อีสานลืม

[ทองแดง]

คันหนาวกายสีเย็นจ้อย..หนาวลมวอยยังฮู้ซ่วง
หนาวแต่ปวงน้ำอาบเนื้อ ลูบคิงล้างคาบส่วยสี
หนาวแต่ปีเดือนย้าย กลายแรม-ค่ำมานำเถิง
ใต้ตูบ-เพิงดังไฟผิง..ยังอุ่นคิงอยู่ทนได้
แต่ว่าใจหนาวสะบั้น สิหันหาอีหยังซ่อย...
ไฟลุกแฮงกะเย็นจ้อย..“คอย-หวัง”ไหม้ใส่น้ำตา
คอบว่าเอ-กาเศร้า นอนเซาเฮือนบ่มีหมู่
หนาวคอบใจแม่ผู้เฒ่า...รอคอยเฝ้า-ถ่าลูกหลาน.

ขอบคุณเจ้าของภาพ

[ทองแดง]

ลูกอีสาน...มันหากทุกข์ยากฮ้าย แต่ฮู้ใฝ่ฝ่ายหากิน
แม่นอยู่ดินดงดอน ฮู้ตะลอนออกหาคว้า
หาใส่ครัวเลี้ยงอ้าย-น้อง ผองไทเฮือนสู่แม่พ่อ
ลำบากหน้อตั้งแต่น้อย..ซุมหมู่ข่อยลูกอีสาน
ใหญ่มาแล้ว...กะแซ่วเซิ่นเผิ่นหนีหน้า..หาเฮ็ดงานด้วยลำบาก
เก็บเงินฝากคืนสู่บ้าน มือหยาบด้านกะฝ่าไป
หนักปานใด๋ใจสู้-กลั้น..กัดกำปั้น-กินหยาดเฮื่อ
เอา“ความฝัน”ปั้นเป็นเฮือ...เอา“ความหวัง”ตางแม่น้ำ..
..ให้พายจ้ำได้ท่องไป.

ขอบคุณเจ้าของภาพ

[ทองแดง]

พี่น้องเอ้ย...ศิลปะภาคพื้น ในท้องเรื่องการแสดง
แต่งคันนาเป็นเวที มีขี้ไถผู้ดูจ้อง
มีพิณทองตางกีต้าร์ เสียงแคนพาใจห่าวโฮ่
สิโซว์โตแอะแอ่นฟ้อน..ออนซอนเด้ให้เพิ่นดู
ณ บัดนั้น...เฮาหากรวยลื่นล้น รถยนต์ขี่ตั้งหลายคัน
มีเงินพันนับโกด-แสน บ่ขาดแคนอาหารเครื่อง
ผ้าผืนงามประเทืองโก้ สร้อย-แหวนโชว์ไผกะว่า
ทังสาวส่าเป็นคู่ซ้อน สะออนเด้วาสน์เจ้าของ
....................................................................
มันเป็นฝันอันหมู่น้อง ผองไทหมู่อีสานเฮา
ซึ่งพวกเรากะเคยเป็น ซ้ำเคยเห็นจนซินแล้ว
คุมหาแปวนำหาส่น..ตามหาฝันบั้นเติบใหญ่
เห็นแต่ไง่ได้แต่แล้ง...ผัดแฮ่งพ้อป่าบักเยา.

ขอบคุณเจ้าของภาพ

[ทองแดง]

ออกใหม่ขึ้นเดือนเก้า...อีสานเฮายังแห้งไง่
ฝนบ่ฮำไฮ่ตา-กล้า ปูปลาถ่าบืนฝ่าฝน
มันหากทุกข์เหลือล้น ฝนบ่อ่วยรินฮวย
ตกคราวซวยทังลุ่ม-ดอน..แบกไม้-นอน-ถ่าคอนกล้า
แต่กระนั้น...ฝูงชราคนเฒ่าพายข่อง เอาพ่องเสียมเตรียมขุดก่น
ขุดหาปูหมู่เขียดซ้น..งัดเหลิบไง้ออกใฝ่หา
มันเป็นฝันกลางแดดกล้า ให้สู้ฝ่าอีสานเฮา
สอนพวกเรามีมานะ...อดทน-ดู๋-สู้ดินฟ้า.

ขอบคุณเจ้าของภาพ

[ทองแดง]

อีสานเฮา..แม่นสิท่วมและแล้ง กะสู้แข่งแต่งหากิน
หาใส่สวย-ใส่งาย..ฮอดคราวแลงเต็มภาช์พร้อม
น้อยกะญอม-หลายกะคุ้ย บ่มีแพงเมี่ยนเก็บเสี่ยง
ยินเสียงเอิ้นหมู่คุ้ม..มากินข้าว-เว้าฮ่วมภาช์
ซู่มื่อนี้...กาละนับมื้อส่วย คนบ่อ่วยถามหา..กันแหล่ว
ไปประสาไผ-มัน..บ่ฮ่วมกันป่อน-ปัน-ยื่น
ลางคน..ลืมฮอดไทหมู่พื้น ญาติเฮาอีสานเก่า
ลางคน..ลืมฮอดพ่อแม่เค้า...ผู้เนาว์ยั้งฝั่งอีสาน.


