กำลังแสดงผล 1 ถึง 4 จากทั้งหมด 4

หัวข้อ: ดินสีอรุณ ตอน 5

  1. #1
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64

    ดินสีอรุณ ตอน 5

    ต่อจากตอนที่แล้ว

    ดินสีอรุณ
    นิทานธรรมบท สำนวนอิสาน

    ตอนที่ ๕
    (เชยชมนารี, ฤทธีความรัก)


    เชยชมนารี

    ในตอนนั้น
    สายพระเนตรก่ายเกี่ยวกษัตริย์ใหญ่ได้แลเห็น
    เป็นที่พอพระทัยหลายบัดล่วงกรายมาแล้ว
    นางนั้นเป็นไผแหล่วพงษ์พันธ์ผู้ได๋หนอ
    มีคู่ครองแล้วบ่ มีผู้จองยอดหญ้าสามีซ้อนฮ่วมเขนย

    อยากสิเผยจาต้านนำนงคราญสาวบ้านป่า
    พระทัยองค์พระราชาคือสิเภท์แตกม้างบัดยามช้างห่างหนี
    โอ้ว่าจี้เอยจี้.. ทูลหัวพี่จอมขวัญ
    อยากสิชวนนางกลับไปอยู่ปรางค์ดอมอ้าย

    ว่าแล้วทรงสารผ่ายฮีบเสด็จเร็วไวนิวัตน์เขตสถานถิ่น
    เทศน์นิทานเรื่องดินสีอรุณมื้อนี้สิเป็นแท้จั่งได๋
    บัดนี้เซาพักไว้สาก่อนบ่อนพ้อกัน
    โปรดติดตามตอนสำคัญต่อกันเป็นเรื่อง

    หยุดสำเนียงสำนวนแหล่สิแวลงโค้งต่าว
    กล่าวไว้เพียงย่อๆ พอแล้วสิพักเซาแล้วน่า ศรัทธาโยม

    ฤทธีความรัก

    กล่าวถึงองค์เอกฟ้า
    พระยาใหญ่โกศล เสด็จถึงเวียงวัง
    โลดอั้งในพระทัยกลุ้ม ฯ
    มรสุมรุมเร้า
    ความฮ้อนเฮ่งมาเผา ทวีเอ้าเข้าหลายด่าน
    นับมื้อทุกข์ทรมาน แนวเห็นสาวบ่ได้เว้า
    คือกินข้าวขาดปลา ฯ
    ว่าแล้วบ่อยู่ช้า เอิ้นใส่ไทยขุน
    สูจงไปถามหา แล้วเร่งมาจงได้
    ไผคือกกกอเหง้า วงศ์วานบ้านอยู่
    นางมีแฟนมีชู้ สูจงฮู้ว่าสู่อัน ไทขุนเอ๋ย ฯ

    นี่ละพ่อแม่เอ้ย
    เพิ่นว่าความฮักกันนี้กะสุขดีแสนสิกล่าว
    บ่าวและสาวหนุ่มน้อยแพงกันไว้ดั่งตา
    ฮักกว่าดินกว่าฟ้าสุดสิว่าบัดสมหวัง
    บัดฮักพังกะเลยเภท์ดั่งทะเลลมคลื่น

    แสนสิกลืนกินได้
    พ้อคนฮักยามได๋ใจกะชื่นบานแบ่ง
    ฮักกันมาแฮงๆ เลยคิดเห็นแต่ดวงหน้า
    ย้านเป็นบ้าป่วยตาย

    อันความฮักนี้กะคล้ายบุบผชาติที่หอมหวน
    ชวนให้เด็ดดมดอม ดอกดวงพวงพั้ว
    บางทีมัวคือฟ้าบัดยามฝนสิสิ้นสั่ง
    ยามฮักพังซังกันซ้ำ กรรมเอ้ยกะซ่างเป็น แท้น้อฯ

    ในตอนนี้
    พระราชากะบ่เว้นได้ตกหว่างทางฮัก
    หลงมัวมักเมียเขา เมียเก่าโตกะมีซ้อน

    สั่งให้ขุนจรผ่ายไปสืบสวนหลิงลายหมายซมเจ้าผู้งามยิ่ง
    ขุนกะทูลความจริงว่านงค์นางมีผัวแล้วเป็นเมียแก้วคู่ขวัญ

    ชายผู้เป็นผัวนั้นหากแม่นหนุ่มทุกข์จน
    ทั้งสองคนฮักกันหลายแม่นตายแทนกะยอมได้

    ไผอย่าหาญมาม้างความฮักของหนุ่มนาง เมียแก้วผัวมิ่ง
    พระราชาทราบความจริง
    พระทัยเคืองขุ่นไหม้พิโรธฮ้ายใส่ทัณฑ์

    แล้วกะปูนแปลงปั้นสารสั่งบัญชา
    “สูจงนำบ่าวบามาสู่โฮงวันนี้
    เฮานี้มีวิธีให้ สิส่งมันไปตายอยู่วังน้ำเขตด่าน”
    จบคำสั่งบัญชาการ ทั้งทหารกะเตรียมพร้อม
    สิจับท้าวบ่าวบา นั่นละน่า ศรัทธาเอ้ย ฯ


    ศรีเวฬุคามมุนี
    sriwaylukammunee@hotmail.com
    เผยแผ่ครั้งแรกที่นี่
    ๒๖ ส.ค ๒๕๕๑


  2. #2
    :)เรื่องกำลังเข้มข้นเลยเนาะคับ พลาดบ่ได้เด้อแนนิ8):g

  3. #3
    ดูแลตรวจสอบเนื้อหา สัญลักษณ์ของ โป้ยก่าย
    วันที่สมัคร
    Jun 2007
    กระทู้
    1,619
    เว้าเรีองความมักความใฮกมันห้ามกันบ่ได้คือว่าหละเนาะ


    แม่นสิมีสองซ้อนซอนสองเกี่ยกล่อมกะตามถ่อน
    ฮ่อนว่าใจมักแล้วบ่มียั่งอยู่ไหว
    ใจปานไฟเผากลุ้มมรสุมโถมทั่ง
    หยังบ่หยังกะซ่างถ่อนสิขอซ้อนระหง่างกลาง



    คิดเบิ่งให้มันคักๆเด้อพ่อพระองค์

  4. #4
    Maximum learning
    ศิลปิน นักเขียน
    สัญลักษณ์ของ khonsurin
    วันที่สมัคร
    Apr 2008
    ที่อยู่
    ท่าตูม สุรินทร์
    กระทู้
    9,605
    บล็อก
    197
    ขอเป็นกำลังใจกับผลงานดีๆ นะคะ

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •