อีสานลืม

**ทองแดง** · 05-09-2008, 19:38

ฝากไมตรีแต้มไว้ฮอนฮ่ำยามไกลกัน
ต้อนสัมพันธ์แพงฮักมาห่อโฮมโทมถ้อน
ย้อนย้านป๋าไลถิ่มคองอีสานบ่คือเก่า
คะนิงนำทุกค่ำเซ้างายง่วมกะห่วงหา
อาหังข้า..ทองแดงขอแจกหว่าน
ผญาบ้านภาคพื้นอีสานกว้างข่วงพะลาน
สิขอมาจาต้านแนวมูนเก่าแต่คราวหลัง
มีอีหยังหลายอันมาเขยจาไขเว้า
ให้เจ้าซ่อยคะนิงถ่อน..ปูมหลังครั้งพ่อแม่
ให้ซ่อยกันเก็บเมี้ยนแหน่..ซ่อยเผยแพร่สืบไว้ให้เนาว์ยั้งฝั่งอีสาน

**คนเมืองแปะ** · 07-09-2008, 11:10

ให้อนุรักษ์ไว้เนาะพี่น้องวัฒนธรรมอีสานบ้านเฮา :g8)

**ทองแดง** · 07-09-2008, 18:46

" ฮากเคยฝังหยั่งพื้น คนกะเล่าเวียนตัด
เซาะโกนเป็น"ครก" เพื่อว่าเห็นคุณไม้
ข้าวเคยตำ-ฮำเคยได้ เจียหมูหมู่เป็ดไก่
เคยหม่าแลงงายไว้นึ่ง แทนสากกะหน่ำตำ
พอยุคล้ำ..สมัยใหม่มีเข้ามา
คนเปลี่ยนเป็นโรงสี ไลลืมของพื้น
ขุดครกขึ้น จากดินตั้งโทนโท่
สากบ่ตำ-มองบ่ต้อง..เหลือไว้ได้แต่แยง "

ครกมอง

**ทองแดง** · 12-09-2008, 15:12

ล่อ-เกียนนี้ เคยใซ้ดีมาแต่เก่า
เคยขนข้าวขึ้นใส่เล้า ขนของใซ้เข้าใส่เฮือน
เคยขี่ไปค้า ขี่ไปนาขี่ไปไฮ่
หนทางดีทางขี้ฮ้าย..ไปได้ซู่ทาง
พอยุคล้ำ สมัยใหม่มีเข้ามา
คนพากันไลป๋า เอารถยนต์มาแทนล้อ
จอดล่อถิ่ม บ่เหลือแนวให้คึดต่อ
เหลือตีนล่อ"ข่อ-หล่อ" พอได้ระลึกคุณ

**ติ๊กต็อค** · 12-09-2008, 19:30

มีตะม่วน ๆ เนาะจ้า:g

**โป้ยก่าย** · 12-09-2008, 20:03

พี่น้องเอ้ย
คนเฮาสุมื่อนี้หากเป็นดั่งคือเห็นนี่แหล้ว
แนวเคยเห็นเคยมีหากเปลี่ยนไปบ่คือเค้า
สังคมเฮามัวเล่นหลงไหลแนวบ่แม่น
มีแต่วันสิมอดม้วยสูญสิ้นเก่าเดิม
คันซุมเฮาบ่เริ่มเสริมส่งสิดับสูญ
คันรองคำบุฮานถิ่นอี่สานสิสูญสิ้น
ให้ยินดีสาถ่อนอี่สานเฮาเสริมส่ง
ดำรงศีลภาดพื้นอี่สานไว้ให้คึดเอาเด้อ ท่านเอ้ย

**ทองแดง** · 23-05-2013, 19:57

อีสานเฮาฮีต-เค้าโบราณเก่าประเพณี
สิบสองเดือนในหนึ่งปี มีบุญกาลกระทำไว้
เผื่อให้ใจใสเหลี่ยม ยก“ทานัง”ให้ปันแจก
บ่ให้แตกหมุ่นม้าง ทางบุญสร้างศาสนา
ฮอดวิสาข์เดือนหกตั้ง ฝนเริ่มหลั่งมาโปยปาย
ฝูงหมู่ไทซาวอีสาน เข้าวัดวาอารามกว้าง
ยกรัตนตรัยตั้ง น้อมศรัทธาลงก้มกราบ
ขออิ่ม-อาบบุญเกื้อ เมือบ้านผ่องลูกหลาน..แหน่ถ้อน..

วันวิสาขะ

**ทองแดง** · 04-06-2013, 20:18

คันหนาวกายสีเย็นจ้อย..หนาวลมวอยยังฮู้ซ่วง
หนาวแต่ปวงน้ำอาบเนื้อ ลูบคิงล้างคาบส่วยสี
หนาวแต่ปีเดือนย้าย กลายแรม-ค่ำมานำเถิง
ใต้ตูบ-เพิงดังไฟผิง..ยังอุ่นคิงอยู่ทนได้
แต่ว่าใจหนาวสะบั้น สิหันหาอีหยังซ่อย...
ไฟลุกแฮงกะเย็นจ้อย..“คอย-หวัง”ไหม้ใส่น้ำตา
คอบว่าเอ-กาเศร้า นอนเซาเฮือนบ่มีหมู่
หนาวคอบใจแม่ผู้เฒ่า...รอคอยเฝ้า-ถ่าลูกหลาน.

ขอบคุณเจ้าของภาพ
หนาว..

**แหลวแดง** · 14-09-2008, 07:46

จั่งได๋จั่งสิจ่ายผญาเป็นคือเพิ่นนอ สุดยอดคับ ยกย่องให้เป็นปราชญ์อีสานคนหนึ่งเลย:g:g:g

**ทองแดง** · 16-09-2008, 05:00

อักเคยหมุนคว่าฝ้าย ซิ่วแดงลายม้วนเข้าใส่
บ่ว่าไหมว่าด้าย เคยแปงไว้เข้าใส่เฮือน
ยามไปมาธุระเยื้อน ได้เอ้แต่งงามถือ
ย้อนฝีมือหญิงอีสาน มาแต่กาลโดนแล้ว
ซู่มื้อนี้..เพิ่นหากแขวนอักไว้ ไกล"ฟืม"หนี"หูก"ต่ำ
เทิง"กง-ไน"บ่คึดซ้ำ คราวกี้ว่าค่าหลาย
ถิ่ม"ซ้าหลอด"ไว้" สวย""กี่"บ่ถามหา
ของบ่มีราคา..บ่งามตาคือเงินซื้อ

อัก