หวัดดีคับพี่น้อง มาอีกแล้ว มื้อนี้หมู่ตะหานน้ำที่ทำงานเก่ามายามคับ เลยเฮ็ดแนวกินไว้ให้หมู่กินนำ เป็นกับแกล้มหั่นหละคับ เบิ่งกันเลยคับ
ซื้อกุ้งมาเลยคับ โตน้อยโตใหญ่กะได้ เอากุ้งแชบ้วยเด้อคับ บ่ควรเอากุ้งกุลาดำ เพราะว่ามันเปลือกแข็ง และกะบ่ควรเป็นกุ้งฝอยเพราะว่าเสียดาย เอาไปก้อยดีกว่า อิอิ ได้มากะล้างซะก่อน ถ้าหนวดหลายกะตัดหนวดให้เรียบร้อย มันจั่งบ่ยุ่งกัน อิอิ ทิ่มไว้จักคราวให้สะเด็ดน้ำ เอาใส่หม้อเลยคับ เอาหม้อที่มีฝาปิดเด้อ บาดนี้เฮากะตำกระเทียม พริกไทเม็ด และรากผักซี ให้ละเอียด ตักใส่หม้อ ปรุงรสด้วยเกลือจักหน่อย รสดี และซีอิ๊วขาวจักหน่อย อย่าให้เค็มเป็นใซ้ได้ ปิดฝาหม้อ ยกขึ้นตั้งไฟได้เลยคับ ไฟอ่อนจักหน่อยเด้อ อย่าใซ้ไฟแฮง มันสิไหม้
กะเบิ่งว่าพอหม้อฮ้อนจักหน่อย เฮากะจับสะบัดๆ แบบในรูปหั่นหละคับ หมั่นสะบัดจักหน่อย ให้กุ้งมันสุกทั่วถึงกัน และให้เครื่องปรุงกระจายทั่งถึงกัน อาการสะบัดหม้อหรือว่าซิดหม้อนี้หละคับคือที่มาของซื่อว่า กุ้งสะบัดหม้อ อิอิ หรือเฮาสิเอิ้นว่ากุ้งอบเกลือกะได้ แต่มันบ่ตื่นเต้นส่ำซื่อแรกสั่นดอกหวา
กุ้งสุกแล้วหน้าตามันกะสิออกมาเหลืองอุ่ยหุ่ยแบบนี้หละคับ มีน้ำพอเอ๊าะเจ๊าะ เฮากะเอาไปตักใส่จานได้เลย เห็นบ่หละผมลืมตัดหนวด ซะพอมันยุ่งกันหละแหม อิอิ
ตักใส่จานและกะโฮยด้วยผักซี ถ้ามีกระเทียวเจียวนำกะสิหอมขึ้นอีกเป็นตาแซบขึ้นอีกคับ อย่าลืมตำน้ำจิ้มนำเด้อคับ พริก กะเทียม น้ำตาล น้ำปลา น้ำบักนาว ซิมรสชาดตามมัก
เผลอแป๊บเดียว เหลือเคิ่งจานแล้วคับ ไคอยู่ต้มไก่ไว้พร้อม และกะดื่มกินคุยกันไปนำ ม่วนเติบอยู่คับ
เมนูนี้บ่ได้จำกัดอยู่แต่ว่าเป็นกับแกล้มเด้อคับ เป็นกับข้าวกะได้ น้ำหน่อยๆนั่นหละราดข้าวจ้าว แซบคือกันคับ เด็กน้อยกินได้ ผู้ใหญ่กินดี เป็นกับแกล้มแห่งดีคับ 8)
Bookmarks