วันอาทิตย์หวั่งหั่น น้าเพิ่นแวะมารับลูกซายหล่าเพิ่นอยู่สัตหีบ เพิ่นเลยแวะมาพักอยู่พัทยานำคืนหนึ่ง เอื้อยของใบไม้สีชมพูกะเลยฝากข้าวสารเจ้าหอมๆมาให้น้องสาวหล่าเพิ่น ที่ขาดบ่ได้สำหรับหน้านี่กะคืออีปูที่เพิ่นไปก่นมาให้โดยเฉพาะ เพิ่นฮู้ว่าน้องสาวหล่าเพิ่นอยากกิน เพิ่นเลยไปก่นมาหลายเติบ แล้วก็ยังใจดี ตำน้ำปูแล้วก็เคี่ยวมาให้เรียบร้อย ใบไม้ฯกะเลยซำบาย เอาปูที่ได้มามาเฮ็ดลาบ เฮ็ดอ่อม ตามใจมักเลย หยุดปีใหม่สองมื่อบ่ได้ไปไสก็เฮ็ดเมนูปูนั่นแล้วกิน
มื่อนี้ลองเฮ็ดลาบปูเบิ่งก่อนค่ะ ปกติกลับบ้านนอกเฮา บ่ได้เข้าครัวจั๊กเทือ มีแต่เอื้อยเฮ็ดสู่กิน มื่อนี้ลองเบิ่งค่ะ สิกินได้บ่ กินบ่ได้กะต้องกินเนาะค่ะ เจ้าของเฮ็ดเอง อิอิ
ถ้วยนี้คือปูที่เอื้อยเพิ่นเคี่ยวมาให้แล้วเรียบร้อยค่ะ ก่อนสิเป็นแบบนี้ เพิ่นกะล้างปูนาบ้านเฮาให้สะอาด แกะปูแบ่งเป็นสองส่วน ส่วนกระดองกับส่วนอกปู สมัยเป็นเด็กน้อย ใบไม้ฯสินั่งแยกเพศกะปูนำ อิอิ เอื้อยเพิ่นตำส่วนที่เป็นอกปู ตำให้แหลกๆ หมุ่นๆ แล้วมากรองเอาแต่น้ำ แล้วก็เอาไปตั้งไฟเคี่ยว คนอยู่เรื่อยๆบ่ให้ไหม้ แล้วก็เอามันปูที่แคะออกจ้ากระดองลงมาเคี่ยวใส่นำกัน
ใบไม้สีชมพูบ่ต้องตำให้ยุ่งยาก แค่เอาปูในถ้วยข้างบนมาตั้งไฟ แล้วก็เตรียมเครื่องลาบให้เรียบร้อย พริกผง ข้าวคั่ว เอื้อยกะส่งมาให้นำ หอมอีหลี ซื้ออยู่ตลาดกะบ่หอมจั่งซี้เลยค่ะ สั่นต้นหอม ผักชี หอมแดง พริกสด มะนาว (ถ้าอีแม่เฮ็ดเพิ่นสิใส่น้ำมะนาวเปียก) สูตรของอีแม่แซบกว่าของเอื้อยอีก แต่อีแม่เพิ่นบ่เข้าครัวโดนแล้วค่ะ
เอาปูตั้งไฟเดือดแล้ว ก็ยกลงจากเตาให้เย็นจักหน่อย แล้วค่อยเอามาปรุงค่ะ ผักกะจัดหาตามสะดวก ตามใจมักค่ะ ลองซิมบ่ค่ะ ว่าแซบบ่ ลาบอีปูถ้วยนี้
มื่อหลังสิมาอ่อมปูสู่กินค่ะ เพิ่นฝากน้ำปูมาบ่หลาย กะเลยหยอมเฮ็ดกินเทือละหน่อยค่ะ อิอิ
ของดีมีหน่อยเพิ่นว่า::)
อ้างข้อความนี้
Bookmarks