เหมิดแฮงใจ

[โป้ยก่าย]

ธาราล้นไหลนองโถมทั่งพี่น้องเอ้ย
นั่งกอดเข้าก้มหน้าอุราเศร้าบ่วาย
สายชลไหลอาบท้วมเฮือนซานบ้านซ่อง
หลุโตนเด้พี่น้องเฮือนห้องจุ่มจม
ไฮ่นาสวนมาหล่มจมลงชลน้ำแก่ง
เหมิดแฮงใจแล้วเทื่อนี้บ่มีหม่องเพิ่งพา
ทุนเฮ็ดนาเป็นหนี้ ธ.ก.ส.มาอุกอั่ง
เหมิดความหวังแล้วเทื่อนี้เต็มทีข้อยกะซ่างเป็น พี่นัองเอ้ย

[ติ๋ม เปอร์โย]

เป็นแฮงใจให้อ้ายฮักเสมอจ้า...ซำบายดีบ่อ้ายจารย์ กินข้าวแล้วยังน้อ....

[เจ้าซายน้อย]

ฝนตกมาน้ำกะท่วม ไหลมารวมท่อนทางลุ่ม
เจ้าของบ้านได้นั่งกลุ้ม น้ำรุมเข้าแม่นเจิ่งนอง
โลกตัดขาดจากพี่น้อง เทิงน้ำไฟกระบองปิดซี่หลี่
ถนนหนทางที่เคยดี กะเลยมาขาดฮ้าง หย่อนน้ำม้างให้หมุ่นเพ พี่น้องเอ้ย

[หลานพระรถ]

แฮงใจ...เติมด้วยกำลังใจ
แฮงกาย...เติมด้วยพลาหาร
หมั่นเติม...แฮงใจด้วยใจ
แล้วแฮงใจ...สิบ่มีวันหมด
สู้ๆๆ...จ้าอ้าย

[หนุ่มลำซี]

เป็นตาหลุโตนพี่น้องชาวไฮ่ชาวนาครับปีนี้น้ำแฮงคับ
โทรเมือบ้านตอนเช้านี่เพิ่นบอกวาน้ำสิถ่วมบ้านเฮาแล้วเด้อบักหำ
ไจแทบสลายพี่น้องเอ้ย..เหลียโตนผู้เฒ่าสองเฒ่าครับ
เฮ็ดนามายากๆ กะสิมาถึกน้ำท่วมหนีเหมิด บ่เหลือจักอย่าง
เหลือแต่หนี้ ธกส คิดเมิ่งแล้วกะสะท้อนไจน้อพี่น้อง

[Queenie]

อ้าย โป้ยก่าย..... แต่งกล่อนม่วน ค่ะ น่าเหงใจ พี่น้องทางบ้านน้อ ฝนดี กะท่วม บ่ตกกะบ่ได้ เฮ็ดนา บ่มีหยั่งพอดี

[ศรีเวฬุคามมุนี]

ฟังเสียงข่าวป่าวฮ้อง ว่าน้ำนองไหลล่อง
ไหลล้นคลองห้วยเค้า ทั่งโถมเข้าขอกคาม
ผู้เพิ่นอยู่ใกล้น้ำ เลยหน้าก่ำโทมนา
ทั้งเคหาคาเม ถืกพัดเภท์พังล้ม ฯ

[เจ้าซายน้อย]

ฝนหลงฟ้า ชลธาหลงฝั่ง
ไหลถั่งโถมหมู่บ้าน เป็นตาย่านอีหลี
ทุกมื้อนี้ ข่าวหน้าหนึ่งหนังสือพิมพ์
อ่านแล้วหลงสะเทือนใจ อุทกภัยผลาญบ้าน
เฮือนและซานสูญสิ้น โคลนหรือดินน้ำทะลัก
ภรรยาสุดที่ฮัก พ่อแม่ทั้งลูกเต้า จมน้ำต่อตา
แต่มื้อวานยังพ้อหน้า คุยม่วนสนุกกัน
เดิ๊กข่อนนอนกะกำลังฝัน เงียบงันเย็นจ้อย
ประชาชนหลายร้อย บ่มีไผสิฮู้เมื่อ
งัวควายเป็ดไก่เย้า หมาเฒ่ากะเหล่านอน
คราวสิเกิดเดือดฮ้อน ผีป่าสวาปาม
ฟ้าคำรามระงมฝน หมู่คนกะหลับสิ้น
ฝนตกรินบ่ยอมเอื้อน แนมหาเดือนกะมืดมิด
เมโฆปิดบ่เปิดฟ้า ฝนกะบ้าอยู่บ่ถอง
เดชะบุญของพี่น้อง ผองถิ่นดินไทยแลนด์
แหม่นสิแสนความทุกข์ กะผ่านไปจนม้ม
ความระทมน้ำตาย้อย พ่อเฮาคอยซับบ่อย่า
องค์ราชาเทิดไท้ ลูกขอไหว้นบคุณ

[โป้ยก่าย]

ฝนฮวยโห่งไหลลงทามเป็นน้ำแก่ง
บัดฮ่ายามฟ้าแล้งสังมาแห่งไง่ดิน แท้น้อ
บ่มียามสูญสิ้นมวลมนุษย์โลกา
เวทนาทนทุกข์เผ่าผองมูลเซื้อ
เหลือแต่ดำนาไว้ไถโพนขุดก้น
ฝนเลยมาซะล้างนาน้อยได้จุ่มจม
ว่าสิหนีให้ม่มหนี้เก่า ธ.ก.ส.
พอได้มีเงินทุนผัดเล่าสูญเสียซ้ำ
จักแม่นกรรมหยังฮ้ายแต่ปีกลายฝนบ่หยาด
ไถคาดดำไว้แล้วมาตายแห่งเคิ่งกลาง
อุกหลายเด้พอปานมีแนวค้างคาคอแค้นจ่อล่อ
บ่มีแนวสิจ่ายหนี้ยังมีเบี้ยเข้าทับถม
สมหัวใจพออยากขายนาถิ่มไปเกาหลีนำเพิ่น
ไปหาเงินรับจ้างสตางค์แบงค์ต่างแดน
วางเงินแสนให้นายหน้าบัดกลับมาย่านมือเปล่า
เห็นเขาลือซ่าเว้าให้เขาต้มจนเปลื่อยตาย

[คนเมืองแปะ]

ยุบ้านผมเฮ้ดนาแล้วบ่มีฮอดน้ำ ได้สูบน้ำใส่ข้าว พอใกล้สิได้เกี่ยวจักน้ำมาแต่ทางได๋ ไหลมาบ่พออาทิตย์ท่วมข้าวเบิดเลยแมะ จักสิเฮ้ดแนวได่คือกันละคับ ...ถึงเฮาสิบ่เหลือหยังแล้ว แต่ว่าเฮากะยังเหลือครอบครัว...(เอามาจากโฆษณา) อิอิอิ:)::)