หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 20

หัวข้อ: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

  1. #1
    บ่าวสายฟ้า
    Guest

    รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    ห่างหายไปนาน กลับมาอีกที กับคำผญามาเต็ม ถง....... 8)

    "อยากกินน้ำแซบให้ขุดน้ำบ่อหิน อยากมีอยู่มีกินให้เอาศีลเป็นทุนไปค้า อยากขึ้นสวรรค์ชั้นฟ้าให้ฆ่าเจ้าของเอง"
    "เกลี้ยงแต่นอก ทางในเป็นหมากเดื่อ หวานนอกเนื้อ ในส้มจั่งหมากนาว"
    "ฟังยินนกอีเอี้ยง กินหมากโพธิ์ไฮ แซวแซวเสียง บ่มีโตฮ้อง แซว แซวฮ้อง ตัวเดี่ยวหมดหมู่"
    หรือ
    "อยากกินปลาขาว ให้แบกแหขึ้นโคก อยากตกนรก ให้เข้าวัดฟังธรรม"
    "คันสิคอยแต่บุญมาค้ำคันบ่ทำกะบ่แม่น คอยแต่บุญส่งให้ มันสิได้บ่อนได๋ คือ จั่งเฮามีอาหารไว้บ่เอากินมันบ่อิ่ม มีลาบ คันบ่เอาข้าวคุ้ยทางท้องบ่ห่อนเต็ม"
    "คันเจ้าเป็นสาวนั้น ครองธรรมให้มันคล่อง ตีนผมให้หล่ำเกลี้ยง ตีนซินให้หล่ำเพียง"
    "ขุนหาญห่าวครองเมืองจั่งเฮืองหุ่ง ขุนขี่ย่านแม่นครองบ้านกะบ่เฮือง"
    "คันสิเป็นขุนให้ถามดูพวกไพร่ คันแม่นไพร่บ่พร้อมแปลงบ้านกะบ่เฮือง"
    "คันแม่นมีความรู้เต็มพุงเพียงปาก กะตามถ่อน คันแม่นสอนโตเองบ่ได้ใผสิย่องว่าดี"
    "คันเจ้ามีความฮู้อย่าถือโตอวดอ่ง ให้ลงมาสู่พื้นยืนดินได้ส่ำสู่คน"
    "คันแม่นสังโฆเจ้าบ่ถือคลองคำสวด แม่นสิบวชฮอดเฒ่าบุญเจ้ากะบ่มีดอกนา"
    "คันแม่นบวชมาแล้วให้ถือฮีตคำสอน อย่าได้ผิดครองธรรมแห่งองค์พุทโธเจ้า"
    "มีเงินเต็มภาช์ บ่ท่อมีผญาเต็มพุง" (มีเงินมากมาย ก็ไม่เท่ามีความรู้สติปัญญา)



    หญิง : แม่นเจ้าเนาหนห้อง สถานถิ่นเมืองใด อ้ายเอย ใจประสงค์สังนอ จั่งด่วนมาทางนี้
    ชาย : อ้ายกะเนาหนห้อง ร้อยเอ็ดคำก้ำบ้านอยู่ พุ้นแหล้ว ใจประสงค์อยากได้ชู้ กะเลยล้ำล่วงมา น้องเอย


    หญิง : อ้ายนั่นเกลี้ยงแต่นอก ทางในเป็นหมากเดื่อ เจ้านั่นเกลี้ยงปากบั้ง ขังข้อปากกะทอ นั่นแหล้ว
    ชาย : อ้ายนั่นเกลี้ยงฮอดใน ใสฮอดกระดูก เกลี้ยงฮอดลูกอ่อนน้อย หลานสิห้อยกะบ่มี นั่นแหล้ว

    หญิง : อย่ามาตกกล้าไว้ เพิงโพนให้น้ำแช่ อย่ามาหว่านกล้าไว้ ในน้ำให้ปลวกกิน หลายถ้อน
    ชาย : ชาติที่ชายเช็งกล้า วาจาต้องมั่นเที่ยง ความเว้าหลุดจากปากแต่ละครั้ง เป็นความมั่นเที่ยงจริงน้องเอ้ยฯ

    "การศึษาของอ้าย กะจบเพียงปอสี่ โตกะดำขี่หลี่ บ่สมเจ้าผู้มั่งมี ดอกตี้
    "ครั้นบ่ ออกจากบ้าน บ่เห็นด่านแดนไกล ครั้นบ่ไปฮำเฮียน กะบ่มีความฮู้"