ขอบคุณเจ้าของภาพ

[ทองแดง]

บุญข้าวสากมาฮอดแล้ว..ฝากแนวข่าวมาจาเถิง...แหน่เด้อ
ประเพณีสารทเดือนสิบหมู่อีสานกระทำไว้
เตรียมอุทิศ-ทาน-ทอด-ให้ฝูงคณาผู้ลาจาก
“ห่อข้าว”เตรียมฝากต้อนผู้มาน้อมได้รับบุญ
.............................
คึดฮอดเด้..ตั้งแต่คราวก่อนพุ้นได้เกิดฮ่วมอาศัยกัน
ความสัมพันธ์เคยมีมาหักโค่นลงกับตายม้วน
เหมิดกะบวนสิตามส่น..ย้อนคนทางไปคนบ่อน
เหลือความฮัก-ความอาวรณ์..อีกกับ“ห่อข้าวน้อย”
......มาคอย-ไว้ระลึกหา.......

[พวงพยอม]

วันอาทิตย์ที่ 22 กันยายนที่สิฮอดนี้ทางวัดไทยในนิวยอร์คสิมีงานทำบุญวันสารทไทยคือสุปีจ้า
สิได้เฮ็ดข้าวกระยาสารทไปทำบุญนำจักถาดน้อจ้า

[ทองแดง]

คึดฮอดฮ้าย...หลายเดือนกลายได้จรผ่าน
ลาอีสานบ้านเกิดเค้าย้อนอุกเอ้าบ่ซ่วงใจ
ลงไปไทหนีไปเที่ยว..เหลียวคืนหลังอีสานเก่า
น้ำตาหย่าวหยดหยาดย้อย..จำเป็นข่อยต้องห่างไกล
อีสานเอ๊ย...หอมอายดินกลิ่นหญ้ายามคืนนา-กลับมาถิ่น
สู่แผ่นดินบ้านเกิดเค้า..หอมเฟียง-ข้าว-ไง่-ละออง
ยามเมื่อหนาวลมพัดต้องหลิงทิวไผ่ปลายไม้ติง
มาคะนิงคึดฮอดหา..ผู่ซู่คนอยู่ทางพี้
แม่นอยู่ดีสำบายถ้วนตามสมควรหรือว่าบ่..?
ทังแม่พ่อญาติพี่น้อง..รวมผองหล่าหมู่ลูก-หลาน..บ่หน้อ
อดสาเด้อ..อดสาอ่านผญาต้านทองแดงขานมาเว้าต่อ
ฮ่ามันขาด-พลาดบ่พอ..ขอให้กูณาข่อยผู่คอยเว้าเล่าคดี..แหน่ถ่อน

[ทองแดง]

ทองแดงขอเอิ้น...เซินน้อง-อ้ายไปงานไหมนานาซาติ
ดาระดาษเครื่องกิน-ใซ้..งามไหมเอ้ไว้นุ่ง-ถือ
“ชนบท”ระบือแคว้นเมืองขามแก่นแดนแก่นขอน
ทุกดง-ดอนอุดมดีปูปลามีข้าวเต็มเล้า ฯลฯ
คนขอนแก่นฮักแพงหมั่นเสมอกันด้ามเกลอ-เสี่ยว
อุดมการณ์ปั้นข้าวเหนียว..ฮีตคองเดิมสืบเค้าไว้ไปดูถ่อนสิค่อยเห็น
อย่าลืมเด้อ...ไปเยี่ยม-ส่อง-ท่อง-เที่ยว-เล่นเป็นญาติหนึ่งไมตรีเดียว
ไปผูกเสี่ยว-เที่ยวงานไหม..เบิ่งหมอลำก้ำทางพุ้น.


ขอเชิญเที่ยวงานเทศกาลไหมนานาชาติ ประเพณีผูกเสี่ยวและงานกาชาดจังหวัดขอนแก่น ประจำปี ๒๕๕๖
๒๙ พฤศจิกายน – ๑๐ ธันวาคม ๒๕๕๖ ณ สนามหน้าศาลากลางจังหวัดขอนแก่น

[ทองแดง]

หนังบักตื้อ...เอิ้นอีกซื่อ“ปราโมทัย”
แกะเป็นลายไง้“หนังงัว”เป็นตัวตนแสดงเรื่อง
“ตะเกียงเจ้าพายุ”ฮุ่ง-เฮือง-แจ้ง..เป็นเงาแสงอีสานเก่า
“หนังตะลุง”มาโป-เว้า..มาขอข้าวไปหม่ากิน
คอบว่าทุกข์ยากฮ้ายจั่งได้แบกแอบหนัง
เที่ยวประทังออกหากิน..ด้วยวาท-ศิลป์อีสานพื้น
สองขายืน-ปากโอ่ฮ้อง-มือแขนจองย้ายสับส่าย
ออนซอนเด้..ซู่มื้อนี้...เห็นแต่ลายเสียบใส่ไม้...
...ม้วนหนังไว้ทอบใส่“จอ”....