...สืบเนื่องมากน้องนุ่ง(ผู้ลางคน)เพิ่นเคยขอผังการแต่งกลอนผญาไว้ ปีกว่าแล้วจั่งคึดพ้อ เลยเอามาลงให้เบิ่ง เทื่อสิได้เอามาลง เลาป้อยไปหลายเทื่อแล้วหล่ะพี่น้อง เฮ่อ ๆ ๆ นี้เป็นตัวอย่างง่ายๆเด้อ อ้ายแต่งเป็นกลอนไว้ แล้วจับออกมาเฮ็ดผังพอสังเขปดังนี้...
เบยเบิกฟ้านภาภาคภูมิสถาน แดนอีสานเกษมสุขส่องใสวิไลล้ำ
คือดังคำโบราณเว้าดินดำน้ำซุ่ม ฝูงปลากุ่มสะเดิดบ้อนปานแข่แก่งหาง
ฝูงหมู่นางปลาดิ้นคือขางฟ้าลั่น จักกะจั่นแส่วฮ้องปานฟ้าสิล่วงบน
ม่วนกันแตกจ้นๆสนุกปีบโฮแซว แดนนี้มีหลายแนวเสพระบำรำฟ้อน
ตาสะออนหลายแท้ให้ลองแวมาเบิ่ง มานอนทอดทะเนิ้งฟังลำห่าวหย่าวแคน แท้แหลวฯ
...ตัวอย่างผังสิบอกเถิงสัมผัสนอกพื้นฐานที่ควรฮู้ ส่วนในกลอนอาจสิมีสัมผัสใน แต่หัดแต่งใหม่ บ่ทันฮู้ศัท์แสงหลาย กะบ่ต้องไปใส่ใจหลาย ถ้าหาใส่ได้กะดีเด้อนาง
หมายเหตุ อันนี้เป็นเพียงตัวอย่างกลอนผญาอีกแบบหนึ่ง ซึ่งท่านผู้เป็นปราชญ์ทั้งหลายเพิ่นอาจสิมีวิธีการแต่ง ตามแบบและชนิดกลอน วิจิตรพิศดารไปกว่านี้ ผู้ข้ากะขอคำซี้แนะแหน่เด้อข้าน้อย สิเป็นพระคุณอย่างสูง
Bookmarks