เป็นแฮงใจคนไกลบ้าน ถิ่มเฮือนซานคนพรากถิ่น หนีจากดินเคยอยู่เย้า ได้ความเศร้าเป็นหมู่เฮียง
ได้ยินเสียงหมอลำจ้าว เสียงแคนห่าวใจไหวหวั่น ใจรำพันคิดฮอดบ้าน ดนนานมื้อที่ห่างเฮือน
บ่เคยเลือนจากใจได้ ลมพัดไหวคิดฮอดท่ง คิดฮอดลงนาเกี่ยวเข้า เอาปลาข่อนต้อนและไซ
ที่พักใจยามเมื่อยล้า ขออาศัยบ้านมหา หม่องพบพาคนไกลถิ่น มาจากดินอิสานเค้า ได้มาเข้าเป็นหมู่กัน พี่น้องเอ๊ย

ขออนุญาตเชิญ ท่านศรีเวฬุคามมุนี มาซ่อยต่อ ซ่อยต้อนให้แน่เด้อท่าน กับท่านปรมาจารย์อื่น ๆ เป็นกำลังใจ ให้คนไกลบ้าน ทางบ้านเฮาแน่ครับผม ขอบคุณหลายๆ ครับ

เขียนมาเพิ่มเติมให้อ่านครับผม จักสิวางไว้หม่องได๋เนาะ เขียนใหม่ พี่น้องบอกว่า เรียงกันไว้แน่ ลังคนกะว่า เอาไปต่อของเก่าพะนะ ผมกะจักสิเอไปไว้หมอ่งได๋ดอก กะเลยเอาไปกองไว้สองหม่องเด้อ เอามาเพิ่มของใหม่ กับ เอาไปต่อ ผู้อื่นไว้ซะเนาะ ฮ่า ๆ ๆ ขอบคุณสำหรับ คำติชม ทุกท่าน ทุกคนเด้อครับ


คิดเห็นเด๊-แกงหน่อไม้ ซาวเด็ดไส่-ยอดผักหวาน ฝานบักบวบ-ลงไปนำ พร้อมแจ่วตำ-แมงดาด้วย

แกงฮ้อนฮ้อน-ตักลงถ้วย ฉวยข้าวเหนียว-หนึ่งสุกไหม่ ปั้นเป็นไอ-ข้าวกะฮ้อน เฮ็ดเป็นก้อน-จ้ำแจ่วตาม

มื้อได๋ยาม-สิพ้อหน้า กินฮ่วมพา-พ่อกับแม่ คิดฮอดเจ้า-สองเฒ่าแท้ ฝีมือแม่-แม่นมักหลาย

ยังคิดพ้อ-น้องและอ้าย เคยร่วมบ่าย-ข้าวกับปลา อยู่เถียงนา-ห่มสะแบง ฮอดยามแลง-ไปหลกกล้า

ได้กินปลา-ยามฝนเข้า กินลาบเทา-ยามฝนอ่วย ฮอดยามเสียง-สะนูด้วย ลมพัดย้วย-กะแม่นหนาว

ดอกสีขาว-กะยอมขึ้น หอมสดชื่น-ทางตีนดง ชวนกันลง-ไปเคาะข้าว เฮาลงแขก-ไปซ่อยงาน

เหมิดปัดลาน-ข้าวขึ้นเหล้า มาเอาบุญ-กฐินต่อ เฮ็ดขนม-ต้มเป็นหม้อ พอห่อตุ้ม-กะแม่นตอง

ยังคิดเห็น-เด้อพี่น้อง ผู้ไปท่อง-อยู่ทางไกล เป็นจั่งได๋-อย่าเหมิดแฮง อยากส่งแรง-ใจไปช่วย

คิดเห็นนา-คิดเห็นห้วย คิดเห็นควาย-กับเฮือนเก่า เคยไส่บาตร-ยามมื้อเซ้า ก่อนแดดเจ้า-สิป่อนแสง

ขอเป็นแรง-ทางใจให้ สิแม่นไผ-กะตามซ่าง ยามหัวใจ-เจ้าเวิ้งว้าง ทางบ้านนี้-สิเบิ่งแยง พี่น้องเอย
(บ้านนี้คือบ้านมหาหนิหล่ะครับ)