[Radio]jolo/Story/songkarn.wma[/Radio]
วัฒนธรรมอันสูงค่า ภูมิปัญญาอันสูงส่ง ซ่อยดำรงค์คงอยู่หมั่น ลูกหลานนั้นได้ส่งเสริม
ตั้งแต่มื้อแรกเริ่ม เดิมเก่าเฮาอิสาน บุญสงกรานต์ท่านสมมา เตรียมจัดหาแนวสรงน้ำ
ซ่อยกันหามนกแขกเต้า พระพุทธรูปเก่าอยู่ในสิม พร้อมแผ่นพิมพ์ฮองขา พระพุทธามาเตรียมตั้ง
พร้อมอีกทั้งชาวบ้าน มีฮ้านพระไว้ลงสรง พุทธรูปแต่ละองค์ กะวางปงถ้าสรงน้ำ
พอฮอดยามแห่ตุ้ม รวมกลุ่มซุมเฮาไป ฟ้อนม่วนหดน้ำใส ไส่น้ำอบนพมือตั้ง
ขอเฮายังสุขขีหมั่น ฮักแพงกันดอกคือเก่า ประเพณีตั้งแต่เค้า ขอเฮาได้ไว้คู่เฮือน
สามมื้อเตือนเอื้อยอ้าย ก่อกองทรายป้ายปักไส่ ดินที่ลูกเหยียบออกไป จากวัดได๋ขอส่งเข้า ธรณีสงฆ์เจ้าลูกส่งคืน ซั่นแหลววววว
บุญสงกรานต์บ้านผม ตามธรรมเนียมของงานสงกรานต์ มื้อแรกวันเนาชาวบ้านสิซ่อยกันไปวัด ขนพระพุทธรูปลงจากสิม (ลงจากโบสถ์)เอามาตั้งเรียงไว้ไส่แคร่
ด้านหน้าสิม ตั้งเรียงรายกัน เอาไว้อาบน้ำสรงน้ำในเทศกาลปีใหม่บ้านเฮา จากนั้นเผิ่นกะสิพากันสร้างซุ้มหน้าบ้าน นำถนนหนทางเส้นกลางบ้าน พากันเอา
พระพุทธรูปของเฮือนไผ เฮือนมันไปวางไว้โฮมกัน(รวมกัน)ในซุ้ม จากนั้นกะพากันเฮ็ดน้ำอบน้ำหอม จากนั้นประมาณบ่ายสี่โมง กะสิพากันไปรวมโตกัน
อยู่ศาลากลางบ้าน จากนั้นกะแห่พระพุทธรูป สาดน้ำสรงน้ำพระนำซุ้มของแต่ละบ้าน แห่จนรอบบ้านซ่อยกันสรงน้ำทั่วหมู่บ้านแล้วกะไปเลยไปสรงน้ำอยู่วัด
จากนั้นกะแล้วแต่ม่วนไผ ม่วนมัน ส่วนมื้อถัดไปกะไปสรงน้ำพระอยู่วัดสุแลง มื้อที่สามเผิ่นสิพากันหอบหิ้วดินทราย ไปสร้างปราสาททรายกันในวัด
ม่วนกุบเนาะครับ เผิ่นมีความเชื่อว่าในแต่ละปี เฮาพากันเหยียบเอาดินออกไปนอกวัด วันสงกรานต์แล้วเผิ่นกะพากันหิ้วเอามาคืนไส่วัดคือเก่าครับ
Bookmarks