มื้อนี้ว่างหลายบ่อมีแนวเฮ็ด (อึดเวียก) ว่าซั่นว่า..กะเลยสิขอเอาภาพการปลูกมันสัมปะหลังมาให้เบิ่งครับภาพนี้เป็นท่อนพันธุ์มันครับ ท่อนพันที่ใช้ในการปลูกต้องมีอายุ 8 - 12 เดือนเด้อครับจั่งสิดี คันได้ท่อนพันธุ์มาแล้ว ยังบ่อทันได้ปลูกกะเอาเก็บไว้ในที่ห่ม ๆ จักหน่อย จั่งสิดีว่าสั้นว่า..
ตัดแล้วกะเตรียมปลูกครับ ที่ผมปลูกนี่ปลูกแบบธรรมดาครับ บ่อได้ปลูกแบบคอนโด ถ้าปลูกแบบมันคอนโดต้องเอามีดแกะตาที่ท่อนพันธุ์ออกประมาณ 7-10 ตาครับ แล้วเอาไปเสียบ หัวมันกะสิออกตามตาที่แกะ เพิ่นเอิ้นว่ามันคอนโด ใช้ฮอร์โมนเร่งท่อนมันจากมูลสุกรนำกะดีครับ เข้าไปเบิ่งวิธีเฮ็ดได้ตามนี้ครับhttp://www.ch7.com/News/sbnews.aspx?...06&SeqNo=23338
ยกร่องแล้วขึงเชือกแล้วกะเสียบ ๆ ครับ ถ้าบ่อยกร่องยามฝนตกแฮง ๆ หัวมันกะสิเน่าได้
ท่อพันธุ์ที่เหลือกะถิ่มไว้ ถ้ามีคนมาขอกะให้ครับ แต่ก่อนท่อนพันธุ์มันขอกันกะให้ครับ แต่สู่มื้อนี้ต้องชื้อต้นละบาทโดยประมาณ แล้วแต่พันธุ์อีกต่างหาก ถ้าเป็นพันธุ์ห้วยบง กะแพงขึ้นอีกนิด ๆ หรือยามใด๋คนปลูกหลายต้นพันธุ์กะสิแพงตามครับ
ซากอ้อยยังพอมีเหลือให้เห็นครับ จั่งสี้ล่ะครับชีวิตกะเกษตร จากมันไปใส่อ้อย จากอ้อยไปใส่มัน แต่ถ้าเฮ็ดเองบ่อได้จ้าง หรือจ้างนิด มีรถขนเอง กะพอเฮ็ดอยู่ครับเนอะ
หลังจากปลูกสองเดือนผ่านไปครับ ปุ๋ยกะต้องใส่เพราะว่าพืชทุกชนิดกะต้องการธาตุอาหารหลัก ธาตุอาหารรอง และธาตุอาหารเสริม คือกันเนอะครับ ธาตุอาหารหลักของพืชกะคือ ไนโตรเจน ฟอสฟอรัส โปแตสเชี่ยม เนอะครับเนอะ ถ้าเปรียบใส่คนกะคือว่าต้องกินข้าว ว่าซ้าน...ส่วนธาตุอาหารรองของพืชกะคือแคลเซี่ยม แม็กเนเซี่ยม กำมะถัน ถ้าเปรียบใส่คนเฮากะคือกินกับข้าวครับ... แล้วอันหนึ่งกะธาตุอาหารเสริม มีเหล็ก ทองแดง สังกะสี แมง
กานีส โมลิบดินั่ม โบรอน ซิลิก้า โซเดียม โคบอท์ล คาร์บอน อ๊อกซิเจน เป็นต้นถ้าเปรียบใส่คนกะคือกินของหวาน... สิกินกะได้บ่อกินกะได้ แต่หากว่ากินกะสิดี... ส่วนอีกอันหนึ่งกะคือฮอร์โมน กะมีจำพวกเอ็นเอเอ เอบีเอ ไอบีเอ บีเอพี อีเทฟอน เอทธิลีน ไกรโฟเสต พาราคอว์ต จิ๊บเบอเรลลิน และอีกหลายอย่างครับ ถ้าเปรียบใส่คนกะคือของว่าง หรืออาหารว่าง... สิ่งเหล่านี้พืชต้องการครับ คือคนกะต้องกินอาหารล่ะเนอะครับเนอะ
ส่วนรูปนี้หลังจากปลูกได้ประมาณ 8 เดือนครับ กะงามพอสมควร เว้ามาหลายแล้วย้านเพิ่นเบื่อไปล่ะครับ ขอขอบคุณที่เข้ามาเยียมชมเด้อครับ มีหยังกะติ ๆ และเสริมข้อมูลได้ เพื่อว่าสิเป็นประโยชน์ต่อพี่น้องเฮาเนอะครับเนอะ. ข้าพุน้อยขอน้อมรับว่าซ้าน...ว่า
Bookmarks