โป้ยก่ายมาถามหา

[โป้ยก่าย]

สุขีหมั่นเสมอมันคือเก่าแน่บ่น้อ
บ่ได้มาพบพ้อหลายมื่อแต่ห่างไกล
ย่านจำกันบ่ได้โดนเทื่อได้มาเห็น
ย่อนมีแนวจำเป็นได้ห่างไกลหลายมื้อ
คือสิจำกันได้บ่ไลลืมกันง่ายตี้น้อ
บ่าวหนองคายผู้นี้เคยจาต้านจ่ายผญา
คนที่เคยเห็นหน้าคนเคยจาเว้าต่อ
แม่นจำกันได้บ่น้อหรือลืมแล้วบ่กล่าวหา พี่น้องเอ้ย

[ไอ้เก่ง คนเลย]

โอย...........ยังนึกบ่ออก เดี๋ยว..สิมาต่ผญาให้ครับ

[ต่าย]

พี่โป้ยจ๋า)))))).......
พี่น้องคองคอยถ่า รออ้ายมาผญาหวาน
คนเขารออ้ายเบิ้ดบ้าน ไปเฮ็ดหยังอยู่น๊ออ้าย
ต่ายมาจอบตั้งว่าโดน เห็นแต่คนเพิ้นเว้าว่า
พี่ชายต่ายมาบอกลา ไปหาผู้สาวอยู่บ้านใต้...
หัวใจชายคือสิฮ่ำฮ้อน ฮอดยามนอนได้แต่พลิกคิง
ที่แท้พี่อ้ายคึดฮอดแม่ญิง คนตาฮักผู้อยู่ใกล้ๆ..
..........................อิอิ ...พี่โป้ยจ๋า..แม่นบ้อ..ฮ่าๆๆๆ::)

[โป้ยก่าย]

หล้านางเอ้ยมันหากเป็นหยุ่งหยุ่งรุงรังนำหลายอย่าง
หยุ่งนำเรื่องต่างๆเทิงพ่องเหนือพ่องไต้ไหลท้อนอั่งโฮม
มันหากหนีบ่ม่มเวียกไฮ่นาสวน ยากนำงัวนำควายไฮ่นาปาท้าง
แต่ว่าทางใจนั้นยังสัมพันธุ์มั่นแก่นย่อนแล่นพุ้นแล่นพี่บ่มีมื่อพักเซา
อ้ายยังคิดฮอดเจ้าผู้เคยเล่าคำผญาผู้เคยจาดอมกันแม่นบ่ลืมลงได้ นางเอ้ย

[pruet]

พี่น้องเอย ดินมาดีใจล้นมีคนเอ่ยคำผญา
เผยวาจาพาทีม่วนหูบ่เซาแล้ว
ซ่วยกันเด้อมวลเจ้า บ้านมหาของเฮาให้คนเว้าเขาส่า
ว่าบ้านมหานี่นา......มรดกโจ้โก้....ออนซอนแท้ว่าซื่นซม สั่นแหลว
ดินครับ

[โป้ยก่าย]

พี่น้องเอ้ยอี่สานเฮายังบ่สิ้นวาทศิลนักปราชญ์
ยังบ่ขาดซาติเซื้อดำรงค์ไว้บ่เซื่อมสูญ
คอยเพิ่มพูลถนอมสร้างทางผญาสืบทอด
ตลอดเทิงฝ่ายก่ำเรียนรู้ศาสตร์สิน
ซ่อยกันยินดีสร้างเดินนำทางอย่าป๋าปล่อย
ข้ายังเป็นผู้ด้อยอาศัยท่านผู้เก่งเรียนท่านเอ้ย