    ยามยังน้อย ให้เจ้าหมั่นเฮียนคุณ
    บุญเฮามี สิยศสูงเทียบฟ้า
    ไปทางหน้า หาเงินได้ล้านหมื่น
    ไผผู้ความฮู้ตื้น เงินเบี้ยบ่แก่นถง


    ครั้นแม่นมีความฮู้ พาโลเฮ็ดบ่แม่น
    ความฮู้ท่อแผ่นฟ้า เป็นบ้าท่อแผ่นดิน
    คือดั่งลิงเห็นแก้ว มณีนิลใสส่อง
    บาดได้มาแท้แท้ คมเล่นดั่งเม็ดดิน"...ฯลฯ



    "เป็นกษัตริย์สร้าง ครองเมืองตุ้มไพร่ ทศพิธธิราชไท้ พระองค์ได้ฮีนตรอง"

    "ครั่นเจ้าได้ขี่ช้าง กั้งห่มเป็นพระยา
    อย่าได้ลืมคราวทุกข์ ขี่ควายคอนกล้า
    ครั่นได้เป็นใหญ่แล้ว อย่าลืมคุณพวกไพร่
    ครั้นแม่นไพร่บ่พร้อม สีหน้าบ่ฮุ่งเฮือง
    เพิ่นแต่งให้ ฮักษาเมืองปลายด่าน
    อย่าได้มอบบ่อนบ้าน เมืองให้แก่โจร"


    "พี่น้องเอ้ย
    บุญบุญนี้ บ่อมีไผสิปันแจกกันได้แล้ว
    บ่ห่อนแหกเคิ่งได้ คือไม้ผ่ากลาง
    คือจักเฮากินเข้า เฮากินกะเฮาอิ่ม
    บ่อห่อนไปอิ่มท้อง เขานั้นผู้บ่อกิน ได้แล้ว"


    "ผัวเมียนี้กู** อย่าได้ว่า
    มีแต่ค้อยและเจ้า คำเว้าให้ฮีนตรอง
    ให้เจ้าเดินตามครอง คนเฒ่าชรากาลเฒ่าแก่
    พ่อแม่สอนสั่งไว้ ตัวเจ้าอย่าสิลืม"


    "ฮักษาศิลเอาไว้ ภาวันนาเฮ็ดใจเที่ยง
    สลึงเดียวกะบ่ได้ซื้อ เสียเงินซ้ำจั่งแม่นบุญ
    สมถะวิปัสสนาพร้อม เป็นการไกลกิเลส
    ละให้หลุดลดให้เกลี้ยง ผลได้แม่นนิพพาน"


    "อยากกินข้าว ให้ปลูกใส่พะลานหิน
    อยากมีศิล ให้ฆ่าพ่อตีแม่
    อยากมีคนแว ให้ฆ่าหมูเดียวกัน
    อยากมีสีสัน ให้นอนดินเกลือกฝุน
    อยากอุ่น ให้อาบน้ำยามหนาว
    อยากกินปลาขาว ให้แบกแหขึ้นโคก"...ฯลฯ


    "เทียวทางบ่สุดเส้น อย่าถอยหลังให้เขาเหยียบ ตายขอให้ตายหน้าพุ้น เขาจั่งหย่องว่าหาญ"

    "ทุกข์ยากฮ้าย เขินขาดแลงงาย พริกอยู่เฮือนเหนือ หมากเขืออยู่เฮือนใต้ หัวสิงใคอยู่เฮือนเพิ่น ขอข้าวได้เกลือจ้ำกะบ่มี"

    "ทุกข์ยากฮ้าย ให้ได้อยู่นำกัน กอยมันมี จั่งค่อยหามาเลี้ยง"...ฯลฯ


    "ครั้นเจ้าได้ขี่ช้าง อย่าลืมหมู่หมูหมา
    ห่าขโมยมาเฮือน สิเห่าหอนให้มันย้าน
    บัดห่ากวางฟานเต้น ตามทางสิได้ไล่
    บัดห่าได้ต่อนซิ้น ยังสิได้อ่าวคุณ"


    "ฮู้ว่าบุญโตหน่อย สมภารโตมันต่ำ ตัวกะต่ำเตี้ย หลบลี้อยู่เดียว"
    "เฮาเป็นศิษย์ควรฮู้ บูชาครูผู้สอนสั่ง เฮ็ดตามคำบอกไว้ ศิษย์สิได้ฮุ้งเฮือง"
    "เฮาผู้น้อย ให้ค่อยเพียรถาม คนสิงาม หย้อนความอ่อนน้อม คิดอ้อมป้อม บ่มีไผชม"


