ฝากให้พี่และน้อง

[โป้ยก่าย]

ขอเจริญธรรมถ้อยสาธยายขยายวาด
บ่แม่นปราช์ญผู้ฮู้หากเคยได้ฮ่ำเฮียน
หลายปีเดือนที่มาเข้าเนาคาเมนำหมู่
มีหลายอันได้ฮ่ำฮู้เห็นแจ้งคู่สู่แนว
ใจให้ใสดั่งแก้วอย่าให้ขุ่นมัวหมอง
ไผผู้ครองความทุกข์ให้ปล่อยวางสาเด้อเจ้า
หลายคนหลายความเว้าคันหูเบามันสิยาก
หากแม่นหนักแบกไว้ใจนั้นบ่ซื่นบาน
คันสิเว้าบ่อนบั้นมวลมนุษย์โลกา
ปราถนาความสุขบ่ต่างกันพอน้อย
ไปตามฮอยคำซี้พุทธองค์สอนสั่ง
อันความหวังวาดไว้บ่มีได้ดั่งประสงค์
จิตจำนงค์หมายหมั่นมีหลายอันพันอย่าง
ตกหว่างมาฮอดแล้วบ่สมแม่งหน่วยมโน
คันสิคิดอ่าวโอ้คนิงเรื่องเคืองใจ
บ่มีไผสมหวังดั่งกันเสมอด้าม
ยามสมใจกะหัวห้าวคราวผิดหวังผัดนั่งเจ้า
ไฟนรกอูดเอ้าเผาไหม่อยู่บ่เป็น
เฮียมเคยเห็นมาแล้วประสบการแปวป่อง
ถือเอาคองบ่อนฮู้พระธรรมเข้าเพิ่งใจ
แนวหวังบ่คาดได้นั้นบ่แม่นของโต
เอาพุทโธกวมกังนั่งทวนให้เห็นแจ้ง
แสงปัญญานำซี้บ่มีหยังหมั่นแก่น
อยู่ในแดนโลกกว้างบ่มีหม่องแก่นสาร
ยุทธการคือนามข่ามหาการโป้ยก่าย
สาธยายพอซ่ำนี้สิหาหม่องบ่อนลง ก่อนเด้อ...

[ศรีสะท้าน]

แจ่มมโน โสสุดเลยท่าน เอาอีก เอาอีก

[ไก่น้อย]

สารยายมะโนสร้างกุศลศรีสิยู้ส่ง
จิตจำนงค์สู่ร่างทางม้างกะห่างหนี
บารมีมอบตอบแทนให้น้ำใจใสสะอาด
ปรารถนามาตรมุ่ง ให้สมแม้น ดั่งผไท เด้ออ้าย เด้อ.....

[ศรีสะท้าน]

อ้างถึง:สารยายมะโนสร้างกุศลศรีสิยู้ส่ง
จิตจำนงค์สู่ร่างทางม้างกะห่างหนี
บารมีมอบตอบแทนให้น้ำใจใสสะอาด
ปรารถนามาตรมุ่ง ให้สมแม้น ดั่งผไท เด้ออ้าย เด้อ.....

ทางกุศลว่านี้ ศรีบ่หวังยู้ส่ง..ไผเด้อ
ย้านมันลงโคกคล้อย ถอยเข่าบุ่งหนาม...แข่มควกๆๆ เหอ ๆ ๆ

[โป้ยก่าย]

อ้างถึง:สารยายมะโนสร้างกุศลศรีสิยู้ส่ง
จิตจำนงค์สู่ร่างทางม้างกะห่างหนี
บารมีมอบตอบแทนให้น้ำใจใสสะอาด
ปรารถนามาตรมุ่ง ให้สมแม้น ดั่งผไท เด้ออ้าย เด้อ.....

เพิ่นว่าใจใสแล้วผิวพรรณกะผุดผ่อง
คันจิตหมองหม่นเศร้ากายนั้นกะล่าเหลือง ตั้วนาง

เฮ็ดใจให้เป็นกลางวางใจให้เป็นหนึ่ง ว่าสั้นเด้เพิ่นว่า[/size]

[โป้ยก่าย]

ทางกุศลว่านี้ ศรีบ่หวังยู้ส่ง..ไผเด้อ
ย้านมันลงโคกคล้อย ถอยเข่าบุ่งหนาม...แข่มควกๆๆ เหอ ๆ ๆ

แม่นเป็นจั้งใด๋เกาะมุ้งหนามแมะ เคยเห็นแต่มุ้งเหล็กสวยบัว
อยู่ ส.ณ.พยาไท นั้นหละไปนำเอาใบขับขี้มื่อวานเห็นยุ อิอิ

[ศรีสะท้าน]

อ้างถึง:แม่นเป็นจั้งใด๋เกาะมุ้งหนามแมะ เคยเห็นแต่มุ้งเหล็กสวยบัว
อยู่ ส.ณ.พยาไท นั้นหละไปนำเอาใบขับขี้มื่อวานเห็นยุ อิอิ

โอ๊ยเนาะ ซังเด้ซุมผู้เถ่าตาบ่ดีนี้แมะ บุ่งหนาม ซั้นเด้ บ่แม่น มุ้งหนาม หืยย
บุ่งหนาม กะแปลว่า พงหนาม นั้นหละ ให้อธิบายหล่อนปานในหมากกอกใส่ตำหมากหุ่งเหิ่มโพดเว้ย หน่ายหลาย อิ อิ อิ

[ศรีสะท้าน]

ฝากเป็นกลอนอักษรตั้ง โวหังผญากล่าว
พอให้ชาวพี่น้อง เห็นหม่องแม่นหมาย
ฝากไปเถิงน้องอ้าย ภายพี่ยินดีดอม
ขอจงพิจาร์ณาซอม ส่องใสใจแจ้ง
ยอแสดงในข่อ ตามคำหมอท่านโป๊ยก่าย
สาธยายแต่งแต้ม แกมแก้กล่าวกลอน
บทสะท้อน ชีวิตและสังคม
มีหลายมุมมนกลม เหลี่ยมลายหลายพื้น
มีจุดยืนหลายบั้น เห็นดีกันคนละฝ่าย
เป็นเถิงน้องและอ้าย ยังเห็นจ้ายต่างตา
มนุสสาทั้งหลายล้น พันคนฮ้อยพ่อแม่
พื้นฐานแปรบ่แน่เนิ้ง เปิงบ้านอ่านบ่เห็น
สมควรเป็นคติตั้ง ยังใจให้หลิงหล่ำ
อุเบกข์ธรรมกล่าวไว้ สอนให่ปล่อยวาง
อย่าไปติดอยู่ท้าง ทางอุ่มซุมหนาม
ทำดวงจิตให่ใสงาม ปฏิตามพระธรรมเจ้า
อันใดแนวหมองเศร่า อย่าเก็บเอามาอิงใส่
ศรีขอไขบอกแจ้ง แสดงไว้ที่ควร พระเฮยฯ

โวหัง(โวหาร,คำกล่าว) / จ้าย(ฝ่าย,ฝั่ง) / มนุสสา(มนุษย์) / ฮ้อย(ร้อย/จำนวน) / เนิ้ง(เอนเอียง) / เปิง(ธรรมเนียม,วิถีชีวิต) / หลิงหล่ำ(ดูแล) / อุเบกข์(อุเบกขา,วางเฉย) / ท้าง(แอ่ง,ที่ลุ่ม) / อุ่ม(พุ่ม) / ปฏิ(ปฏิบัติ)

[หญ้าคมปาว]

นัวแฮงพีเอ้ย...ขอบคุณครับ..8):g:g:g:g:g