ได้เห็นหน้าน้องหนึ่งครั้งยังฝังแนบในดวงจิต
วันคืนนอนอาวรณ์คิดห่วงคะนึงแต่นำน้อง
หัวใจของพี่ชายกลุ้มพอปานไฟสุมแกลบ
อกอ้ายแทบสิแตกม้างเพราะนางน้องเจ้าผู้เดียว
บ่แม่นอ้ายนี้เว้าเกี้ยวเรี่ยวลอกคารมหวาน
เอาน้ำตาลมาลวงล่อมดตายติดหม้อ
บ่แม่นชายนี่มาล่อลวงอนงค์ให้หลงเซื่อ
บ่แม่นเสือหลอกต้มได้ซมซ้อนแล้วแล่นหนี
ดวงใจของพี่นี่แน่วแหน่บ่แปลผัน
ปากกับใจตรงกันแน่นอนเลยทางอ้าย
ย่านแต่สายคอน้องบ่หมายปองประสงค์พี่
ย่านคนดีหลอกให้อ้ายตายย่อน เพราะรักเธอ
ย่านแต่ตั๋วให้พี่เพ้อละเมอป่วงทรวงกระสัน
ตั๋วให้ฝันอยู่คนเดียวเพิ่นบ่เหลียวแลซ่ำ
แนวกาดำคืออ้ายหมายปองหงษ์เหมราช
ปรารถนาอยากฮ่วมซ้อนคอนคู่ได้อยู่เคียง
หากสาวนางน้องบ่เตื้องทางเบื้องพี่นี่คงตรม
รักบ่สมอุราหวัง ดังมะโนที่หมายไว้
ขืนอยู่ไปบ่เป็นแหล่วแนวหัวใจพี่มันโศก
เพราะโรคความรักกลุ้มสุมไหม่อยู่ดังไฟ
ความหวังพี่หากบ่ได้ดังใจปรารถนารัก
ขอสมัครแต่ทางตายบ่รักไผอีกเลยน้อง
ผิดจากทองนางหล่าบ่แลหาให้มันอยาก
หากชาตินี่บ่ได้เจ้าบ่คองเฒ่าแก่ตาย
ชีวิตของหม่อมอ้ายคงถึงที่อาวะสาน
อยู่ไปนานบ่ทนไหวเพราะว่าใจพี่มันแย่
อกเป็นแผลหนองห่ง นวลอนงค์น้องเหินห่าง
ไมตรีจางจืดจ้อยสิลอยหน้าอยู่จั่งได๋
อ้ายนี่อยู่บ่ได้ดอกน้องอุ่นทูนหัว
คอบว่ามัวเมาหลงรักแต่นงค์นางน้อง
ใจพี่ปองประสงค์ซ้อนดอนเสือกะสิผ่า
ปรารถนาต่อตั้ง วังแข่พี่สิลอย
แม่นสิดอยผาขั่นพันดอยอ้ายบ่หวั่น
กำแพงสูงร้อยชั้นตันไว่พี่สิปีน
ภูผาหินเหวกว้างทะเลหลวงฉลามโหด
ลึกแสนโยชน์อ้ายบ่ย่านสิหาญกล้าเข้าฝ่าฟัน
แม่นสิทุกข์ฮ้อยซั้นพันหมื่นอุปสรรค
โสตกลงปลงใจรัก บ่หวั่นเลยทางอ้าย
ขอยอมตายแต่ดอมน้องบ่หมายปองเป็นอื่น
ทุกวันคืนรักแต่เจ้าตะผองเฒ่า ละหมิ่งมรณ์
Bookmarks