    กราบลาแล้ว จบผญาไว้สาก่อน
    ตอนหน้าพุ้น จั่งมาพ้อพบกัน
    ผมสิอาสาค้น หาผญามาให้อ่าน
    เอาจากฮั่นจากหนี่ มาให้ได้อ่านกัน
    เป็นจังใด๋แหล่ว มีดีอยู่แน่บ่
    ขอจงนักปราชญ์เจ้า แนะนำบ้างแน่เด้อ
    ผมผญายั่งหน่อย สิขอขอยแก้โตใหม่
    คงสิได้พบพ้อ หากบุญข่อยอยู่ ยัง....ฯ

    ปล. สายฟ้าห่างหายบอร์ดนี้ไปนาน ประทานอภัย เพราะไปทำการบ้าน...

    [wma=380,50]http://somdeey.googlepages.com/by1.wma[/wma]


  2. #2
    ศิลปิน นักร้อง นักแสดง
    มิสบ้านมหา 2011
    สัญลักษณ์ของ ผู้ก่อการรัก
    วันที่สมัคร
    Feb 2006
    ที่อยู่
    HappyLand ดินแดนแห่งความสุข, Thailand
    กระทู้
    3,379

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    ตามมาอ่านค่ะ แปลไม่ออก เด๋วแปลให้อ่านด้วยนะ

  3. #3
    ฝ่ายบริหารระดับสูง สัญลักษณ์ของ ตรี ศรีเมืองใหม่
    วันที่สมัคร
    Apr 2006
    ที่อยู่
    หนุ่มอุบล คนศรีเมืองใหม่
    กระทู้
    4,876

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    แจ่มมากครับภูมิปัญญา ไทยอิสานบ้านเฮา มาช่วยกันสืบสานไปจนชั่วลูกหลานเด้อครับ

  4. #4
    adinant
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    ขั้นอัดเป็นเสียงเว้าม่วนๆ ประกอบคือสิได้บรรยากาสดีเน๊าะลุงว่า

  5. #5
    บ่าวสายฟ้า
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง กระทู้ต้นฉบับโดยคุณ ลุงแด๊กส์
    ขั้นอัดเป็นเสียงเว้าม่วนๆ ประกอบคือสิได้บรรยากาสดีเน๊าะลุงว่า
    หาคู่ ผญา บ่ทันพ้อครับ เอาคือเล่นบ่ครับ ซั่น คนเดียวหลายเสียง เทิ่งหญิงเทิ่งชาย

  6. #6
    adinant
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    555 หาสมัครแถวบ้านมหานี่สิบ่อมีติ้

  7. #7
    บ่าวสายฟ้า
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง กระทู้ต้นฉบับโดยคุณ ลุงแด๊กส์
    555 หาสมัครแถวบ้านมหานี่สิบ่อมีติ้
    บ่มีไผเว้าเป็นครับ

  8. #8
    จอนฟอนน้อยขี่ดื้อ
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    เอ้ย...สายฟ้าเอ้ย จอนฟอนเว่าผญาม่วนใด๋ กับสารพัญญะเด้อ ฮ่วย คุณครูส่งไปประกวดพู่นใด๋ หลวงพ่อกะฮัก คันจอนฟอนเป็นผู้ชายจอนฟอนคือสิได้เป็นมหา อันนี้ย่อนเป็นผู้ยิง เลยได้เป็นแต่นักธรรมโทซือๆๆ

  9. #9
    adinant
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    เอาสะหล่ะหล่ะ ว่าอัดเสียงให้ลุงฟังแน่ตี้

  10. #10
    บ่าวสายฟ้า
    Guest

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง

    Re: รวมผญา ทั้งที่รู้ และไม่รู้ กลับมาตามรอยอีสานเหมียนเดิม สายฟ้าผ่าแล้ง กระทู้ต้นฉบับโดยคุณ จอนฟอน
    เอ้ย...สายฟ้าเอ้ย จอนฟอนเว่าผญาม่วนใด๋ กับสารพัญญะเด้อ ฮ่วย คุณครูส่งไปประกวดพู่นใด๋ หลวงพ่อกะฮัก คันจอนฟอนเป็นผู้ชายจอนฟอนคือสิได้เป็นมหา อันนี้ย่อนเป็นผู้ยิง เลยได้เป็นแต่นักธรรมโทซือๆๆ
    มามา ซ้อมใส่กัน ดู้ คือสิคักแท้น้อ

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •