สารนี้ ชื่อว่า กามเทพน้าวธนูลั่นแผลงศร
หวังจักโปรฝนทิพย์ ให้หนุ่มสาวหายฮ้อน
จึงได้จับ สอแต้มผญายอกลอนกล่าว
หวังให้ ชาวพี่น้อง ได้อม อ้าง อ่านเฮียน
หวังให้สืบสารสร้อย มูลมังเฒ่าเก่า เฮาแหล่ว
คัน บ่ ก่อสืบสร้าง ผญา นั้น สิเสื่อมสูญ สาแหล่ว
ขอเชิญชวนพี่น้อง มาสืบต่อ มรดก เฮาเด้อ
ให้พากัน อดสาห์เพียร ฮ่ำเฮียนเอาไว้
(ชาย)......โอน้อ เจ้าผู้บุปสร้อยสุคนธา บ่ เหยกลิ่น เฮียม เอ้ย
เก้า แม่น้ำ สิบ แม่น้ำ หอมฮู้ ฮอดพี่ชาย
พี่ จึ่ง บุกดงดั้น ประสงค์ดัน มาใส่
ใจประสงค์ อยากฮู้ พระนางน้องผู้จั่งใด น้อง เอ้ยยย
(หญิง)......โอ น้อ เจ้าภูมรีเผิ้ง แสวงชมดวงดอก
เจ้าซ่างติเถล่ย ล้ม กลารงบ้าน มื่นชะเท ทรายถ่อน
น้องนี้ เทียมดั่งดวงดอกไม้บุปผชาติแนวเหม็น
บ่ มีสม นาสิก หมู่ภมร แมงไม้ ดอก ตี้
(ชาย)........โอย ความฮักเทียมดั่งศรแสงจ้ำ ตำทรวงคาอยู่
ความฮัก คือดั่งน้ำอั่งต้อน ทนไว้กะ บ่ไหว
มันหากสุมอกฮ้อน ปานฮมอูดกระฮอก
คัน บ่ ไขปากต้าน อก สิเป้ เปลื่อย ทลาย น้อง เอ้ย
(หญิง)......โอน้อ อ้ายเอ้ย ไขกะไขมาถ่อน ทางนาง สิคอย ต่ง
ไขให้ตรง ป่องท่าง ทางน้อง สิต่งเอา
ย่าน แต่ติแถลง เว้า เอาเลามาปลูก
บ่ แม่นเชื้อชาติอ้อย กินได้ กะ บ่หวาน ดอกตี้

ชาย).......พี่นี่ ชายเซ็งด้าม เจาะจงจาต่อ
................คำสัตย์จั่งเว้า บ่ มีเลห์เหลี่ยมกล
................พี่นี้ คนเดียวแท้ ประสงค์แยงมา ใส่
................ขอใหรับฮักไว้ อย่ามีให้ เสื่อมสูญ น้อง เอ้ย
(หญิง)......โอย คันแมนคนชายนี้ ตั๊วะเป็นตลกเก่ง
................ใจเจ้าหาก ลี้ซ่อนไว้ ปลายลิ้นหลอกลม
................ย่าน บ่ สมคำเว้า เอาๆ ตั้งแต่ปาก
................ฮัก แต่ยาม อยู่ นี้ หนีแล้ว บ่เอ่ยถึง นั่นแหล่ว
(ชาย).......โอน้อ เจ้าผู้ มรดกแก้ว ดวงใสแสนค่า
................พี่ขอถามข่าวน้อง นางหล่า อยู่ ที่ใด
................ใจประสงค์สังแท้ เดินเดียวดั้นฮอด
.................อันตัว พี่นั้น อยากฮู้ นางน้อง จ่งไข พี่ถ่อน
(หญิง)......โอย เฮาหากเทียทางพ้อ เห็นกันหลายเทื่อ เลิงแหล่ว
.................อ้าย บ่ จำจื่อหน้าเห็นแล้ว กะเล่าลืม
.................น้องนี้ ใจประสงค์หน่วยแก้ว เมือขอดแขวนขวัญ
.................ใจประสงค์ เอาอวน จั่งด่วนมา ทาง พี้
(ชาย).........โอย แนวผู้หญิง นี้ตั๊วะไว เว้าคล่อง
..................อ้าปากขึ้น ตั๊วะพร้อม เสี่งกระบวน นั่นแหล่ว
(หญิง).......น้องนี้ บ่ เคยติ แถลงเล่น ตั๊วะเป็นปากม่อ ดอก นา
..................ทาง สิเว้าหลอกล่อ เซาถ่อน อย่า สิฝัน อ้ายเอ้ย