ฮ้อนเน๊อะค่ะพี่น้องเมืองกรุงฯนี่จั่งแม่นฮ้อน ฮ้อนแท้ฮ้อนคัก บ่ฮ้อนแต่ยามมานั่งอยู่หม่อง
เฮ็ดงานนี่ล่ะค่ะ มื่อเซ้าโทรศัพท์เมือถามข่าวเฒ่าแม่ค่ะ พวมกินข้าวเช้าว่าซั่นค่ะ ถามว่าได้
กับหยัง อ่อมหวายกับคั่วแมงกิ๊นูนว่าซั่น หวายกะหวายซื้อเอาดอกค่ะ แมงกิ๊นูนกะมีผู้เอา
มาให้ ได้กินกับลูกใทบ้านกะยังว่าค่ะ ลูกเจ้าของกะหนีจากเบิด พุ่นแล่วค่ะเพิ่นจ่มให้น้อง
เขมฯ น้องเขมฯกะคึดอยากกินนำเพิ่นคือกันค่ะ หวายบ้านน้องเขมบ่แม่นหวายเป็นเครือเด๊
ค่ะพี่น้อง เป็นหวายพุ่มอยู่นำป่าละเมาะ เกิดเป็นกอ ยามไปสับมาแกงเพิ่นกะสิเลือกเอา
ยอดใหญ่ ๆ ค่ะ แม่นแท้ยามไฟใหม้ป่าแล้วฝนตกฮ่ำหวายป่งใหม่สิมีแต่ยอดใหญ่ ๆ ค่ะ
ขมอ่ำล่ำดีคักค่ะ แกงใส่น้ำยานาง ข้าวเบือข้น ๆ ใส่แมงกุดจี่ แมงกิ๊นูนนำค่ะ เฒ่าแม่น้อง
เขมฯยามอ่อมหวายเพิ่นใส่สู่แนวค่ะ เพิ่นสรรค์หาแนวกินบ่ค่อยคือใทบ้านดอกค่ะ ไข่มด
แดงแหน่ ผักหวานแหน่ แมงกิ๊นูนแหน่ แกงใส่ค่ะ เคยไปสับหวายนำเพิ่นเทื่อหนึ่งสับมา
เบิดค่ะ ยอดน้อยยอดใหญ่ เฒ่าแม่ฮ้ายว่า สิกินเทื่อเดียวนี่ซ่ำบ้อคือสับเป็นตามันดับแนว
แท๊.. แต่เดียวนี้กะดับแนวเบิดล่ะค่ะ เพิ่นถางป่าละเมาะปลูกยางกันเบิดค่ะ เดียวนี่ยามสิ
กินแกงหวายกะต้องหาซื้อนำตลาดเอาค่ะ จั่งแม่นคักคนสมัยนี่ เว้าพื้นแมงกิ๊นูนกะหาง่าย
เด๊ค่ะ ค่ำมายามหน้าแล้งแนวนี่ได้โคมไฟกับสาดปูใต้ฮ่มขามโลดค่ะ บ่แม่นไปปูสาดนอนเด๊
ค่ะ ไปสั่นแมงกิ๊นูนค่ะ ต้นหมากขามต้นได๋มีใบอ่อนปกใหม่ แมงกิ๊นูนมักสิมากินค่ะ ปูสาด
ใต้ต้นหมากขาม ผู้หนึ่งกะขึ้นสั่นหง่าขามค่ะแมงกิ๊นูนกะสิตกลงในสาดนั่นล่ะค่ะ เก็บง่าย
ค่ะ คันบ่ปูสาดมันกะสิหม่นนำหญ้าเก็บยากค่ะ คืนหนึ่งได้เป็นคุถังพุ่นค่ะได้แมงกิ๊นูนมา กะ
สิเด็ดปีก คั่วใส่เกลือจั๊กหน่อยค่ะ กินกับข้าวกะแซ่บดีค่ะ กินเล่นกะดีค่ะ เป็นกับแกล้มกะ
เยี่ยมค่ะ เมือบ้านสงกรานต์ถ้ามีโอกาสได้ไปสั่นแมงกิ๊นูนสิเอาบรรยากาศมาฝากเด้อค่ะ
อยากเฮ็ดอ่อมหวายไปฝากพี่น้องบ้านมหาอยู่หาดคูเดื่อคือกันค่ะ แต่เบิ่งซงสิหาซื้อยากค่ะ
พี่น้อง อั่นเฒ่าแม่น้องเขมฯ กว่าสิได้กินกะสั่งคะเจ้าหลายมื่อค่ะ กว่าคะเจ้าสิหามาขายให้
ได้ค่ะ บ่มีแนวจ่มสู่พี่น้องฟังเลยเว้าเรื่องอ่อมหวายกับคั่วแมงกิ๊นูนให้ฟังค่ะ ::)::)
Bookmarks