แกงหน่อไม้ไผ่ป่า
มื้อเช้าฅนภูไทเอางัวไปล่ามเลาะท่ง เลยแวะไปเบิ่งหน่อไม้ไผป่าแถวๆฮิมห้วย เลยเอามีดเซ๊าะมาได้หลายเติบเลยว่าสิเอามาแกงสู่พี่น้องบ้านมหากิน ที่จริงหน่อไม้ไผป่าเขาบ่นิยมเอามาแกงเด้อพี่น้อง ส่วนหลายเขาสิเอามาเฮ็ดหน่อไม้ส้ม ต้มกินกับป่น รึบ่กะเอามาเผาไว้เฮ็ดซุปหน่อไม้ แต่ช่วงเดือนสี่เดือนห้า หน่อไม้ยังหายากอยู่เลยต้องใช้หน่อไม้ไผ่ป่าแกงไปก่อน มาเบิ่งกันเลยครับ
หน้าตาหน่อไม้ไผ่ป่ากะเป็นจั่งซี้หละครับ ส่วนก่อมันกะมักขึ้นตามฮิมห้วยมีหนามหลายๆนั่นหละ
ส่วนเครื่องปรุงตามสูตรฅนภูไท กะมี บักบวบ บักอึน้อย เห็ดขอน ปลาค่อ ผักอีตู่ ผักขะ แล้วที่ขาดบ่ได้กะคือผักสะแงะ
ทีนี้เฮากะเอามาไบ้ฝานใส่หม้อ อ่อมให้จืด หน่อไม้ไผป่าต้องอ่อมจักสองน้ำเด้อเพราะว่ามันสิขมแฮงกว่าหน่อไม้ประเภทอื่น
พออ่อมจืดแล้ว กะเทน้ำทิ้ม แล้วกะเอามาคั่วให้แห้งคักๆก่อนจั่งใส่น้ำยานางลงไป
พอน้ำยานางเริ่มเดือดกะใส่ปลาแดก ข้าวเบื่อลงไป
ใส่ปลาค่อ บักบวบ บักอึน้อย เห็ดขอนลงไป
กะว่าปลาสุกดีแล้วกะใส่ผักอีตู่ ผักสะแงะ แล้วกะผักขะลงไป ปรุงรสตามใจชอบแล้วยกหม้อลง
ตักใส่ถ้วย เสริฟพร้อมข้าวเหนียว กินกำลังฮ้อนๆ
Bookmarks