หวัดดีคับพี่น้องบ้านมหา มื้อนี้ไปตลาดอีกแล้ว เห็นปลาตะเพียนโตใหญ่ และกะดอกแคเลยอยากนึ่งปลาสั่นดอกคับ นึ่งปลาต้องกินกับแจ่วเนาะ มื้อนี้เลยตำแจ่วน้ำปูนำ เบิ่งกันเลยคับ
นึ่งปลาผู้ได๋กะเฮ็ดเป็นดอกเนาะ ง่ายๆคับ เรียงแล้วกะจัดการนึ่งเลย ดอกแคเอาเกษรมันออกซะก่อนเด้อคับ มันจั่งบ่ขม แต่ว่าถ้าไผมักขมกะบ่ต้องเอาออก มักบ่คือกันเนาะ ถ้าเป็นผู้เฒ่าเพื่นบ่เอาออกเด้ ผู้เฒ่ามักขมหั่นหนา แต่ว่าผมเอาออกอยู่คับ เพราะว่าบ่ทันเฒ่า อิอิ::)::)
คั่วพริก กระเทียม หอมแดงคับ เอาไว้ตำแจ่ว ใซ้แก๊สกะต้องคั่วเอา ถ้าไผใซ้ฟืนกะจี่เอาเนาะ มันจั่งหอมว่าซั้น
นี่หละคับเครื่องตำแจ่ว ตำแนวที่คั่วไว้ให้แหลก ตักน้ำปูใส่จักซ้อนหนึ่ง น้ำปลาร้าจักหน่อย ผงชูรส น้ำบักนาว แล้วกะตักใส่ถ้วยได้เลยคับ เว้าเรื่องน้ำปูเนาะ เป็นอาหารทางเหนือ ขะเจ้าเฮ็ดจั่งได๋กะบ่ฮู้คือกันคับ แต่ว่าใสกระปุกไว้คือกะปินี้หละ ซื้อมาสามกระปุก ได้ปีกว่าแล้ว บ่ทันเบิดพอกระปุกอยู่ ผมว่าหอมแซบดีคับ ลองเบิ่งเด้อคับ
นึ่งปลาสุกแล้วหน้าตาเป็นแบบนี้หละคับ เห็นแล้วน้ำลายไหล อยากกินอีกอยู่คับ อิอิ
อันนี้ก่อนกินข้าว จักเป๊ก สองเป๊กก่อนเด้อผู้ได๋กะดาย
แจ่วกะตำแล้ว ปลากะสุกแล้ว กะหาออกมากินได้เลยคับผม มาเด้อคับพี่น้องมากินข้าวนำกันคับ ::)::)
Bookmarks