คิดฮอดหน้ากะแม่นไค
    หวังได้ยืนนำไกล้ไกล้ หน้าใสใสเจ้าเคียงคู่ คือสิซ่อยคำชู เสียงหวานหูบาดกล่าวเว้า ยามหม่องเศร้าย่านบ่มี
    จากคำเขียนของพี่ จากน้ำสีอักษรส่ง ฝากให้แม่โฉมยง รำรงค์ความรักไว้ อย่าไรร้างบาดเทื่อลืม เด้อน้องเอ๊ย


  2. #2
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    ขอแฮงใจยามล้าพอเป็นยาแก้เมื่อย แหน่เดอ
    พอหายเหนื่อยส่วงเศร่าใจที่เอ้าอั่งทรวง
    เถิงบ่หมายสิทักท้วงให้เป็นบ่วงเสนหา ก็จริง
    ขอแค่เพียงสายตาได้ปากนำกะพอแล้ว
    หนามกะแทวบ่อหวังข่องผ้าไหมยองผืนล้ำค่า นั้นแหลว
    ขอเพียงฝากคำจาพอได้หายเมื่อยเศร่า ขอแฮงเจ้าไว้ตื่มเต็ม

  3. #3
    ดูแลตรวจสอบเนื้อหา สัญลักษณ์ของ โป้ยก่าย
    วันที่สมัคร
    Jun 2007
    กระทู้
    1,619
    ยามใด๋อิดเมื่อยล้าขอเวลาอ้ายได้บ่
    ขอแฮงใจยามเมื่อยท้อพอมีให้แน่บ่นาง
    เพียงได้ขออยู่ข้างให้เบาลงจักหน่อย
    เอาเสียงออยแอ่วเว้าปรึกษาเจ้ายามเมื่อยใจ
    เติมพลังบาดยามใกล้เติมหัวใจมีแฮงต่อ
    ขอเวลามาอยู่ใกล้ให้ใจอ้ายซื่นบาน นางเอ้

  4. #4
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    คือสิได้อยู่ดอกคร๊าพี่มหาฯคนหล่อ
    น้องสิขอยกยื่นบ่ฝืนอ้ายบ่าวพะอวน
    คันสิซวนเมือบ้านสงกรานต์น้องว่างอยู่
    สิพาขึ้นรถตู้หรือสิขึ่นนั่งรถเก๋ง
    ให้เจ้าเล็งไว้เด้ออ้ายย้านรถตายอยู่สี่แยก
    ย้านหน้าแตกซั้นดอกพี่ โอนางนี้หล่ะคึดนำ อิ อิ

  5. #5
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,363
    บล็อก
    23
    (ฮ่าๆๆ)สงสัยน้องสานสะตี้..เคยมีประสบการณ์เลยเตือนอ้ายยุทธไว่ล่วงหน้า.....อยากตอบผญาทั่นปรมครูทั้งหลายเด่ะ หากยังคึดบ่ออก ..มีแต่ผู่คักๆ.เนาะ:g

  6. #6
    ดูแลตรวจสอบเนื้อหา สัญลักษณ์ของ โป้ยก่าย
    วันที่สมัคร
    Jun 2007
    กระทู้
    1,619
    ท่านศรีเอ้ยความในใจกะว่าอยากไปเป็นเขยก้ำ
    เมืองกาสินหม่องคนซ่าว่าสาวงามลื่นล้นไปขอส้นฮ่วมเฮือน
    ไปเยื่อมเยือนเฮือนซานเจ้าไปเอาปลาแหลงหาว้าน
    กินก้อยปลาซุมหมู่บ้านให้บานเนื้อม้วนใจ
    ปลาค่อใหญ่เข็งขี้ก้างปลานางแดงพอมีบ่
    หรืออี่พ่อยู่บ้านเลาขายแล้วฮอดบ่เหลือ ท่านเอ้ย



    แม่นพอมีอยู่ตั้วหนองปลา บ่แม่นอี่แม่เลาเอาไปประมูลขายทอดตลาดเหมิดแล้วบ่ อิอิ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •