...ผู้ใดผะอืดผะอม เลือดลมบ่สะดวก ขมปากลิ้นเฝื่อน ผู้ข้ากะเลยเอาของว่างมาฝากมื้อนี้ ตำหมากยอศรีสะอื้น สูตรพ่อใหญ่ศรี อิ อิ อิ รับรองกินแล้วสิสะอื้นทรวง...
วัสดุอุปกรณ์
๑. ครก สาก ช้อนบ่วง ( ล้างก่อนแหน่หล่ะ ครกกะดาย ผั่นสิเฮ็ดอึ๊จึ๊อยู่ )
๒.หมากยอเหิ่ม หรือสุกแต่บ่ทันเละ ๕ หน่วย (แล้วแต่สิกินหน่อยกินหลายคน) ถ้าคนเดียว กะประมาณ ๓-๔ หน่วย เพราะเนื้อมันหน่อย
๓.หมากม่วงดิบ ยี่ห้อใด๋กะได้ว่าแต่ส้ม ๑ หน่วย ถ้าเป็นหมากม่วงน้อยกะประมาณ ๑-๒ หน่วย
๔.หมากพริกแห้ง ๓ ๕ หน่วย คั่วก่อนจักหน่อยกะได้
๕.กระเทียม ๑ กลีบ
๖.เกลือ ปลาแดก น้ำปลา ผงชูรส
วิธีเฮ็ด
๑. ล้างหมากยอให้สะอาด ยำ(สับทั้งเปลือก ฝานเอาแต่เนื้อ
๒.หมากม่วงส้มฝานเปลือกล้าง ยำแล้วฝานเอา กะว่าพอให้ตัดเฝื่อนหมากยอ หรือให้ส้มจักหน่อยกะแล้วแต่มัก
๓.ตำหมากพริก กระเทียม เกลือ ให้แหลกพอประมาณ แต่ระวังอย่าฟ้าวใส่พริกหลายเพราะหมากยอบ่มักเผ็ด ใส่หน่อยๆกะสิเผ็ดแฮงกว่าแนวอื่น
๔.เอาหมากยอลงตำให้พอซ้ำ แล้วเอาหมากม่วงลงใส่ตำให้เข้ากัน
๕.ใส่น้ำปลาแดก น้ำปลา ผงชูรส ชิมเบิ่ง คันยังมีรสเฝื่อนหมากยอหลายกะเติมหมากม่วงลงไปอีก ชิมเบิ่งได้แล้ว ตักใส่จาน...แล้ว....
...เอาไปนั่งกินผู้เดียว...อย่าเอิ้นไผ อยากอายเขาเพราะว่าเทิงเผ็ดเทิงฮ้อน(หมากยอเป็นยาฮ้อน) จักน้ำหูนำตา ย้อยยามหย่างอยู่ อิ อิ แซ๊บแซบ กินยามบ่ายๆ แก้ง่วงดีปานหยัง
หมายเหตุ ถ้าบ่มีหมากม่วงกะเอาแม่มดแดงคั่ว หรือหมากนาวใส่แทนกะได้ แต่สูตรนี้บ่ใส่มดแดง..ย้านบาป บ่อยากเอาชีวิตสัตว์เป็นร้อยเป็นพันมาสังเวยความอยากเจ้าของ เหอ ๆ ๆ (มีคนหลับตาซัง..ฮู้อยู่) หมากยอถ้านำมากินสดๆซื่อๆ มันกินยาก เพราะมีรสปร่า เฝื่อน แต่มีฤทธิ์ร้อน โบราณเพิ่นจั่งหาของส้มมาตัด ตำใส่พริกเขือเกลือปลาแดก เพื่อให้น่ากินขึ้น สำหรับสรรพคุณทางยา ไปหาซอกเบิ่งเอาเด้อคะรับ เพียงขอเน้นไปทางอาหารก่อน
Bookmarks