อีสานลืม

[ทองแดง]

เจ้าผู้ขันหมากแก้ว ลายเครือหมากผักแว่น
เจ้าเคยแป่นแว่นหน้า ให้คนอ้าอวดของ
ว่าเป็นคองโบราณล้ำ วัฒนธรรมตั้งแต่ปู่
เอามาซูอวดตั้ง วางไว้ใส่"หมาก-พลู"
เทิง"สีเสียด""ปูน"พร้อม "ยาสีแข่ว"แนวมันดี
"แก่นคูน"มี"กับนวด"อยาย ใส่นำกันเป็นถันซ่อง
บัดเซากินบ่คองใซ้ ปันเป็นมูนบ่อยากหล่ำ
ตั้งคะมำซู่มื้อนี้ ไทเฮียนเว้า..เมี้ยนเฮ็ดหยัง ?


tongdang3317@gmail.com

[ทองแดง]

แม่หากเคยหย่ำข้าว หมกไฟป้อนโม่ม-ม่าม
แม่หากเคยอาบน้ำ สะคิงล้างส่วยศรี
อดสาเลี้ยงมื้อนี้ หวังสิเพิ่งมื้อภายหลัง
เมี้ยนคาบฝัง-ทำบุญหา บัดฮ่าตายวายเมี้ยน
บัดแม่เพียรเป็นสาวขึ้น แป้งน้ำมันจั้นเข้าใส่
มีผู้ซายมาม่ายเยี่ยม คราวน้อยหนึ่งกะไป
มาเหลือใจ อกแม่เด้...เลี้ยงมาหวังสิเพิ่ง
บุญบ่เถิงคะลาดล้ม สมคุณข่อยผัดแม่น"หลาน"

[ทองคำ]

อัศจรรย์เด้ ฟังเสียงฮ่วนๆฟ้า บูรพาก้ำบ้านเก่า
เห็นเพิ่นมาจาเว่า กล่าวต้อนต่อนผญา
อาวทองแดง เพิ่นผู้ความฮู้กล้า ปัญญาเลื่อนพอปานเกียน
เพิ่นมาเขียนผญาสาร กล่าวกันสัมพันต้าน
ผมนี่อยู่ทางด้าน คนฟังเสียหลายกว่า อาวเอ้ย
แต่ว่าอดบ่ได้ เลยได้เข้ามากล่าวนำ
ซื่อ ทองคำ ตั้วล่ะท่าน ค่าหากบ่ทันหลาย
ญ้อนเป็นทองคำกลาย ชาวเมืองว่าทองเก้
สะออนเด้ สะออนเจ้า เว่ามาม่วนนวลหู เด้นอ
สมเป็นครูทางกลอน บทผญาจาเว่า

[ทองแดง]

ทองแดงหากหากว่าคืนเมือก้ำ"กุดพังเครือ"คำบ้านซ่องอยู่
"ท่ากระเสริม"ตำบลตั้งทางซุมเซื้อหมู่แซง
ได้ไปเห็นเหมิดแจ้งฮีตเก่าประเพณี
มีของดีหลายแนวมาแจ่วจาขานเว้า
ได้ไปเห็นคำเฒ่าจ่ายผญามาแจกหว่าน
ไปเห็นของบ้านพากพื้นของเค้าจั่งแม่นดี
อดสาเด้อก้ำฝ่ายพี้..มีฮีตเก่าแต่คองหลัง
อดสายังใจคึด..หมู่อีสานแต่คราวพุ้น
อดมาเอาบุญสร้าง..เป็นแนวทางมูนมังต่อ
พอได้จาสู่ลูกเต้า...อีสานเค้าจั่งแม่นดี..

[พลายแก้ว]

ตกสมัยซุมื้อนี้ การเฮ็ดนากะหันอ่วย
ควายเคยผูกเซือกคล้อง มันเหลือหน่อยบีมี
ยุคเทคโนเข้าจ้นจี้ ได้มีตื่มหลายปัญหา
การทำนากะลงทุน คิดขึ้นมาละมันเอ้า
คึดต่อเงินขายข้าว มาลงทุนวุนเอาหนี่
จักค่าไถค่าสี ค่ากระชอนโต่งข้าว เอาเงินซื้อผ้ามุ้งเขียว
ทั้งค่าปุ๋ยเขากะเขี่ยว ทั้งค่าเกี่ยวค่าปักดำ
ว่าแมนขายเฟืองนำ กะบ่เถิงฮอดทุนซำ
กรรมของชาวนาแท้ ได้ยืมแว่ ธกส.
ขอให้ได้เงินมา บ่คึดว่าสิพาวุ่น
ญี่ปุ่นมาทำกรรมไว้ ให้ไปซื้อควายมีเกียร์
หลายแนวเสียเปลืองเงิน มาโพดเกินนอคุณป้า
มีน้ำมันโซล่า ยังถามหาน้ำมันเครื่อง
น้ำมันเกียร์ น้ำมันเฟือง อีกบ่โดน แหวนกะสิได้เปลี่ยนถิ้ม
สิยืนยิ้มอยู่จั่งได๋ นอ..ท่านเอย

