อีสานลืม

[ทองแดง]

ฝากไมตรีแต้มไว้ฮอนฮ่ำยามไกลกัน
ต้อนสัมพันธ์แพงฮักมาห่อโฮมโทมถ้อน
ย้อนย้านป๋าไลถิ่มคองอีสานบ่คือเก่า
คะนิงนำทุกค่ำเซ้างายง่วมกะห่วงหา
อาหังข้า..ทองแดงขอแจกหว่าน
ผญาบ้านภาคพื้นอีสานกว้างข่วงพะลาน
สิขอมาจาต้านแนวมูนเก่าแต่คราวหลัง
มีอีหยังหลายอันมาเขยจาไขเว้า
ให้เจ้าซ่อยคะนิงถ่อน..ปูมหลังครั้งพ่อแม่
ให้ซ่อยกันเก็บเมี้ยนแหน่..ซ่อยเผยแพร่สืบไว้ให้เนาว์ยั้งฝั่งอีสาน

[คนเมืองแปะ]

ให้อนุรักษ์ไว้เนาะพี่น้องวัฒนธรรมอีสานบ้านเฮา :g8)

[ทองแดง]

" ฮากเคยฝังหยั่งพื้น คนกะเล่าเวียนตัด
เซาะโกนเป็น"ครก" เพื่อว่าเห็นคุณไม้
ข้าวเคยตำ-ฮำเคยได้ เจียหมูหมู่เป็ดไก่
เคยหม่าแลงงายไว้นึ่ง แทนสากกะหน่ำตำ
พอยุคล้ำ..สมัยใหม่มีเข้ามา
คนเปลี่ยนเป็นโรงสี ไลลืมของพื้น
ขุดครกขึ้น จากดินตั้งโทนโท่
สากบ่ตำ-มองบ่ต้อง..เหลือไว้ได้แต่แยง "

[ทองแดง]

ล่อ-เกียนนี้ เคยใซ้ดีมาแต่เก่า
เคยขนข้าวขึ้นใส่เล้า ขนของใซ้เข้าใส่เฮือน
เคยขี่ไปค้า ขี่ไปนาขี่ไปไฮ่
หนทางดีทางขี้ฮ้าย..ไปได้ซู่ทาง
พอยุคล้ำ สมัยใหม่มีเข้ามา
คนพากันไลป๋า เอารถยนต์มาแทนล้อ
จอดล่อถิ่ม บ่เหลือแนวให้คึดต่อ
เหลือตีนล่อ"ข่อ-หล่อ" พอได้ระลึกคุณ

[ติ๊กต็อค]

มีตะม่วน ๆ เนาะจ้า:g

[โป้ยก่าย]

พี่น้องเอ้ย
คนเฮาสุมื่อนี้หากเป็นดั่งคือเห็นนี่แหล้ว
แนวเคยเห็นเคยมีหากเปลี่ยนไปบ่คือเค้า
สังคมเฮามัวเล่นหลงไหลแนวบ่แม่น
มีแต่วันสิมอดม้วยสูญสิ้นเก่าเดิม
คันซุมเฮาบ่เริ่มเสริมส่งสิดับสูญ
คันรองคำบุฮานถิ่นอี่สานสิสูญสิ้น
ให้ยินดีสาถ่อนอี่สานเฮาเสริมส่ง
ดำรงศีลภาดพื้นอี่สานไว้ให้คึดเอาเด้อ ท่านเอ้ย

[ทองแดง]

มา-มาถ่อน..พี่น้องเฮาให้ฟ้าวแหน่
อีสานเฮาแป่เปี่ยนปิ้นทุกถิ่นด้าวฮ่อมระแหง
ผืนดินดอนบ่แล้งใจผั่นแฮ่งกลายไป
ถิ่มลืมไล"คอง"อีสานบ่หัวซา"ฮีต"เปิงบ้าน
ของโบราณบ่สนใซ้บ่หล่ำนำซ้ำของเก่า
ปล่อยให้เนาว์เศร้าอยู่พื้นเป็นของถิ่มค่าบ่หลาย
มา-มาถ่อน..มาซ่อยกันสืบสานต่อ
สืบฮอยตา-วาฮอยพ่อ..พากันก่อสืบไว้...
ให้ได้จาสู่ลูกเต้าให้เขาฮู้เรื่องคดี

[ทองแดง]

ไถไม้นี้..เคยไถนาได้หว่านข้าว หลายลอมเลี้ยงไทหมู่
ได้ขน-แก่สู่ลูกเต้า แลงโฮมเข้าฮ่วมภาช์
เคยไถสวนกลบหญ้า ปลูกเขือบวบแตงหุ่ง
พวกพ่อลุงแม่ป้า เคยได้ให้ป่อนปัน
มื้อนี้นั่น..แอกหากได้พากพ้น หนีจากคอควาย
เพิ่นบ่อ่วยถามหา ถิ่ม"หัวหมู"ให้เพฮ้าง
วาง"ผาน"ถิ่ม" หางไถ"เอิ่นสัง"ค่าว"
เสียแฮงคราวแต่ก่อนกี้..เคยได้เมี้ยนจ่องบาย.

[แหลวแดง]

จั่งได๋จั่งสิจ่ายผญาเป็นคือเพิ่นนอ สุดยอดคับ ยกย่องให้เป็นปราชญ์อีสานคนหนึ่งเลย:g:g:g

[ทองแดง]

อักเคยหมุนคว่าฝ้าย ซิ่วแดงลายม้วนเข้าใส่
บ่ว่าไหมว่าด้าย เคยแปงไว้เข้าใส่เฮือน
ยามไปมาธุระเยื้อน ได้เอ้แต่งงามถือ
ย้อนฝีมือหญิงอีสาน มาแต่กาลโดนแล้ว
ซู่มื้อนี้..เพิ่นหากแขวนอักไว้ ไกล"ฟืม"หนี"หูก"ต่ำ
เทิง"กง-ไน"บ่คึดซ้ำ คราวกี้ว่าค่าหลาย
ถิ่ม"ซ้าหลอด"ไว้" สวย""กี่"บ่ถามหา
ของบ่มีราคา..บ่งามตาคือเงินซื้อ