[หนุ่มเหงาคนไกลบ้าน]

อย่าซิไล่ลืมถิ่มประเพณีอีสานเฮารักษาไว้ให้ลูกให้หลานเด้อครับ

[ตะวันนา]

แก้มแดงนางขานต้อนฮีตอีสานสูงค่า
ตีราคาแม่นบ่ได้จารึกไว้ขึ้นสู่สูง
อ้ายอาวอาป้าลุงท่านให้ซ่อยกันอนุรักษ์
ปักษ์ประเพณีอีสานไว้ให้สืบเชื้อต่อรุ่นหลาน...ซั่นแหลวววว

((ดนๆ มาแจมนำเพิ่นจักเป็นแนวได๋ดอก...ม่วนบ่ม่วน กะว่าม่วนโลดเนาะ อ้ายคำเนาะ))

[พลายแก้ว]

ตกสมัยซุมื้อนี้การเฮ็ดนากะหันอ่วย
ควายเคยผูกเซือกคล้องมันเหลือหน่อยบ่มี
ยุคเทคโนเข้าจ้นจี้ได้มีตื่มหลายปัญหา
ญี่ปุ่นมาทำควายเหล็ก เจ็กผัดเป็นคนค้า
เฮาชาวนากะเห็นด้วย ไปหลงควายของญี่ปุ่น
ฝุ่นกอบเดียวกะบ่ได้ มันกินหญ้าบ่เป็น
ระวังเด้อระวังควายสิโดดเต้น โตนท่วนลงสระ
ให้เตรียมหา 5000 บาดห่าควายมันโตนน้ำ
ควายงาม ๆ มีใซ้ว่างลาไลถิ้มป่อย
คราดแอกไถให้ย้อย ๆ ผัดโยนถิ่มใส่ไฟ เหลือใจเด้..ท่านเอย

[ทองแดง]

ปีใหม่มาฮอดแล้ว..ให้เบยเบิกเกษมศานต์..ซู่คนเด้อ
ศฤงคารทรัพย์จับจ่ายสินให้เกินใซ้
อย่าได้มีความไข้เจ็บเป็นได้เอ็นป่วง
ปวงหมู่แนวอยากได้ให้สมด้ามดั่งประสงค์... ฯลฯ

ทองแดงมาขอจาวาทเว้ากับซุมเฮาจักหน่อย..แน่เด้อ
ย้อนวันเดือนปีค้อยเหมิดค่อนสิเปลี่ยนหมุน
ใจหากเกิดว้าวุ่นย้านแพง-ฮักบ่คือหลัง
ย้านเจ้าเปลี่ยนประดังปีบ่หลี่หลิงความเค้า
ย้านแด้หน้อ..ย้านแต่ทองแดงเศร้าเขียนผญามาฮ้อยเทื่อ
ย้านเจ้าเบื่อบ่อ่านซ้ำเป็นของหน่อยค่าบ่หลาย
ย้านเด้หน้อ..ย้านเจ้ากลายขัวข่วมฮีตเก่าแต่คองหลัง
ย้านเจ้าพังเพหักบ่หล่ำนำฮีตเปิงบ้าน
ย้านบ่สนคำเฒ่าอาวอาป้าพ่อแม่
เฒ่าแก่สอนย้านตอบโต้..ปะโธ๊!ย้านบ่ซ่วงใจ
อย่าซู่ไลลืมถิ่มมูนมังซุมแซงเก่า..เฮาเด้อ
ของมันมีแต่เค้าเคยเสริมสร้างคู่อีสาน
อย่าสิไลลืมว่านบ้านเก่าที่เฮามี
คันหลายจบครบปีให้ดั่งเดิมอย่าวายม้าง
คันมีทางหลายเส้นเดินคนทางกะตามซ่าง
คันแม่นหย่างคนละเส้นแต่เห็นหน้าได้ไถ่ถาม..แน่เด้อ

ทองแดงและอ้ายน้องจากตูบอีสานลืม
ขอประนมมือนบจบเศียรเวียนเกล้า
ขอให้เจ้ามีอายุหมั่นพันปีอย่าค้อยเงี่ยง
วรรณะเกลี้ยงผ่องแผ้วสีแนวหน้าให้ลื่นไผ
สุขะในโลกใต้ให้ตุ้มห่อ-ยอคิง
พละจริงให้อยู่ดี-มีแฮงทุกๆคนเด้อท่าน...

[สาวเมืองกะสิน]

เปิดหน้าจอมาพ้อมูลมั่งอิสานเก่า
ที่หมู่เฮาอ้ายเอื้อยสืบสานไว้บ้านมหาฯ
ทั้งยินดีและเห็นด้วยในความสวยและสูงค่า
ประเพณีสืบสานมาแต่เค้าไผกะเว่าว่าดี
ขอให้ซ่อยกันสืบสร้างเป็นแนวทางในคงอยู่
เป็นมูลมั่งคู่บ้านอีสานนี่ให้ฮุ่งเฮืองน้อ